Read Zokam Nasepte 28 Bible Online

Nasepte 28 - Zokam bible

Nasepte 28

¹Tui gei-ah ka suahtak tak uh ciangin tua tuikulh Malta ahilam ka thei pan uh hi.

²Ko tungah tuikulh mite, lamet loh zahin hong migi uh hi. Guah zu a khua dam ahi manin mei hong cihsakin hong muak uh hi.

³Paul in singkang lom khat tomin meikhuk ah a khul hi. Meisa sa-in ngan khat taikhia-a, a khutah a kivial hi.

⁴Tuikulh mite in a khuta gul kikhai a muh uh ciangin, "Hih pa tualthat hi ngel incin, tuipi sung pan a suahtak hangin Thutang in amah a nuntak ding phal lo hi," a ci uh hi.

⁵Ahi hangin Paul in mei sungah gul singkhia-a, a na a thuak kha kei hi.

⁶Mite in hong bawk kei leh si-in hong puksuk ding hi, ci-in a muangmawh uh hi. Sawt veipi ngak uh a, amah bangmah a cih loh ciangin a ngaihsutna uh laih in, "Amah pasian khat hi," a ci uh hi.

⁷Tua lai tawh kigamla lo-ah tuikulh-a kumpi nasem ulianpa Publius neihsa huang a om hi. Amah in kote a inn ah hong tungsaka, ni thum sung limtakin zin hong do hi.

⁸A pa gilsan le nattun thuahin cina-a lupna ah lum hi. Amah vehin inn sungah Paul va tum a, thu a ngetsak khit ciangin ama tungah a khut nga-a, a damsak hi.

⁹Hih banga a damsak ciangin tuikulh-a cina dang teng hong pai-in a dam uh hi.

¹⁰Amaute in lam tampi ah kote hong pahtawi uh a ka dinkhiat kuan uh ciangin ka taksapnate uh hong guan uh hi.

¹¹Kha thum khit ciangin tua tuikulh a, phalbi sung a na khawlsa tembaw khatah tuangin ka pai uh hi. Alexandria-te tembaw hi-a a mai-ah pasian pengte, Castor le Pollux lim a kisuang hi.

¹²Syracuse ah ka lut uh a, tua lai-ah nithum ka taam uh hi.

¹³Tua panin ka dingkhia leuleu uh a, Rhegium ka tung uh hi. A zing ciangin khanglam huih hong nunga, a thai ciangin Puteoli ka tung uh hi.

¹⁴Tua lai-ah sanggamte pawlkhat na om uh a, amaute in nipikal khat hong taampih un, ci-in hong kho uh hi.

¹⁵Tua lai-a om sanggamte in ka pai uh a zak uh ciangin Appius sumbuk-zawn le Buzung Thumte dong hong zinin na dawn uh hi. Hih mite muh in Paul in, Pasian tungah lungdam ko-in a hanthawn hi.

¹⁶Rome ka tun uh ciangin a cing galkap khat tawh, Paul ama thu-a a om ding a kiphal hi.

¹⁷Ni thum khit ciangin amah in Jew makaite a samkhawm hi. Amaute a kikhop khit uh ciangin Paul in, "Ka sanggamte aw, i minamte tung ahi a, i pupa ngeina tungah ahi zongin bangmah siatna bawl lo napi Jerusalem ah kei hong kimanin Rome mite tungah hong ki-ap hi.

¹⁸Amaute in kei hong sittel uh a, sih dan thuak ding zahin ka mawhna om lo ahi manin hong khah kik nuam uh hi.

¹⁹Ahi hangin Jew-te in a nial uh ciangin kei ma mite tungah ka thu ka tut nop man hi loin, Caesar tungah ka thu hong kitunsak teitei ahi hi.

²⁰Tua thu hangin note tawh maitang kimu a, kiho nuamin kong sapsak ahi hi. Israel-te lametna hanga hih sik khainiang tawh hong kikhih ahi hi," a ci hi.

²¹Amaute in, "Kote in nang thu tawh kisai-in Judea gam panin lai khatpeuh lah ka ngah kei uh a, tua pana hong pai sanggamte kuamah lah nang thu hong ko-a asia-a gen a om kei hi.

²²Ahi hangin mun khempeuh ah mite in, hih biakna pawltuam thu a langpan uh thei ka hi manun nang bang na ci muh hiam, ka za nuam uh hi," ci-in a dawng uh hi.

²³Amaute in Paul tawh kimuh kik ding ni khat seh uh a, a omna munah mi a tamzaw tham a va pai uh hi. Amaute kiangah zingsang a kipan nitak dong, amah in Pasian gam thu hilhcianin pulak a, Moses Thukham le Kamsangte panin Jesu thu ah amaute thuzawh a sawm hi.

²⁴Pawlkhatte ama thugen in thuzawh a, ahi hangin, adangte in a um kei uh hi.

²⁵Amau sung le amau sung kithutuak lo uh a, Paul in hih a tawpkhakna a gen khit ciangin a paikhia hi: "Na pu na pa-te uh kiangah Khasiangtho in kamsangpa Isaiah tungtawna a gen a man hi. Amah in,

²⁶‘Hih mite kiangah pai inla, "Note in na zak ngitnget uh hangin na theitel ngei kei ding uh hi; na muh ngitnget uh hangin na mutel ngei kei ding uh hi,"

²⁷‘Hih mite lungtang sak lua ahi manin a bil uh tawh za mel lo uh a, mitsi uh hi. Tua hikeileh a mit uh tawh mu thei-in a bil uh tawh za a, a lungtang uh tawh theitel in kihei ding uh a, amaute ka damsak kha ding hi,’ a[83] ci hi.

²⁸"Tua ahi manin Pasian hotkhiatna Gentile-te tungah kipuak ta ding hi; amaute in a ngai ding uh hi, cih na theih ding uh ka deih hi," a ci hi. b[84]

²⁹Hih teng a gen khit ciangin Jew-te in ciahsan uh a, amau le amau sungah kiselna lianpi a om hi.

³⁰Ahang in, tua lai-ah kum nih hul, ama sapsa inn sungah Paul om a, amah tawh a kimu nuam khempeuh a sang hi.

³¹A dal om loin hangtakin Pasian gam thu hilh a, Topa Jesu Christ thu a sinsak hi.