Read Zokam Nasepte 3 Bible Online

Nasepte 3 - Zokam bible

Nasepte 3

¹Ni khat, nitak lam nai thum laitak thunget hunin biakinnpi ah Peter le John paito uh hi.

²Tua laitakin a suah tunga mipoi khat, biakinnpi huangte sunga paite tungah khutdawh-a ngen dingin nisima a kikoihna mun Kilawm kici biakinnpi kongpi ah kipuak hi.

³Tuapa in Peter le John a lut dektak a muh ciangin amaute kiangah sum a ngen hi.

⁴Peter in amah en gega a, John in zong a en hi. Tua ciangin Peter in "Ko hong en dih in!" a ci hi.

⁵Tua ciangin tuapa in, amaute in bang khatpeuh a piak ding uh lamena, a lawpet hi.

⁶Tua ciangin Peter in, "Kham ahi-a ngun ahi zongin ka nei kei hi. Ahi hangin ka neih pen nang kong pia hi. Nazareth mi Jesu Christ minin lam pai in," a ci hi.

⁷A khut taklam ah manin kaito a, tua mipa khepekte le siakmite thahatin a khauh hi.

⁸Amah a khe-in diang to a, lam a pai hi. Tua ciangin amaute tawh biakinnpi huangte sungah paikhawma, pai-in dianga Pasian a phat hi.

⁹Mite khempeuh in amah lam pai a Pasian a phat a muh uh ciangin,

¹⁰Kilawm kici biakinn kongpi-a tu, khutdawh-a ngen pa mah hi cih thei tel uh a, amaute in tuapa tunga thupiangte lamdangsa in a lungmang uh hi.

¹¹Khutdawh-a ngenpa in Peter le John a zuihzuih laitakin, mi khempeuh in lamdang sa uh a, amaute omna Solomon Talap a kicihna mun ah a tai uh hi.

¹²Peter in a muh ciangin amaute kiangah, "Israel mite aw, bang hangin hih in note lamdang hong sasak ahi hiam? Kote vang tawh ahikeh ka pasianmina uh hanga hih mipa lam a paisak thei bangin bang hangin kote hong hi ci et na hi uh hiam?

¹³Abraham, Isaac le Jacob-te’ Pasian, i pate Pasian in ama nasem Jesu min thangsak zo hi. Note in amah thah dingin na piakhia uh a, Pilate in amah khah ding thukim napi ama mai-ah amah na nolh uh hi.

¹⁴Note in a Siangtho le Thumaan Pa na nolh uh a, tualthat khat no kianga hong khah dingin na ngen uh hi.

¹⁵Note in nuntakna a piapa na that uh a, ahi hangin Pasian in amah misi pan a thosak hi. Hih thuah kote teci ka hi uh hi.

¹⁶Note in na muh uh le na theih uh hih mipa Jesu min upna hangin kihatsak hi. Note khempeuh in na muh uh bangin ama tunga damsiangna a pia pen Jesu min le ama tungtawna hong pai upna ahi hi.

¹⁷"Tu-in sanggamte aw, na makaite uh hih bangin khuaphawk loin a gamtat uh ka thei hi.

¹⁸Ahi hangin Pasian in kamsangte khempeuh tungtawn a, ‘Christ c[13] in thuak ding hi,’ ci-a a gen kholhsate a tangtunsakna hih bang ahi hi.

¹⁹Tua ahi ciangin kisikin Pasian lam nga kik un. Tua hileh na mawhnate uh kisiaksiangin Topa tung panin thathak ngahna hun hong tung thei dinga;

²⁰tua ciangin note adinga kisehsa tua Christ - Jesu nangawn note kiangah hong sawl thei ding hi.

²¹Sawt lai peka ama kamsang siangthote tungtawna a kamciam bangin Pasian in na khempeuh a bawlphat hun hong tun masiah amah ahileh pel loin vantung ah a om lai ding hi.

²²Ahang in, Moses in, ‘Topa na Pasian un nomau mite lak panin note adingin kei tawh kibang kamsang khat hong khangkhiasak ding hi; amah in note tungah hong gen peuhmah na man pelmawh uh kul hi.

²³Ama thu a ngai lo peuhpeuh ama mite lak panin kikhenkhia siang ding hi,’ a[14] ci hi.

²⁴"Hi takpi hi, Samuel a kipan, kamsangte thugenkhol khempeuh in tu lai hunte na genkhol zo uh hi.

²⁵Tua hi-a kamsangte le Pasian in, na pu na pa-te uh tawh thukhunna a na bawlsate a luahte na hi uh hi. Amah in Abraham tungah, ‘Na suan na khakte tungtawnin leitunga mi om khempeuh thupha kipia ding hi,’ b[15] ci hi.

²⁶Pasian in a nasempa a khankhiatsak ciangin note, na tatsiatna panun na vekun kikhelin thupha hong piak theih nadingin note kiangah hong sawl masa hi," a ci hi.