Read Zokam Nasepte 4 Bible Online

Nasepte 4 - Zokam bible

Nasepte 4

¹Peter le John in mipite tungah thu a gengen laitakun siampite, biakinnpi cing makaipa le Sadducee-te va pai uh hi.

²Sawltakpite in Jesu ah misite a thawhkikna mipite tungah hilhin a tangkona un, amaute a lungzingsak mahmah hi.

³Amaute in Peter le John man uh a, nitaklam ahi manin a zingciang dong thong sungah a khum uh hi.

⁴Ahi hangin amaute thupuak a za mi tampi in um uh a, pasal tulnga bang pha ta hi.

⁵A zing ciangin gam-ukte, upate le thukham siate Jerusalem ah a kikhawm uh hi.

⁶Tua lai-ah tulpi Annas om a, amah tawh Caiaphas, John Alexandar le adang tulpite innkuanpihte zong a om hi.

⁷Amaute in Peter le John a mai-uah dingsak uh a: "Bang vangliatna le bang min tawh hih bawl na hi uh hiam?" ci-in a dong uh hi.

⁸Tua ciangin Khasiangtho tawh Peter kidima, amaute kiangah, "No gam-ukte le upate aw,

⁹mipoi khat tunga migitna nasep hangin amah bangci dam hiam cih thusitna thuak dingin tuni-in ko hong kisam ahileh,

¹⁰note le Israel gama midangte khempeuh in hih thu thei ta un. A dam siang sinsensa a note mai-a ding hih mipa pen, note in na kilhlup uh, ahi hanga Pasian in misi pana a thawhkiksak pa Nazareth mi Jesu Christ min hanga dam ahi hi.

¹¹Amah, "‘No innlamte nolh suang, inntungkhum c[16] suang a suak ahi hi,’ d[17]

¹²Midang khat beek sungah hotkhiatna a om kei hi. Ahang in, eite kihotkhiat nading van kikhupsin nuai-a mihing tungah a kipia, min dang a om kei hi," a ci hi.

¹³Amaute in Peter le John a hanna mu uh a, lai siam lo mi mawkmawk ahilam uh thei uh ahi ciangin lamdang sa-in hih mite Jesu tawh a om khawm uh hi, cih a phawk uh hi.

¹⁴Ahi hangin cina a damsakpa uh amau tawh ding khawm a muh theih manun bangmah a gen thei kei uh hi.

¹⁵Tua ahi ciangin Sanhedrin panin kihemkhia dinga thu a piak khit uh ciangin, amaute thu a kikum uh hi.

¹⁶Amaute in, "Hih mite bang cih ding i hi hiam? Jerusalem a teng mi peuhmah in lah, nalamdang thupi khat a bawl uh thei uh a, i nial nading lah a om kei hi.

¹⁷Ahi hangin tu-a ban, hih thute milakah a kizelhbeh nawn loh nadingin kham ni. Hih min tawh mi khatpeuh tungah thu a gen nawn loh nadingun i vauhilh kul hi," a kici uh hi.

¹⁸Tua khit ciangin amaute sam kik uh a, Jesu minin thu gena, a hilh nawn het loh nadingun thu a pia uh hi.

¹⁹Ahi hangin Peter le John in "No le no kingaihsun dih un, Pasian mitmuhna ah Pasian thu sangin no thu kong man ding uh, koi maanzaw ding ahi hiam?

²⁰Ahang in, ka muhsa uh le ka zaksa uh thu gen loin ka om thei kei uh hi," ci-in a dawng uh hi.

²¹A nasia zaw in tawng’ uh a, tua khit ciangin amaute a paikhiasak uh hi. A piangsa thu hangin mi khempeuh in Pasian phat uh ahi manin, amaute in gawtna a piak nading uh a khensat thei kei uh hi.

²²Ahang in, a lamdangtaka kidamsak tua mipa kum sawmli val upa ta hi.

²³Peter le John a kikhah ciangin amau mite kiangah pai kik uh a, amaute tunga siampi makaite le upate thugen khempeuh a zasak uh hi.

²⁴Amaute in hih thu a zak uh ciangin a aw uh sangsakin Pasian kiangah thu a ngen khawm uh hi. Amaute in, "Thuneipipen Topa aw, vantung, leitung, tuipite le a sunga omte khempeuh na bawlsa ahi hi.

²⁵Na nasempa ka pa uh David kam tawnin Khasiangtho-in na gen a: "‘Bang hang minamte heh a, mite in a mawknapi sawmsim uh hiam?

²⁶Topa langa pang ding le a Sathau Nilh-pa e[18] langpang dingin, leitung kumpite panmun la-in, gam-ukte a kikhawm uh hi,’ f[19] ci hi.

²⁷Hi takpi hi. Herod le Pontia Pilate in Gentile-te le hih khuapi sunga Israel mite g[20] tawh kimu khawmin na sathau nilhsa pa, na nasem siangtho Jesu langpang dingin kithuhual uh hi.

²⁸Amaute in nang vangliatna le nang deihna-in a piang dinga a khentat kholsa bangin sem uh hi.

²⁹Tu-in Topa aw, amaute hong tawnna ngaihsun inla, hangtaka na thu a gen dingin na nasemte hihtheihna lianpi hong guan in.

³⁰Na nasem siangtho Jesu min tungtawnin cina damsaka, a lamdang limte lak ding le a lamdang tuamtuamte hih dingin na khut hong zankhia in," a ci uh hi.

³¹Thu a nget khit uh ciangin amau te kikhopna mun a ling hi. Amaute khempeuh Khasiangtho tawh kidim uh a, Pasian thu hangtakin a gen uh hi.

³²Thu-umte khempeuh, lungsim le ngaihsutna kikhatin a om uh hi. Amau neihsate kuamah in aituamin nei lo uh a, ahi hangin a neih khempeuh uh a neikhawm uh hi.

³³Sawltakpite in, vangliatna lianpi tawh Topa Jesu thawhkikna teci pang uh a amaute khempeuh tungah hehpihna tampitak a tung hi.

³⁴Amaute lakah a kitasam a om kei hi. Ahang in, leitangte ahikeh inn neite in a hunhunin zuak uh a, a khot uh sumte,

³⁵sawltakpite khe phungah koihin a kitasam peuhpeuh tungah a hawm uh hi.

³⁶Cyprus pan, Joseph kici Levi mi khat, sawltakpite in Barnabas (Hanthawnna Tapa cihnopna) a cih uh mipa in

³⁷lo khat a neih zuak a, a sum paipihin sawltakpite khephungah a koih hi.