Read Zokam Nasepte 5 Bible Online

Nasepte 5 - Zokam bible

Nasepte 5

¹A min Ananias kici mi khat in zong a zi Sapphira tawh a neihsa leitang a zuak khawm uh hi.

²A zi theihpih sinsenin amah mah in a sum khenkhat a im hi. Ahi hangin a ip loh teng sawltakpite khe phungah va puak hi.

³Tua ciangin Peter in, "Ananias aw, Satan in na lungsim hong zo-in, Khasiangtho khema, na leitang zuak mana na ngah sum pawlkhat nang adingin na kep, bangci bang hiam?

⁴A kizuak ma-in zong nang aa hi lo ahi hiam? A kizuak khit ciangin zong tua sumte nang thu-a na zat theih hi lo ahi hiam? Tua banga hih ding ngaihsutna bang in hong neisak hiam? Mihingte khem hi loin Pasian khem na hi hi," a ci hi.

⁵Ananias in hih thu a zak ciangin, puksukin a si hi. Tua thupiang a zate khempeuh nak lau mahmah uh hi.

⁶Tua ciangin tangvalnote pai-in a luang tun uh a, amah puakhia-in a vui uh hi.

⁷Tua khit nai thum bang ciangin, thupiangte bangmah thei loin a zi a va lut hi.

⁸Peter in, "Nang le Ananias in na leitang man-ua na ngah uh hih zah mah ahi hiam? Hong gen dih in," ci-in a dong hi. Amah in, "Himah, aman tua zah mah hi," a ci hi.

⁹Peter in, "Bangci-a Topa Kha zia-et ding kithukim na hi uh hiam? En dih in! Na pasal vuite khe kongkhak bulah om hi; nang zong hong puakhia ding uh hi," a ci hi.

¹⁰Tua hun laitakin ama khephung ah puksukin a si hi. Tua ciangin tangvalnote tumin amah a sisa a om mu uh a, puakhia in a pasal geiah a vui uh hi.

¹¹Pawlpi bup le hih thu a zakha mi khempeuh a nak lau mahmah uh hi.

¹²Sawltakpite in mite lakah lim lam dang le a lamdang tampi a bawl uh hi. Thu-umte khempeuh Solomon Talap ah a kituahkhawm zel uh hi.

¹³Mipite in amaute tunget mahmah tei napi, a pawlpih ngam kuamah a om kei hi.

¹⁴Tua hi napi lah Topa a um numei pasal tam semsema amau pawlmi a kibehlap hi.

¹⁵Tua thu hangin Peter in tua lai tawna a pai ciangin amaute pawlkhat alim in a liahkhak beek nadingin mite in a cinate uh lupna le phek in lampi-ah a na sial uh hi.

¹⁶Jerusalem kima khuapite panin zong mihonpite va kikhawm uh a, a cinate uh le kha gilo a[21] in a gentheihsakte va puakin amaute khempeuh a dam uh hi.

¹⁷Tua ciangin Sadducee pawlte sunga kihel tulpipa le ama kithuahpihte in a haza mahmah uh hi.

¹⁸Amaute in sawl takpite man uh a, tangpi thong inn ah a khum uh hi.

¹⁹Ahi hangin Topa vansawltak khat in zan laitakin thong kongkhakte hongin a paikhiatpih hi.

²⁰Amah in, "Pai un, biakinnpi huangte ah ding unla, hih nuntak-thakna thupuak bucing mite tungah gen un," a ci hi.

²¹Amaute tunga kigensa bangin khuavak phetin biakinnpi huangte ah lut uh a, mite thu a hilh uh hi. Tulpipa le a kithuahpihte a tun uh ciangin Israel upate—Sanhedrin khempeuh kikhawmsakin, thonga sawltakpite a samsak uh hi.

²²Ahi hangin thong inn a tun uh ciangin makaite in tua lai-ah amaute a mu kei uh hi. Tua ciangin amaute ciah kik uh a,

²³"Thong inn muanhuai taka kikalh le kongkhakte ah a cingte a ding ka mu uh hi. Ahi hangin tuate ka hon uh ciangin a sungah kuamah ka mu kei uh hi," ci-in a zasak uh hi.

²⁴Hih zaksakna a zak uh ciangin biakinnpi cingte makaipa le siampi makaite in, hih thu bang hong suak zen tam, ci-in a lungmang uh hi.

²⁵Tua ciangin mi khat va pai a, "En un, thong sunga na khum uh mite in, biakinnpi huangte sungah dingin mite thu hilh uh hi," a ci hi.

²⁶Tua phetin biakinn cing makaipa a makaihpih teng tawh va pai uh a, sawltakpite hong tonpih uh hi. Mipite in suang tawh a den ding lau uh ahi manin thagum a suang kei uh hi.

²⁷Sawltakpite a tunpih khit uh ciangin tulpipa thusit dingin Sanhedrin mai-ah a dingsak uh hi.

²⁸Amah in, "Hih minin thu na hilh loh nadingun thukhauh kong pia zo uh hi. Ahi hangin na thuhilhna un Jerusalem khua sung teng zelkhin a, hih mipa sisan ah ko nong mawhkhusak uh hi," a ci hi.

²⁹Peter le sawltakpi dangte in, "Mihing thu sangin Pasian thu ka man zawk pelmawh uh kul ding hi.

³⁰Amah sing tungah khai-a na thah pa uh Jesu, ka pate uh Pasian in misi pan thosak zo hi.

³¹Amah in Israel-te tungah kisikna leh mawhmaisakna a piak theih nadingin Pasian in amah tawisanga ama taklamah koih in, Ukpa le Honpa in a tusak hi.

³²Hih thu ah kote teci ka hi uh a, Pasian in ama thu a mangte a piak Khasiangtho zong teci ahi hi," a ci uh hi.

³³Amaute in hih thu a zak uh ciangin lungso uh a, amaute a that nuam uh hi.

³⁴Ahi hangin mi khempeuh in a zahtak uh Gamaliel kici thukham sia Pharisee khat Sanhedrin sungah ding to a, tua mite tawm vei sung a pua lamah omsak phot nading thu a pia hi.

³⁵Tua ciangin amaute tungah thu gen a, "Israel mite aw, hih mite na bawl nopna thu uh limtakin ngaihsun un.

³⁶A beisa hun khat lai-in Theudas hong kilang in, mi gina ngel khatin hong kigena mi zali bang in amah pawl uh hi. Amah kithat in, ama nungzuite maimang a, bangmah ahi kei hi.

³⁷Mi kisim hun laitakin ama nungah Galilee mi Judas kilang leuleu a, gam lehdo mi honkhat a makaih hi. Amah zong kithata, a nungzuite a kithehthang uh hi.

³⁸Tua ahi manin tu laitaka i thu tawh kisai-in ngaihsutna kong piak nopinah: hih mite hi ci omsak un! Khahkhong lel un! Ahang in, amau sawm le a nasepte uh mihing sawm lel ahileh lawhsam ding uh hi.

³⁹Ahi hangin Pasian pan ahileh mite na kho zo kei ding uh hi; Pasian langdo na hi lel kha ding uh hi," a ci hi.

⁴⁰A thugen in amaute a thuzawh hi. Amaute in inn sungah sawltakpite sam in a sat uh hi. Tua ciangin amaute in Jesu mina thu a gen nawn loh nadingun thu pia uh a, amaute a khah uh hi.

⁴¹Sawltakpite, tua Min hanga zah lakna a thuak tham dinga a om uh nuam uh a, Sanhedrin panin a paikhia uh hi.

⁴²Ni khat khit ni khat biakinnpi tual le inn khat pan inn khatah, Jesu in Christ a[22] hi cih lungdamna thu tawlnga loin hilhin a tangko uh hi.