Read Zokam Nasepte 7 Bible Online

Nasepte 7 - Zokam bible

Nasepte 7

¹Tua ciangin tulpipa in ama kiangah, "Hihte hong matna a maan hiam?" ci-in a dong hi.

²Hih thu a dawnna in amah in, "Sanggamte le pate aw, ka thugen na ngai un! I pa Abraham Haran-a a ten ma Mesopotamia a, a om lai-in ama kiangah minthanna Pasian a kilang hi.

³Pasian in, ‘Na gam le na mite nusia inla, kong lah nading gamah pai in,’ b[23] ci hi.

⁴"Tua ahi ciangin Chaldea gam nusia in Haran ah a teng hi. A pa a sih khit ciangin tu-a note tenna mun hih leitang ah Pasian in amah sawl hi.

⁵Amah in ama tungah a luah ding leitang khepek cia nangawn a pia kei hi. Ahi hangin Abraham in ta a neih loh lai nangawn in, amah le a nunga asuan akhakte in tua leitang a tang ding uh hi, cih Pasian in kamciam khin hi.

⁶Pasian in ama tungah: ‘Na suan na khakte amau gam lo khatah mikhualin om ding uh a, amaute sila suakin, kum zali sung kibawlsia ding hi.

⁷Ahi hangin amaute sal-a a khawi mite ka gawt ding hi, ci-in gen a, tua nung ciangin amaute tua mun pan paikhia ding uh a, hih munah kei hong bia ding uh hi,’ c[24] Pasian in ci hi.

⁸Tua ciangin Abraham tungah vun at ding thukhun a pia hi. Tua hi-a Abraham, Isaac’ pa hong hi-in a suah khit ni giat ciangin a vun a at hi. Tua nung ciangin Isaac, Jacob’ pa hong hi-a James, pupi sawm le nihte pa hong suak hi.

⁹Pupite in Joseph a hazat manun Egypt ah sila-in a zuak uh hi. Ahi hangin Pasian in amah ompih a,

¹⁰ama lungkhamna khempeuh panin hukhia hi. Amah in Joseph tungah pilna le Egypt kumpi Pharaoh mai-ah maipha ngahna a pia hi. Tua ahi ciangin amah in Egypt gam khempeuh le a kumpi inn sung khempeuh a uksak hi.

¹¹"Tua ciangin Egypt le Canaan gam sung khempeuh ah kialpi tungin, gim thuakna lianpi tunga, i pate in an a mu zo kei uh hi.

¹²Egypt ah an om hi cih Jacob in a zak ciangin i pate a khat veina hawh dingin a sawl hi.

¹³A nih veina a hawh uh ciangin, Joseph in a sanggamte kiangah amah kua hi hiam cih kigen a, Pharaoh in Joseph innkuan sung thu a na thei hi.

¹⁴Hihte khit ciangin Joseph in a pa Jacob a innkuan bup tawh samsaka, a vekun sawm sagih le nga a pha uh hi.

¹⁵Tua ciangin amah le i pate sihna mun Egypt ah Jacob a paisuk hi.

¹⁶Amaute luangte Shechem ah kipuak kika, Abraham in Shechem-a Harmor tate tung pana sum bangzah hiam khat tawh a leisa hankhuk sungah kisial hi.

¹⁷Pasian in Abraham tunga a kam ciam a tangtunsak ding hun a nai ciangin Egypt a i mite kibehlapin tam mahmah uh hi.

¹⁸Tua ciangin Joseph thu bangmah a thei kha lo kumpi dang khat in, Egypt gam uk hi.

¹⁹Amah in i mipihte khembawl in, i pute nengcipa, a ta suakthakte uh, a sih nadingin thatang hat thu-in a paikhiasak hi.

²⁰"Tua hun laitakiin Moses suak a, amah naupang mawkmawk ahi kei hi. a[25] Ahang in, a pa inn sungah kha thum sung kikem hi.

²¹A pua-ah a kikoihkhiat ciangin Pharaoh tanu in amah la a, ama tapa bangin khoi hi.

²²Moses in Egypt pilna khempeuh sin a, thugenna le nasepna ah a vanglian hi.

²³"Moses kum sawmli a phak ciangin ama mipih Israel mite veh ding a khensat hi.

²⁴Ama mipihte khat, Egypt-te khatin a khelbawl laitak mu-a, a hu dingin va pai-in, a phulakna in Egypt pa a that hi.

²⁵Moses in, Pasian in amaute honkhia dingin amah zang hi, cih a phawk ding uh hi, ci-in a ngaihsun hi. Ahi hangin amaute in a phawk kei uh hi.

²⁶A zing ciangin Israel mite nih a kilai laitak Moses in a tuak hi. Amah in amaute lep sawmin, ‘Guaite aw, note sanggam khat hi napi, bang hanga khat le khat kisiasak nuam na hi uh hiam?’ ci hi.

²⁷"Ahi hangin a gilo-zawpa in Moses thalsawn a, ‘Kua in kote tungah uk a thukhenpa dingin nang hong koih ahi hiam?’

²⁸Zan-a Egypt pa na thah bangin kei hong that nuam na hi hiam?’ b[26] ci hi.

²⁹Moses in hih thu a zak ciangin, Midian ah taimang sanin tua lai-ah mikhualin va tenga tapa nih a nei hi.

³⁰"Kum sawmli khit ciangin Sinai Vum kiang gamlakah vansawltak khat, sawl kawm meikuangin Moses kiangah kilang hi.

³¹Amah in hih a muh ciangin a na muh lamdang a sa mahmah hi. A naizaw-a en dingin a pai leh amah in Topa aw za a:

³²‘Na pate uh Pasian, Abraham, Isaac le Jacob-te’ Pasian ka hi hi,’ c[27] ci hi. Moses lau in linga, a en ngam kei hi.

³³"Tua ciangin Topa in ama kiangah, "Na dinna mun siangtho ahi manin na khedap suahkhia in.

³⁴Egypt a ka mite a kinencipna ka mu zo hi. Amaute tauna ka za zo-a, a suaktasak dingin hong paisuk ka hi hi. Tu-in hong pai in, Egypt ah kong sawl kik ding hi,’ d[28] ci hi.

³⁵"Amaute in, ‘Kua in kote tungah uk a thukhenpa dingin nang hong koih ahi hiam?’ ci-a, a thu a nialpa uh hih Moses mah ahi hi. Amaute ukpa le hukhia pa dingin Pasian mahmah in amah, sawl kawm meikuang sunga ama kianga kilang vansawltak tungtawna a sawl ahi hi,

³⁶Amah in amaute Egypt panin pai khiatpih a, Egypt gam, San Tuipi e[29] le sehnel-gam ah kum sawmli sung a lamdangte le lim lamdangte a bawl hi.

³⁷‘Pasian in nomau mite lak panin keimah bang kamsang khat hong sawl ding hi,’ f[30] ci-a Israel-te tungah a na hilh pa tua Moses mah ahi hi.

³⁸Amah sehnel-gam a mihon kipawlkhawmte’ pate le Sinai Vum tunga amah a hopih van sawltak tawh a omkhawm hi; amah in eite tunga hong puaksawn ding a nungta thute a ngah hi.

³⁹"Ahi hangin i pate in ama thu a mang kei uh hi. A man’ sangsik un, amah nolh uh a, a lungtangte uh Egypt lam a nga kik uh hi.

⁴⁰Amaute in Aron kiangah, ‘Kote mai-a pai ding pasiante hong bawlsak in. Egypt pana hong pikhia hih mihing pa Moses lah bang suak ta hiam, ka thei kei uh hi!’ g[31] ci uh hi.

⁴¹Amaute in bawngno suna lim a bawl uh tua hun lai ahi hi. Amaute in tua tungah kithoihnate puak uh a, a khut uh tawh a bawlsate uh pahtawi-in a lawm uh hi.

⁴²Ahi hangin Pasian in lehngatsana vantung nate biakna adingin amaute a ngawh piak hi. Hih kamsangte laibu sunga kigelhsa thu: "O Israel innkuante aw, gamlak ah kum sawmli sung, biakpiakna le biaknate kei nong puak uh hiam?

⁴³Moloch biakbukno le na pasian uh Rephan aksi, biak dinga na bawl uh milimte na tawisang uh hi. Tua ahi manin Babylon galkhatah salin h[32] kong paisak ding hi,’ kici le hih thu kituak hi.

⁴⁴"I pu i pa-te in gamlak ah Teci panna biakbuk a nei uh hi. Tua pen, Pasian in Moses tunga a hilh, alim a muhsa banga kibawl ahi hi.

⁴⁵Biakbuk ngah khin in, Pasian in amaute mai-a a hawlkhiat minamte leitang a lak uh ciangin i pate in Joshua makaihna tawh tua biakbuk na pua uh a, tua biakbuk, David khanghun dong tua gamah a om hi.

⁴⁶Amah in Pasian angvanna nuamsa a, Jacob i[33] Pasian ten nading a lamsak theih nading ngen hi.

⁴⁷Ahi hangin ama ading inn lam pa Solomon ahi hi.

⁴⁸"Bangbang ahi zongin a Sang Penpa ahileh mihing bawlsa innte ah a teng kei hi. Kamsangpa gen bangin:

⁴⁹"‘Vantung ka tokhom hi-a, leitung ka khe ngakna ahi hi. Kei ading bangci bang inn lam ding na hi hiam? Ahikeh ka khawl nading mun koi lai hi ding hiam?

⁵⁰Hih na khempeuh ka khuta ka bawlsa hi lo ahi hiam? Topa in ci hi.’ j[34]

⁵¹"No a genhak mite, lungtang le bil vun-at lohte! Na pate uh tawh na kibang tektek uh hi. Note in Khasiangtho na nang ngitnget uh hi!

⁵²Na pate un a bawlsiat loh kamsang om ngei ahi hiam? Amaute in Thumaan Pa hong pai ding thu a genkholte nangawn a that uh hi.

⁵³Vansawltakte tungtawna kizang thu kham ngah napi a zui lo note in tu-in amah lehhekin na that uh hi," a ci hi.

⁵⁴Amaute in hih thu a zak uh ciangin lungso uh a, a ha uh a gawisan uh hi.

⁵⁵Ahi hangin Khasiangtho tawh kidim Stephen in vantung lam ento-in, Pasian minthanna le Pasian taklam a ding Jesu a mu hi.

⁵⁶Amah in, "En un, van kihong le Pasian taklama Mihing Tapa a ding ka mu hi," a ci hi.

⁵⁷Tua takteh, amaute in a bil uh hum uh a, a aw neih zah un kiko in amah a bawhhuan uh hi.

⁵⁸Khuapi sung panin talkaih gawp uh a, suangin a deng uh hi. Tua hun tektekin tecite in Saul kici tangvalno khat khephungah a puante uh a koih uh hi.

⁵⁹Amaute in amah suang tawh a den laitakun Stephen in, "Topa Jesu aw, ka kha na sang ta in," ci-in thu a ngen hi.

⁶⁰Tua ciangin khukdin-a, "Topa aw, hih mawhna amaute tungah na phul kei in," ci-in a kiko hi. Hih teng a cih khit ciangin a ihmu hi.