Read Zokam Nasepte 8 Bible Online

Nasepte 8 - Zokam bible

Nasepte 8

¹Saul zong tua lai-ah om a, ama sihna a thukimpih hi. Tua ni-in Jerusalem ah pawlpi kibawlsiatna lianpi om a, sawltakpite longal adangte khempeuh Judea le Samaria gam sung tengah a kithehhthang uh hi.

²Pasian a zahtak mite in Stephen vui uh a, amah a kah ngutngut uh hi.

³Ahi hangin Saul in pawlpite suksiat ding a kipan hi. Inn khat pan inn khatah pai-in numei hitaleh pasal hitaleh kaikhia gawpin amaute thong ah a khum hi.

⁴A kithehthang mite in amau paina peuhpeuh ah thu a hilh uh hi.

⁵Samaria gam khuapi khatah Philip paisuak a, tua lai-ah Christ a[35] thu a tangko hi.

⁶Mihonte in Philip thugen za uh a, a limlamdang bawlte a muh ciangun amaute khempeuh a kiangah va pai-in a thugen limtakin a ngai uh hi.

⁷Mi tampi sung pan kha gilote b[36] kiku vangvang in paikhia uh a, pumzawte le mipoite tampi a dam uh hi.

⁸Tua ahi ciangin tua khuapi sungah lungdamna lianpi a tung hi.

⁹Simon kici mi khat, khuapi sungah tawlkhat sung oma, ai sanin Samaria mi khempeuh in lamdang mahmah a sa uh hi. Amah mi lian khatin kingaihsun-a a kisial hi.

¹⁰Mi lian mi neu, mi khempeuh in ama thu ngai-in, "Hih mipa, Vangliatna Lian kici Pasian vangliatna ahi hi," ci-in a thangsak uh hi.

¹¹Amah in amaute sawtveipi a mitphial bawlna lamdang sasak mahmah ahi manin, amah a zui uh hi.

¹²Ahi hangin Philip in Pasian gam thupha le Jesu Christ min thute a hilh ciangin um uh a, a numei a pasalin a kibaptise uh hi.

¹³Simon mahmah in zong uma a kibaptise hi. Amah in a lian lim lamdang le a nalamdang a muhte lamdang sa in Philip a zui kawikawi hi.

¹⁴Jerusalem a sawltakpite in, Samaria ah Pasian thu kisang ta cih a zak uh ciangin amaute kiangah Peter leh John a sawl uh hi.

¹⁵Amaute a tun uh ciangin Khasiangtho a ngah nadingun amaute thu a ngetsak uh hi.

¹⁶Bang hang hiam cih leh amaute khat beek tungah Khasiangtho a tung nai kei hi; amaute Topa Jesu min sungah c[37] a kibaptise pan bek uh hi.

¹⁷Tua ahi ciangin Peter le John in amaute tungah a khut uh nga uh a, Khasiangtho a ngah uh hi.

¹⁸Simon in sawltakpite khut ngakna tawh Kha kipia cih a muh ciangin amaute sum tah a,

¹⁹"Ka khut ka ngaknate in Khasiangtho a ngah theih nadingin hih, hihtheihna kei zong hong pia un," a ci hi.

²⁰Peter in, "Na sum tawh mangthang khawmta in! Bang hang hiam cih leh Pasian letsong sum tawh lei theih dingin na ngaihsut hi.

²¹Pasian mai-ah na lungtang maan lo ahi manin hih nasepna sungah tanh ahi a, panna ahi zongin na nei kei hi.

²²Hih tatsiatna pan kisik inla, Topa tungah thu ngen in. Na lungsungah tua bang ngaihsutna na neih, amah in hong maisak kha thei ding hi.

²³Ahang in, khaatna tawh na kidim a, mawhna sila-in na om cih kong mu hi," ci-in a dawng hi.

²⁴Tua ciangin Simon in, "Na gensate kei tungah bangmah hong tun loh nadingin Topa tungah thu hong ngetsak in," ci-in a dawng hi.

²⁵Peter le John in Topa thu teci pangin a thansak khit uh ciangin Samaria gam khuaneu tampi ah lungdamna-thu a hilh kawmun Jerusalem ah a ciah kik uh hi.

²⁶Tu-in Topa vansawltak khat in Philip tungah, "Jerusalem pana Gaza lama paisuk - gamlak lamneu ah leitaw-lam manawhin pai in," a ci hi.

²⁷Tua ciangin amah kipankhia a, lampi ah Ethiopia mi d[38] cil kigetpa, Ethiopia kumpinu Candace gou khempeuh a uk kumpi nasem ulian pa tawh a kituak hi. Hih mipa Jerusalem ah Pasian bia dinga va pai hi-a

²⁸inn lamah ciah kikin sakolleng tungah tu-a, kamsangpa Isaiah laibu a sim hi.

²⁹Philip kiangah Kha in, "Sakolleng va naih inla, a kiangah va om in," ci-in a gen hi.

³⁰Tua ciangin Philip in tua sakol leng a va delh leh tua mipa in kamsangpa Isaiah laibu a sim a za hi. Philip in, "Tu-a na lai sim na theitel hiam?" ci-in a dong hi.

³¹Amah in, "Mi khatpeuh in hong hilhcian kei ngal leh bangci theih ding ka hi hiam?" a ci hi. Tua ciangin amah in Philip kahto-a amah tawh a tukhawm dingin a sam hi.

³²Tua cilgehpa in: "A gopa kianga kipaipih tuu bangin amah kipaipih a, a mul metpa mai-a a ham lo tuuno bangin a kamka kei hi.

³³Amah kizahlaksakin thutang ahina kisuhsak hi. Ama nuntakna leitang pan kilaksak ahi manin asuan a khakte thu kua in gen thei ding hiam?" a[39] cih Laisiangtho mun a sim laitak ahi hi.

³⁴Cilgehpa in Philip kiangah, "Nong hehpihna in, hih kamsangpa amah le amah kigen ahi hiam, ahi keileh mi khatpeuh thu gen ahi hiam hong hilh dih in," ci-in a dong hi.

³⁵Tua ciangin Philip in tua Laisiangtho mun tektek mah pansanin Jesu tawh kisai lungdamna thu a genpih hi.

³⁶A paipai laitakun tui omna mun khat tung uh a, cilgehpa in, "En in, hih lai-ah tui a om hi. Bang hangin kibaptise lo ding ka hi hiam?" a ci hi.

³⁷Philip in, "Na lungsim khempeuh tawh na up leh na kibaptise thei hi," a ci hi. Cilgehpa in, "Jesu Christ, Pasian Tapa hi, cih ka um hi," b[40] ci-in a dawng hi.

³⁸Tua ciangin sakolleng a khawl nading thu a pia hi. Philip le cilgehpa tui sungah paisuk khawm uh a, Philip in amah a baptise hi.

³⁹Tui sung pan a paikhiat toh uh ciangin Topa Kha in Philip lakhiamang pah a, cilgehpa in a mu kik nawn kei hi. Ahi hangin lam tawntungah lungnuamtakin a pai hi.

⁴⁰Philip ahileh Azotus ah kilang a, zin kawikawi-in Caesarea a tun dong khuapi khempeuh ah lungdamna-thu a hilh hi.