Read Zokam Rome-te 1 Bible Online

Rome-te 1 - Zokam bible

Rome-te 1

¹Sawltakpi dinga kisam Pasian lungdamna-thu hilh dinga kisehtuama, Christ Jesu nasem keimah Paul in -

²Pasian in a kamsangte tungtawnin Laisiangtho sungah a ciamkholhsa,

³a Tapa tawh kisai lungdamna-thu, amah mihing pianngei-a David suan,

⁴sianthona Kha a[1] tungtawna misi pana a thawhkikna hanga Pasian Tapa ahina vangliatna tawh a kipulakkhia pa b[2] i Topa Jesu Christ ahi hi.

⁵Ama tungtawn le ama min hangin upna pana piang thumanna-ah Gentile-te khempeuh lakpanin mite sam dingin kote in hehpihna le sawltakpi za ka ngah uh hi.

⁶Jesu Christ adinga kisam mite lakah note zong na kihel uh hi.

⁷Pasian in it-a misiang dinga a sap Rome a omte khempeuh tungah: I Pa Pasian le Topa Jesu Christ tung pana hehpihna le lemna note tungah om ta hen.

⁸Amasa penin na upna uh leitung khempeuh ah kithang ahi manin note khempeuh hangin Jesu Christ tungtawnin ka Pasian tungah ka lungdam hi.

⁹Hun khempeuh a ka thungetna ah note kong phawk tawntung lam, ama Tapa lungdamna-thu ka lungsim khempeuh tawh hilh a, a na ka sep Pasian ka teci ahi hi.

¹⁰Tua ciangin tu-in Pasian deihna banga note kianga kong pai theih nadingin lampi kihong ta buang hen, ci-in thu ka ngen hi.

¹¹Note hong thakhauhsak ding khalam letsong kong piak theih nadingin note kong muh ding ka lunggulh hi.

¹²Tua pen, kei le note upna tawh khat le khat i kihanthawn tuah theih nading ahi hi.

¹³Sanggamte aw, Gentile dangte lakah an ka lak bangin note lakah zong ka lak theih nadingin note kianga pai ding tamveipi ka geel (hangin tu ciang dong hong kidaltan ahilam) na phawk loh khak ding uh ka deih kei hi.

¹⁴Greek-te le Greek lote tawh ahi zongin, a pilte le a haite tungah bat ka nei tuak hi.

¹⁵Rome a om note kiangah zong lungdamna-thu hilh ding ka lawp mahmah na tua hang ahi hi.

¹⁶Tua lungdamna-thu a um mite peuhmah hotkhiat nadinga Pasian vangliatna ahi manin ka maizumpih kei hi; a masa in Jew mite, tua khit ciangin Gentile-te ading ahi hi.

¹⁷Ahang in, "A thumaante upna hangin a nungta ding uh hi," c[3] ci-a kigelhsa bang tektek in lungdamna-thu ah Pasian tung pan thumaanna kilaakkhia a, tua thumaana a masa pen pan a nunung pen d[4] dong upna hang ahi hi.

¹⁸Amau tatsiatna tawh thutak neng cipa, pasian-milohna le tatsiatna khempeuh tungah Pasian thangpaihna van panin hong kilaak hi.

¹⁹Pasian tawh kisai theihtel ding khempeuh Pasian in amau tungah kitelsak khin hi.

²⁰Ahang in, leitung piancil a kipan a kimu thei lo Pasian pianziate, a tawntung vangliatna le a Pasian pianngei a kipiangsaksa nate panin kitheitelin kimu ta ahi manin mihingte in paulap ding a nei kei uh hi.

²¹Tua hi-a amaute in Pasian thei napi Pasian bangin minthangsak lo in ama tungah lungdamna a ko kei uh hi. Ahi hangin amaute ngaisutte thu ginalo suakin a lungtang haite uh a mialcip hi.

²²Amaute pil kisa napi mihai suak uh a,

²³a si thei mihing, vasate, ganhingte le a bokvak ganhingte tawh kisuna kibawl, limte tawh a si thei lo Pasian minthanna a kheng uh hi.

²⁴Tua ahi manin amaute khat le khat a zumhuaipi-a a pumpi uh kizang dingin mawhdim a lunggulhna uh tawh kizui-a, numei-pasal paktat dingin Pasian in a ngawhngatsan hi.

²⁵Amaute in Pasian thutak zuauthu tawh kheng uh a, a Piangsakpa sangin a piansak nate bia-in a na sem uh hi. Amah ahileh a kiphat tawntung hi. Amen.

²⁶Hih thu hangin Pasian in amaute a zumhuai kilunggulhnate ah a ngawh ngatsan hi. A numeite nangawn un, pasal tawh lupkhawmna ngeina uh a ngeina lo tawh a kheng uh hi.

²⁷Tua mah bangin pasalte in zong numei tawh lupkhawmna ngeina nusia in pasal le pasal a kilung gulh mahmah uh hi. Pasalte, pasal dangte tawh a muh thadahhuai-in gamta uh a, amau lehtatna tawh kituak gawtna a thuak uh hi.

²⁸Tua banah Pasian theihna kepcing ding thaman sa lo uh ahi manin hih dinga kilawm lo pipi a hih nadingun lungsim siat dimdem na-ah amaute a ngawhngatsan hi.

²⁹Amaute tatsiatna, gitlohna, duhhopna le lungsim siat dimdemna tawh kidim uh hi. Amaute enna, tualthahna, kitotna, khemna le etsatna tawh a kidim uh hi. Amaute, gensiathatte,

³⁰gendai hatte, Pasian muhdahte, kimisakte, kisatheite le kihisakte ahi uh hi. Amaute in gitlohna zia a thakthak phuan uh hi; amaute in a nu-le-pate uh thu a mang kei uh hi;

³¹amaute, ngaihsutna neilo, upna nei lo, itna nei lo, hehpihna nei lo mi a suak uh hi.

³²Tua bang a hihte sih ding kilawm hi cih thukip Pasian thukhenna maan amaute in thei napi, hih nate tektek mah hih zom tham loin tua banga gamtate a thukimpih zawsop uh hi.