Read Zokam Rome-te 10 Bible Online

Rome-te 10 - Zokam bible

Rome-te 10

¹Sanggamte aw, Israel mite adinga ka lunggulhna le Pasian tunga ka thungetna pen amaute a kihotkhiat theih nading ahi hi.

²Ahang in, Pasian adingin amaute nakpi-a a hanciamna uh teci ka pang thei hi. Ahi hangin amaute hahkatna in theihna pansan ahi kei hi.

³Amaute in Pasian kiang pana hong pai thumaanna thei lo uh a, amau thu-a phuaktawm nuam uh ahi manin Pasian thumaanna ah a ki-ap kei uh hi.

⁴A um peuhmah in thumaanna a ngah theih nadingin thukham tawpna Christ ahi hi.

⁵Moses in thukham hanga kingah thumaanna a genna ah: "Hih nate a sem mi in hihte hangin a nungta ding hi." f[54] ci hi.

⁶Ahi hangin upna hanga kingah thumaanna in: "Na lungsim sungah, ‘Vantung ah kua kahto ding hiam?’ ci kei in." g[55] (tua pan Christ lasuk ding cihnopna)

⁷cih ahi zongin, "‘A thuk sungah kua kumsuk ding hiam? h[56] (tua pen misi panin Christ lato ding cihnopna) ci kei in," ci hi.

⁸Ahi hangin tua in bang gen ahi hiam? "Na kiangah thu om hi. Tua thu na kam sung le na lungtang sungah a om hi," i[57] ci hi. Kote tangko upnathu ahih le:

⁹"Note in na kam uh tawh, ‘Jesu in Topa hi,’ ci-in pulaka, Pasian in amah misi pan thokiksak zo hi, ci-a na lungtang sung uhah na up uh leh note hong kihonkhia ding hi, cih upna thu ahi hi.

¹⁰Ahang in, na lungtang uh tawh umin dik na tang uh a, na kam uh tawh pulakin note hong kihonkhia hi.

¹¹Laisiangtho in: "Amah a muang peuh mah a kimaizumsak ngei kei ding hi," j[58] ci hi.

¹²Ahang in, Jew-te le Gentile-te kikal ah kilamdanna bangmah a om kei hi. Tua Topa mah mite khempeuh Topa hi-a ama tungah a kote khempeuh kicingtakin thupha a pia hi.

¹³Ahang in, "Topa min a sam peuhmah kihonkhia ding hi," k[59] ci hi.

¹⁴Tua ahileh amaute in amau uplohpa bangci sap theih ding uh hiam? Tua ciangin amaute in a thu a zak ngei lohpa uh bangci up thei ding uh ahi hiam? Amaute kiangah a hilh khatpeuh om kei leh bangci zak theih ding uh ahi hiam?

¹⁵A kisawl kei leh amaute in bangci hilh theih ding uh ahi hiam? A kigelhsa bangin: "Lungdamna thu a puakte khe etlawm mahmah si e!" l[60]

¹⁶Ahi hangin Israel mite khempeuh in lungdamna thuthak a sang kim kei uh hi. Tua hangin, Isaiah in, "Topa aw, kote thupuak a um kua om ahi hiam?" m[61] a na ci hi.

¹⁷Tua bang ditdetin, tua thupuak zakna panin upna pianga, Christ thu tungtawnin tua thupuak a kiza hi.

¹⁸Ahi hangin amaute in za lo uh ahi hiam, cih kong dong hi. Za tham uh hi: "Amaute aw in leitung khempeuh zel khin zo-a, a kammalte un leimongte ban khin zo hi." n[62]

¹⁹Israel-te in thei lo uh ahi hiam, cih kong dong leuleu hi. A masa penin Moses in: "Minam ahi lote eng dingin note kong bawl ding hi; theihna a nei lo minamte in note hong hehsak dingin ka bawl ding hi." o[63] na ci hi.

²⁰Tua ciangin Isaiah in hangtakin, "Keimah hong zong lote in hong mu zo uh hi; keimah hong kan lote tungah kei le kei ka kilaak zo hi." a[64] na ci hi.

²¹Ahi hangin amah in Israel tawh kisai-in, "Thumang lo le paupeng mite lamah sun nilohin ka khut ka zan hi" b[65] na ci hi.