Read Zokam Rome-te 11 Bible Online

Rome-te 11 - Zokam bible

Rome-te 11

¹Tua ahileh, Pasian in ama mite nolh ahi hiam, cih kong dong hi. A nolh peuhmah kei hi! Kei mahmah zong Abraham suan ahi Benjamin beh pana Israel mi khat mah ka hi hi.

²Pasian in a theihkholhsa ama mite a nolh kei hi. Elijah in Israel-te langpanin Pasian tungah a hekna Laisiangtho gen thei ngei lo na hi uh hiam?

³"Topa aw, amaute in na kamsangte that zo uh a, na biakna-taute a phelkhia zo uh hi. Kei kia bek ka om lai-a, amaute in kei thah hong sawm uh hi," c[66] ci hi.

⁴Tua ciangin ama tungah Pasian dawnna bang ahi hiam? "Keima ading Baal mai-ah a khukdin lo mi tul sagih ka siit khin zo hi," d[67]

⁵Tua hunmah bangin tuhun laitakin zong hehpihna hanga teelsa a baanglaite a om hi.

⁶Tua hi-a hehpihna hang ahileh sepna hang hi nawn lo hi; sepna hang hi, hileh hepihna pen hehpihna e[68] ahi nawn kei ding hi.

⁷Tua ahileh bang ahi hiam? Israel-te in kuhkaltaka a zon uh mu lo uh a, ahi hangin a teelte in a ngah zo uh hi. Adangte kisak sak lai-a,

⁸hih-a kigelh bang ahi hi: "Pasian in tuni tektek dong, amawk lungsim ahi zongin, a mu thei lo mittang ahi zongin a za thei lo bil ahi zongin, amaute a pia hi." f[69]

⁹David in zong: "Amaute adingin a sabuai uh thangzak le tehlop suak henla, muktukna le gawina suak ta hen.

¹⁰Amaute in a muh theih loh nadingun a mitte uh mial henla, a nungte uh kul tawntungta hen." g[70] a na ci hi.

¹¹Amaute a tho kik zo nawn lo dingin muktu uh ahi hiam, cih kong dong kik leuleu hi. Ahi peuhmah kei hi! Amaute tatkhialhna hangin Israel-te in Gentile-te a en nadingun hotkhiatna thu Gentile-te tungah tung zawsop hi.

¹²Ahi hangin amaute tatkhialhna hangin leitung mite adingin hauhna suaka, amaute supna Gentile-te adingin hauhna suak ahileh amaute kicinna in bangzah a lianzaw hauhna a tunzaw tazen tam!

¹³No Gentile-te tunga thugen ka hi hi. Gentile-te adinga keimah sawltakpi ka hina tawh,

¹⁴ka mipihte in note hong eng-a pawlkhat ka hotkhiat theih nading lametna tawh keima mipihte a phawng dingin nakpi-in na ka sem hi.

¹⁵Ahang in, amaute a kinolhna leitung mite kilemkikna hi ahileh amaute a kisanna, sihna panin hinna lo bang dang hi ding hiam?

¹⁶Gahmasa banga kipia buhnel mekman them khat siangtho ahileh a lom bitin zong a siangtho hi; azung a siantho leh ahiangte zong a siangtho hi.

¹⁷Tua hiangte pawlkhat kitankhia-in gamlak olive dawng khat ahi nang, tuate tungah hong kipeh a, olive tung pan hong pai khanna tui dawn khawm na hileh,

¹⁸tua a kitankhiasa hiangte tungah na kisial kei in. Tua banga na kisialh leh hih thu na ngaihsun in: Nang in azung na vak kei-a azung in nang hong vak zaw hi.

¹⁹Tua ahileh, "Kei hong kipeh theih nadingin hiangte kitankhia hi," na ci kha ding hi.

²⁰Himah hi. Ahi hangin amaute uplahna hangin amaute a kitankhia hizaw a, nang na upna hanga ding na hi hi. Kisathei kei inla lau zaw in.

²¹Tua hi-a Pasian in pianngei hiangte hawi lo ahileh nang zong hong hawi tuan kei ding hi.

²²Tua ahi manin Pasian migitna le ama thukhauhna; a pukte tungah a thukhauhna le ama migitna sunga na kip den nak leh nang tunga a migitnate ngaihsun in. Ama migitna sunga na kip den kei leh nang zong hong kisattan ding hi.

²³Amaute amau uplahna sungah a kohkan kei nak uh leh Pasian in amaute peh kik thei ahi manin amaute zong a kipeh ding hi.

²⁴A tawpna ah, pianngei-a gamlak olive kung ahi nang, hong satkhia-in pianngei tawh kilehbulhin a kicing olive kung tungah hong kipeh ahileh, hih pianngei hianga amau menkhiatna olive kung tunga peh ding baihzaw tham lo ding ahi hiam?

²⁵Sanggamte aw, note na kimisak loh nadingun; a lut ding zah a lut kim khit mateng Israel-te khenkhat lungkhauh tadih ding uh hi, cih thuthuk na theih loh ding uh ka deih kei hi.

²⁶Tua hi-a: "Zion panin tanpa hong pai ding hi; amah in Jacob panin pasian-milohna a hemkhia ding hi.

²⁷Tuateh amaute mawhnate a kilakkhiat ciangin amaute tawh ka thukhun hih ahi h[71] hi." i[72] ci-a kigelh bangin Israel-te khempeuh kihonkhia ding hi.

²⁸Lungdamna-thu tawh kisai-in ahileh note hangin amaute gal ahi uh hi. Ahi hangin teelna tawh kisai-in ahileh pubulte hangin amaute, itte ahi uh hi.

²⁹Ahang in, Pasian letsongte le ama hong sapnate a kidok kik thei kei hi.

³⁰Amaute thu manlohna hangin hun khat lai-a Pasian thu a mang lo note in, tu-in lainatna na ngah uh mah bangin

³¹Pasian in note hong lainat bangin amaute in zong tu-in j[73] lainatna a ngah theih nadingun amaute zong tu-in thumang lote a suak uh hi.

³²Ahang in, Pasian in mi khempeuh tungah lainatna a neih theih nadingin thumanlohna ah mi khempeuh a hencip hi.

³³Aw, Pasian in pilna le theihna a hauh a[74] zia thuk na mahmah e! Ama thukhennate telzawh hi lo a, ama lampite sulkan zawh ding hi peuhmah lo hi!

³⁴"Topa lungsim kua in thei a, ahikeh a thudotpa kua hiam? b[75]

³⁵"Pasian thukkik dingin Pasian tungah kua’n pia ngei ahi hiam?" c[76]

³⁶Ahang in, nate khempeuh, ama kiang pan le ama tung pan le ama aa ahi hi. Amah in minthanna ngah tawntung ta hen! Amen.