Read Zokam Rome-te 13 Bible Online

Rome-te 13 - Zokam bible

Rome-te 13

¹Pasian piaksate longal in thuneihna nei lo uh ahi manin mi khempeuh in a ukte thu a mang pelmawh ding uh hi. Tu laitaka thuneite thuneihna Pasian piaksa ahi hi.

²Tua bang diudeu-in thuneite a langdote, Pasian phuh kipsate a langdo ahi hi. Tua banga a langdote thukhenna kithuaksak ding hi.

³Ahang in, a khiala gamtate adingin, gam-ukte lauhuai bek a, amaan-a gamtate adingin a lauhuai kei hi. Thunei mi khat na kihtakna panin na suakta nuam hiam? Na suahtak nop leh amaanin gamta lecin amah in nang hong phat ding hi.

⁴Ahang in, nang tunga a hoih sem dingin amah Pasian nasempa ahi hi. Ahi hangin asia-a na gamtat leh lauthawng in; amah in a mawkna-in namsau a tawi kei hi. Amah, Pasian nasem hi-a, asia-a gamtate tungah thangpaihna ahi gawtna a tungsak dinga kisawlsawn ahi hi.

⁵Tua ahi manin gawtna thuak khak ding hang bek hi loin, sia le pha khentheihna hangin zong thuneite thu man ding ahi hi.

⁶Thuneite, hunbit a gam-uk Pasian ading nasemte ahi manin hih thu hangin zong siah na pia uh hi.

⁷Mi khempeuh tungah na bat bangun na pia un. Siah piak dingte siah na pia un; mangmu piak dingte mangmu na pia un; zahtak dingte na zahtak un; pahtawi dingte na pahtawi un.

⁸Khat le khat ki-it den ding leiba pen longal kuamah na kibasak kei un, ahang in, ama mipih a it mi in thukham tangtun ahi hi.

⁹"Angkawm kei in" "Tual that kei in" "Gu kei in" "Deihgawh kei in" i[82] kici thupiakte le thupiak dang a om peuhpeuh "Nang le nang na ki-it bangin na vengpa it in," j[83] kici zuihtawm ngeina in huam khin hi.

¹⁰Itna in a vengpa a nasak kei hi. Tua ahi manin itna pen thukham tangtunna ahi hi.

¹¹Tu lai hun theitelin hih na nasem un. A tunga i up sangin eite hotkhiatna tu-in naizaw ahi manin na ihmutna panun khanlawh hun tung ta hi.

¹²Zan bei dektak hi; sun hong tung dektak hi. Tua ahi ciangin khuamial gamtatnate paikhia-in khuavak galvante silh ni.

¹³Zu uang dawnna, zukhamna, numei-pasal paktatna le hukna lanna, kilungkimlohna le hazatnate sem loin sun huna i tat bangin eite a kilawmin gamta ni.

¹⁴Mawh dim pianngei a[84] lunggulhnate ngaihsun kei unla Topa Jesu Christ na silh zaw un.