Read Zokam Rome-te 14 Bible Online

Rome-te 14 - Zokam bible

Rome-te 14

¹Kisel theihna thute tawh kisai-in upna thanemte mawhpaih pah kei unla, na sang zaw un.

²Mi khat in a upna tawh kituakin an khempeuh ne thei hi. Ahi hangin upna thanem midang khat in anteh singgah bek a ne hi. Pasian in amah sang khin ahi manin,

³nek theih khempeuh a nepa in a ne lopa neu-et kei hen. Nek theih khempeuh a ne kim lopa in a nepa mawhpaih kei hen.

⁴Midang khatpeuh nasempa tungah thu khen dingin nang kua na hi hiam? Tua nasempa a pu thu-in a ding thei a puk thei hi. Topa in amah dingsak thei ahi manin amah a ding ding hi.

⁵Mi khat in ni khat sangin ni dang khat a siangtho zaw in ngaihsun hi. Adang khat in ni khempeuh a kibangin ngaihsun hi. Mi khempeuh in ama lungsima a kipsan bang hi ding hi.

⁶Ni khatpeuh a thupi tuan a sapa in Topa hangin thupi a sa hi. Sa nepa in Pasian tungah lungdam ko ahi manin Topa hangin a ne ahi hi. Sa tangpa in Pasian tungah lungdam ko ahi manin Topa hangin a tang ahi hi.

⁷Ahang in, mi kuamah ama ading beka nungta hi loin, a si kuamah in ama ading bekin a si kei hi.

⁸Eite i nuntak leh Topa adinga nungta i hi hi; eite i sih leh Topa adinga si i hi hi. tua ahi ciangin eite i si-a i hing zongin Topa aa i hi hi.

⁹Ahang in, hih thu hang mahmahin a site le a hingte Topa aa ahikhawm theih nadingin Christ si-a tua ciangin nungta kik hi.

¹⁰Tua ahileh bang hangin na sanggampa tungah thu khen na hi hiam? Ahikeh bang hangin na sanggampa neu-et na hi hiam? Ahang in, eite khempeuh Pasian thukhenna tokhom mai-ah i ding kim ding hi.

¹¹"Topa in,’Ka nuntakna ka lo hi, ka mai-ah mi khempeuh khukdin ding uh a, Pasian tungah leii khempeuh in a pulak ding uh hi,’ ci hi," b[85] ci-in kigelh hi.

¹²Tua ahi tak ciangin eite khempeuh in Pasian tungah eima thu tek i gen ciat ding hi.

¹³Tua ahi manin eite khat le khat thu kikhen nawn kei ni. Tua sangsikin na sanggampa lampi ah muktukna suang, a dongkholh na ahi zongin a koih lo dingin na lungsim uh khensat un.

¹⁴Topa Jesu sunga om mi khat ka hina tawh an c[86] peuhmah asiang lo khat beek a om kei hi, cih ka kipsan mahmah hi. Ahi hangin mi khatpeuh in na pawlkhat siang lo a sak leh ama adingin a siang lo ahi hi.

¹⁵Na nek khatpeuh hangin na sanggampa a lungdon leh itna sunga gamta na hi nawn kei hi. Ama adinga zong Christ a si na sanggampa a lungdon leh itna sungah gamta na hi nawn kei hi. Na nekna hangin ama adingin zong Christ a si na sanggampa, siasak kei in.

¹⁶A hoiha na ngaihsutte a sia banga a kigen ding phal kei in.

¹⁷Ahang in, Pasian gam pen nekna le dawnna thu hi loin, Khasiangtho sunga thumaanna, lemna le lungnopna ahi hi.

¹⁸Bang hang hiam cihleh hih banga Christ na a sem peuhmah in Pasian lungkimsak a, mite in zong a thukimpih uh hi.

¹⁹Tua ahi manin kilemna le khat le khat kihansuahna sungah hong tun ding na i sep nadingin hanciam theih tawpin hanciam ni.

²⁰An hangin Pasian nasepna susia kei un. An khempeuh asiang ahi hi. Ahi hangin mi khatpeuh a muktusak dinga na khatpeuh a ne mi a khial ahi hi.

²¹Na sanggampa pukna a piangsak ding sa nek loh ding ahi zongin, zu dawn loh ding ahi zongin, khat peuhpeuh hih loh ding ahi zongin hoihzaw hi.

²²Tua ahi ciangin hih nate tawh kisai-in na up peuhpeuh nang le Pasian kikal thu hisak in. Amah in maan a sak nate hangin amah le amah a kimawhpaih lo mipa, thupha ngah ahi hi.

²³Ahi hangin lunghei neihna a neipa in a nek leh amah a kimawhpaih ahi hi. Ahang in, ama nekna upna pan ahi kei hi. Tua hi-a upna pana hong pai lo khempeuh mawhna ahi hi.