Read Zokam Rome-te 16 Bible Online

Rome-te 16 - Zokam bible

Rome-te 16

¹Cenchrea pawlpi a nasem f[94] i sanggamnu Phoebe note tungah apin ka phat hi.

²Amah, kei-a kipan mi tampi a huh mahmah khat ahi manin huhna a kisap peuhpeuh na piak ding uh le misiangte hih dinga kilawm bangin amah Topa sungah na san dingun kong thum hi.

³Christ Jesu sunga ka naseppihte Priscilla g[95] le Aquila, na hohpihsak un.

⁴Amaute in kei adingin a luang uh a kham ngam khin uh hi. Kei bek hi loin Gentile-te pawlpi khempeuh zong amau tungah a lungdam uh hi.

⁵Amau inn a kikhawm pawlpi teng zong na hopihsak un. Asia gama Christ ah a kikhel masapen, ka lawm it Epenetus, na hopihsak un.

⁶Note adingin na a sem Mary, na hopihsak un.

⁷Kei tawh thong kiakhawm ka tanau Andronicus le Junias, na hopihsak un. Amaute sawltakpi lakah kikhaituam uh a, tua ciangin amaute Christ sunga ka om ma-in a na om khinte ahi uh hi.

⁸Topa sunga ka it Ampliatus, na hopihsak un.

⁹Christ sunga ka naseppih uh Urbanus le ka lawm it Stachys, na hopihsak un.

¹⁰Christ sungah kizia-eta, a kisang Apelles, na hopihsak un. Aristobulus bangkua sunga om teng, na hopihsak un.

¹¹Ka tanau Herodion, na hopihsak un. Topa sunga om Narcissus bangkua sunga omte, na hopihsak un.

¹²Topa sunga nasep hahkat numeite Tryphena le Tryphosa, na hopihsak un. Topa sunga nasep a na hahkat mahmah numei dang khat ka lawm it Persis, na hopihsak un.

¹³Topa sunga teltuamsa Rufus le kei zong nu-a ka neih ama nu zong na hopihsak un.

¹⁴Asyncritus, Phlegon, Hermes, Patrobas, Hermes le amau tawh a omkhawm sanggamte, na hopihsak un.

¹⁵Philologus, Julia, Nereus le a sanggamnu, le Olympas le amaute tawh a omkhawm misiangte khempeuh na hopihsak un.

¹⁶A siangtho kinapna tawh note khat le khat na kihopih un. Christ pawlpite khempeuh in hong hopih uh hi.

¹⁷Sanggamte aw, na sansa uh thuhilhna tawh kilehbulh, na lampi uh hong dongkhaksakin na kipawl khen nading uh a bawlte panin na kidawm un, ci-in kong kun hi. Amaute kiang pan na kihemkhia un.

¹⁸Ahang in, tua bang mite i Topa Christ nasem hi loin amau ankam lim nading bek a sem ahi uh hi. Amaute in kamzolna le mi maitang phatna tawh mi melmawlte lungsim a khem uh hi.

¹⁹Mi khempeuh in na thumannate uh a za zo uh hi. Tua ahi ciangin note tungah lungdamna tawh ka kidim hi. Ahi hangin thu hoih lamsangah note na pilvang unla, asia lamsangah mawhpengin na om un.

²⁰Lemna Pasian in note khepek nuai-ah Satan a sikpek hak nawn kei ding hi. Eite Topa Jesu hehpihna note tawh om ta hen.

²¹Ka naseppih Timothy in hong hopihna note hong khak hi. Tua mah bangin ka tanaute, Lucius, Jason le Sosipater-te in zong hong khak uh hi.

²²Hih laikhak a gelhkhia keimah Tertius in Topa sungah note kong hopih hi.

²³Hih lai-a om pawlpi bup le keimah in a zindona nuam ka sak uh Gaius in note hong hopihna hong khak hi. Khuapi sung tang nasep ukpa, Erastus le i sanggampa Quartus-te in hong hopihna uh hong khak uh hi. a[96]

²⁴Eite Topa Jesu Christ hehpihna note khempeuh tawh omkhawm ta hen. Amen.

²⁵Tu-in khanghun sawtpi sung a kiselcip thuthuk kilaakkhiatna tawh kizui-a ka hilh lungdamna-thu le Jesu Christ kitangkona tawh note hong kipsak zopa -

²⁶tua thuthuk tu-in kilaak khin a, minam khempeuh in um-a a thu a man theih nadingun tawntung Pasian thupiakna tawh kamsangte’ laigelhte tungtawnin kitheisak khin hi -

²⁷Jesu Christ tungtawnin tua a pil Pasian khat bek tungah minthanna om tawntung ta hen. Amen.