Read Zokam Rome-te 2 Bible Online

Rome-te 2 - Zokam bible

Rome-te 2

¹Tua ahi ciangin midangte tunga na thukhenna mun mah ah nangmah a kimawhpaih na hih manin midang khatpeuh tunga thukhen nang in paulap ding na nei kei hi. Bang hang hiam cih leh nang a thukhenpa mah in tuate mah na hih hi.

²Tua banga hihte tunga Pasian thukhenna in thutak pansan hi, cih i thei ciat hi.

³Tua ahi ciangin mihing lel ahi nang in amaute tungah thu khen napi amau hihte mah na hih ciangin Pasian thukhenna pan a suakta dingin na kingaisun hiam?

⁴Ahikeh Pasian migitna in kisikna lamah nang hong pi lam phawk loin a kicing ama migitna, a thuakzawhna le a lungduainate simmawh na hi hiam?

⁵Ahi hangin na lungkhauhna le na kisik theihlohna lungtang hangin Pasian thukhenna maan a kilaak hun ahi Pasian’ thangpaihna ni adingin nang le nang tungah thangpaihna a khol na hi hi.

⁶Pasian in "Mi khempeuh amau gamtatsa bangin a pia ciat ding hi." a[5]

⁷A hoih gamtat denna tawh minthanna pahtawina le sihtheih nawnlohna a zongte tungah, amah in nuntak tawntungna a pia ding hi.

⁸Ahi hangin ama angsung bek khuala, thutak nialin gitlohna a zuite adingin thangpaihna le hehna a om ding hi.

⁹Gilo a gamta mihing khempeuh, a masa in Jew-te tua ciangin Gentile-te tungah lungmanna le lungdonna a tung ding hi.

¹⁰Ahi hangin a hoiha gamtate khempeuh, a masa in Jew-te tua ciangin Gentile-te tungah minthanna pahtawina le lemna a tung ding hi.

¹¹Ahang in, Pasian in angvan tuam nei lo hi.

¹²Thukham pualama mawhte khempeuh, thukham pua mah ah mangthang ding uh a, thukham nuai-a mawhte khempeuh thukham pansan in thu a khen ding hi.

¹³Ahang in, Pasian muhna ah thukham a zate a thumaan hi loin thukham a mangte a thumaanin kipulak ding hi.

¹⁴(A taktak in thukham nei Gentile-te in amau pianngei, ngeina pana thukham in a kalh nate a hih uh ciangin amaute in thukham nei lo napi, amau adingin tuate thukham suak ahi khit nungsang,

¹⁵thukham in a kalhte amau lungtang ah kigelh hi, cih amau mah in kilangsak uh a, amau kitheihna lungsim in teci pang ahi manin a ngaisutnate un amaute a mawhsak a diksak thei zel hi.)

¹⁶Keima hilh lungdamna-thu in a pulakkhiat mah bangin Pasian in Jesu Christ tungtawna mi hingte’ thusimte a khen ni ciangin hih thu a tung ding hi.

¹⁷Tu-in nang le nang Jew mi kici na hileh; thukham tungah kinga a, Pasian tawh na kizopna kisialhpih na hileh;

¹⁸thukham in nang lam hong lah manin ama deihna thei-a a thupizaw nate a paktapa na hileh;

¹⁹mittaw lampipa, khuamial sunga omte adinga khuavakpa

²⁰mihaite lamlakpa le naupangnote a hilhpa, theihna le thutak kiguanna thukham nei kici na hileh;

²¹nang, midangte a hilhpa, nang le nang kihilh lo maw? Midangte guta lo dinga a hilh nang guta maw?

²²Nang mite angkawm lo dinga a hilhpa nang angkawm maw? Nang milim a kihpa nang biakinnpi luh maw?

²³Thukham kisialhpihpa aw, nang, thukham palsatna tawh Pasian daisak maw?

²⁴A kigelhsa mah bangin: "Note hangin Gentile-te lakah Pasian min kigendai hi." b[6]

²⁵Thukham na zuih uh leh vunat in man a nei hi. Ahi hangin thukham na palsat uh leh vunat loh mah na suak uh hi.

²⁶Vunat lo mite in thukham in a kalhte a zuih uh leh amaute vunat bangin kisim lo ding ahi hiam?

²⁷Taksa-a vunat lo napi, thukham a zui mi in, ngeina-bucing gelhsa nei c[7] a, vunat napi thukham palsatpa nang, hong mawhpaih ding hi.

²⁸A pualam Jew mi hihna bek tawh mi khatpeuh Jew mi a suak hi lo hi. Pualam le taksa-a vunatna lel tawh, vunat a kisuak tuan kei hi.

²⁹Ahi peuhmah kei hi. A sunglam Jew mi hihna bek tawh mi khatpeuh Jew mi a suak hi-a tua mah bangin vunatna in gelhsa ngeina bucing tawh hi lo, Kha tawh lungtanga vunatna ahi hi. Tua bang mipa, mite in a phat loh uh hangin Pasian in a phat hi.