Read Zokam Rome-te 3 Bible Online

Rome-te 3 - Zokam bible

Rome-te 3

¹Tua a hileh Jew mi hina hangin bang phattuamna oma, vunat mi suahna in bang man nei ahi hiam?

²Lam khempeuh ah phattuamna a nei kim hi. A masa penin amaute tungah Pasian kammalte tektek a kikemsak khinsa ahi hi.

³Mi kimkhat in upna nei kei leh bangci ding? Amau uplahna in Pasian muan huaina a guaksuaksak ding hiam? A guaksuaksak peuhmah kei hi!

⁴Mi khempeuh zuau gen hi henla, Pasian a thutak hi ta hen. "Na thukhenna-a na zawhna le na kammal-a na thumaanna a kilat theih nading ahi hi," a[8] ci-a kigelhsa bang ahi hi.

⁵Ahi hangin eite thumaanlohna in Pasian thumaanna siangtakin kilangsak zaw ahileh bang i gen ding hiam? Eite tungah Pasian thangpaihna hong tun manin Pasian thutang lo hi, i ci ding hiam? (Mihing pansante mah zanga sel ka hi hi.)

⁶Ahi peuhmah kei hi! Tua bang hi mawk leh Pasian in leitung mite tungah thu bangci khen theih ding hiam?

⁷"Keima zuau theihna in Pasian thutakna liansak zaw a, ama minthanna khangsak ahileh bang hangin kei mawh nei mi khat bangin hong kimawhpaih lai ahi hiam," mi khatpeuh in ci kha thei ding hi.

⁸Mi kimkhat in, "‘A hoih pian nadingin a sia bawl ni,’ ci uh hi," ci-in hong gendai a, hong mawhmat uh bangin, bang hanga ci lel lo i hi hiam? Amaute in a kilawm bang mawhpaihna a thuak ding uh hi.

⁹Tua ahileh thu bangci khup ding i hi hiam? Eite i hoihzaw tuan hiam? b[9] I hoihzaw tuan peuhmah kei hi! Jew-te le Gentile-te khempeuh mawhna nuai-ah a kibangin om khin uh hi, i ci khin hi.

¹⁰"Mi thumaan khat beek a om kei hi, khat nangawn a om kei hi;

¹¹a theitel kuamah om lo a, Pasian a zong khat beek a om kei hi.

¹²A vekpi un lampial khin uh a, amaute a vekpi un kimanna a nei kei uh hi: a hoiha gamta kuamah om lo a, khat nangawn om lo hi," c[10]

¹³"Amau gawlte hankhuk kihongsa hi-a, amaute leii in zuauthu a gen hi." d[11] Amaute muk ah mualtan gu a om hi." e[12]

¹⁴"Amaute kam, hamsia le kamkhaa tawh a dim hi." f[13]

¹⁵Amaute khe sisan luangsak dingin manlang hi.

¹⁶Amaute paina peuhpeuh siatna le gentheihna dima,

¹⁷amaute in kilemna lampi a thei kei uh hi." g[14]

¹⁸"Amaute mit ah Pasian kihtakna a om kei hi." h[15] ci-a kigelhsa bang ahi hi.

¹⁹Kam khatpeuh a kisipsak nading le leitung mi khempeuh in Pasian mai-ah sittelna a thuak nadingin thukham in a gen khempeuh thukham nuai-a omte tunga a gen ahilam tu-in eite in i thei hi.

²⁰Tua ahi manin ama muhna ah thukham zuihna hangin kuamah thumaanin a kiseh kei ding hi; tua hi lo zaw in thukham tungtawnin mawhna i phawk hi.

²¹Ahi hangin tu-in thukham tawh kisai kha lo, Thukham le Kamsangte in teci a pansa uh Pasian kiang pana hong pai thumaanna, kitheisak khin ta hi.

²²Pasian kiang pana hong pai hih thumaanna Jesu Christ upna tungtawnin a umte khempeuh tungah a tung hi. A kilamdanna a om kei hi.

²³Ahang in, mi khempeuh mawh khin a, Pasian minthanna ngah zo loin,

²⁴Christ Jesu hanga hong pai tatkhiatna tungtawnin, ama hehpihna hangin a khawnkhonga diktansak ahi uh hi.

²⁵Ama sisan upna tungtawnin thoihdamna-a biakpiakna-in Pasian in amah hong pia hi. i[16] Amah thutanna a lahkhiat nadingin hih banga a hih ahi hi. Bang hang hiam cih leh amah in a thuakzawhna hangin nidang lai-a mawhnate gawt loin hawi lai-a,

²⁶tu-in amah thutang ahi ding le Jesu sunga upna a ngah midik a tangsakpa ahi lai dingin a thutangna hih bangin a lak hi.

²⁷Tua ahileh kisialhna koi-ah a om hiam? A kipuaseh zo hi. Bang thu siksan in? Thukham zuihna hang maw? Hi lo hi. Upna hang ahi hi.

²⁸Ahang in, mi khatin thukham zuihna hang hi lo upna hangin dik a tang hi cih i kiplet hi.

²⁹Pasian, Jew-te bek Pasian ahi hiam? Gentile-te Pasian zong hi lo hiam? Hi mah hi.

³⁰Vunatte amau upna hangin midik tangsak dinga, tua upna mah tungtawnin vunat lote, dik a tangsak ding Pasian khat bek om ahi nungsang amah, Gentile-te Pasian zong ahi hi.

³¹Tua hileh hih upna tawh eite in thukham guaksuaksak i hi hiam? A hi peuhmah kei hi! Tua hi lo zaw in eite in thukham i kipsak hi.