Read Zokam Rome-te 4 Bible Online

Rome-te 4 - Zokam bible

Rome-te 4

¹Tua ahileh i pu Abraham in hih thu ah bang mukhia ci ding i hi hiam?

²A taktak in, Abraham in a sepsa hangin diktang hileh amah in kisialh nading a nei hi - ahi hangin Pasian mai-ah ahi kei hi.

³Laisiangtho in bang ci ahi hiam? "Abraham in Pasian na uma, tua ama upna thumaanna in kisimsak hi," j[17] ci hi.

⁴Mi khat in na a sep ciangin tua ama nasep thaman pen letsong in kisim lo-a, thalawhsa in kisim hi.

⁵Ahi hang in na sem lo a, mi tatsiate dik a tangsak Pasian a muang mipa ama upna pen thumaanna-in kisim hi.

⁶Sepnate tawh kisai lo, Pasian in thumaan hi, ci-a a sim mipa thupha ngahna thu David in a gen lai-in tua mah a na gen ahi hi. A gen na ah:

⁷"A tatkhialhnate uh kimaisak a, a mawhnate uh a kikhuhsakte, thupha ngah ahi uh hi.

⁸Topa in ama langah a mawhna mawhna-a a simsak lohpa thupha ngah ahi hi." a[18] a na ci hi.

⁹Hih thupha vunatte ading bek ahi hiam? Vunat lote ading zong hi lo ahi hiam? Abraham upna ama adingin thumaanna in kisim khin hi, cih i gengen lai hi.

¹⁰A bangci dana kisim ahi hiam? A vunat khit ciang ahi hiam? A at ma ahi hiam? A at khit hi lo, a at ma ahi hi!

¹¹Vunat ahi nai loh lai-a upna hanga a ngah thumaanna ciamteh nadingin vunat ciamtehna a ngah hizaw hi. Tua ahi ciangin amau adinga thumaanna-a a kisimsak theih nadingin vunat lo napi-a a umte khempeuh pa hong suak hi.

¹²Amah vunat bek hi lo, i pa Abraham in a vunat ma-a, a neih upna khekhap a zui vunatte pa zong ahi hi.

¹³Leitung luahpa ahi nadingin kam ciam, Abraham le a suan a khakte in a ngahna uh thukham tungtawn hi loin upna hanga hong piang thumaanna tungtawn hizaw hi.

¹⁴Ahang in, thukham suanga nungtate gouluahte hi ahi uh leh upna in man nei lo a, tua kamciam in zong kimanna a nei kei hi.

¹⁵Bang hang hiam cih leh thukham in thangpaihna a tun hi. Tua hi-a thukham om lohna ah tatkhialhna zong a om kei hi.

¹⁶Tua ahi manin tua kamciam hehpihna hang ahi theih nading le thukham suangte hi loin Abraham upna bang upna a suangte ahi ama suan le khakte khempeuh tungah thukho ahi theih nadingin upna hanga hong tung ahi hi. Amah, eite khempeuh pa ahi hi.

¹⁷"Nang minam tampite pa kong suaksak khin zo hi." b[19] ci-a kigelhsa bang ahi hi. Amah a site nuntakna pia-a a om lopi nangawn a omsa banga a genpa, a uppa Pasian muhna ah eite pa ahi hi.

¹⁸"Tua mah bangin na suan na khakte zong ahi ding hi," c[20] ci-a ama tunga kigensa bangin Abraham in lamet nading om lo napi lamen in um ahi manin minam tampite pa a suak hi.

¹⁹Amah a khan kum zakhat bang pha ta a, ama pumpi a si tawh kibang ahina le Sarah sul zong a keu ahina thu upna kiam tuan loin a maituah hi.

²⁰Tua hi napi Pasian kamciam tawh kisai-in uplahna hangin hoi lo, a upna khauhzawin Pasian minthanna apia zo hi.

²¹Pasian in a kamciam banga a tang tunsak theih nading vang a neihna thu, kiptakin a sang hi.

²²"Ama adingin thumaanna in kisim hi," cih hih thu hang ahi hi.

²³"Ama adingin kisim hi," cih kammalte amah guak ading bek hi lo a,

²⁴i Topa Jesu misi pana a thosakpa Pasian in thumaanna-a a simsak ding a um eite adingin zong a kigelh ahi hi.

²⁵Eite mawhna hangin amah sihna sungah kipiakhia a, diktansakna i ngah nadingin kihing kiksak hi.