Read Zokam Rome-te 5 Bible Online

Rome-te 5 - Zokam bible

Rome-te 5

¹Tua ahi manin upna tungtawnin diktansak i hi khit nungsang eite d[21] Topa Jesu Christ tungtawnin Pasian tawh i kilem hi.

²Ama tungtawnin upna hangin tu-a i omna hehpihna sungah lut theihna i ngah hi. Tua hi a, Pasian minthanna lametna sungah eite i nuam hi. e[22]

³Tua bek tham lo i thuakna ah zong i nuam hi. f[23] Bang hang hiam cih leh thuakna in thuakzawhna a piangsak hi;

⁴thuak zawhna in nundan piangsak a, nundan in lametna piangsak ahilam eite in i thei hi.

⁵Pasian in eite hong piak Khasiangtho tawh i lungsungah ama hong itna hong sungkhia khinta ahi manin lametna in eite hong lungkiasak kei hi.

⁶Vangliatna i neih loh lai, a hun laitak lianin pasian-milote ading Christ hong si hi, cih na thei hi.

⁷Mi hoih adingin a singam a om kha mawh kei ding hi; ahi zongin mi thumaan khat adingin a singam kuamah a om khol kei ding hi.

⁸Ahi hangin Pasian in eite hong it takpina hih bangin hong lak hi: Eite mawhnei i hi laitakin eite adingin Christ a si hi.

⁹Tu-in ama sisan hangin diktansak i hi khit nungsang, ama tungtawnin Pasian thangpaihna pan honkhiat in i om zawsem ding hi!

¹⁰Pasian gal i hi laitakin, ama Tapa sihna tungtawnin eite amah tawh hong kilemkiksak ahileh tua banga kilem khinsate ama hinna tungtawnin hotkhiat in i om zawsem ding hi!

¹¹Tua bek tham loin ama tungtawna kilemkikna i ngahna pa i Topa Jesu Christ tungtawnin Pasian sungah i nuam hi.

¹²Tua ahi manin mi khat tungtawnin leitungah mawhna a lut bang tektekin mawhna tungtawnin sihna lut-a mi khempeuh mawh khin zo ahi manin mi khempeuh tungah sihna a tung hi.

¹³Ahang in, thukham a kipiak ma-in leitungah mawhna na om zo hi. Ahi hangin thukham a om loh ciangin mawhna pen mawhna-in a kisim kei hi.

¹⁴Tua hi napi, Adam hun pan Moses hun dong Adam palsat banga thupiak palsatna hanga a khial tektek lote nangawn tungah sihna in a uk hi. Adam pen hong tung ding pa lahna ahi hi.

¹⁵Ahi hangin letsong pen thupalsatna tawh a kibang kei hi. Ahang in, tua mi khat thupalsatna hangin mi tampi si ahileh, Pasian hehpihna le mi khat mah ahi Jesu Christ hehpihna hanga hong tung tua letsong, mi tampi tungah dimlet zawsem hi!

¹⁶Tua ciang leuleu in Pasian letsong le tua mi khat mawhna hanga thupiang a kibang kei hi: Thukhenna in mawhna khat zui-in mawhpaihna tun a, ahi hangin letsong in thupalsatna tampi zui-in diktansakna a tun hi.

¹⁷Ahang in, tua mi khat thupalsatna hangin tua mi tungtawnin sihna in hong uk ahileh Pasian hong piak a kicing hehpihna le thumaanna letsong a sangte in mikhat Jesu Christ tungtawnin amau nuntakna sungah uk zawtham ding hi lo ahi hiam?

¹⁸Tua bang diudeu in, thupalsatna khat in mawhpaihna piangsak ahileh thumaan khat bawlna in zong mi khempeuh nuntakna a tun diktansakna a piangsak hi.

¹⁹Ahang in, tua mi khat thumanlohna tungtawnin mi tampi mawhnei a suah bang tektek in mi khat thumanna tungtawnin zong mi tampi mi thumaan kisuaksak ding hi.

²⁰Thupalsatna a khan nadingin thu kham hong kipiak beh hi. Ahi hangin mawhna a khanna munah hehpihna a khang semsem zaw hi.

²¹Tua pen, sihna sungah mawhna in a uk bang tektek in i Topa Jesu Christ tungtawnin nuntak tawntungna a tun dingin hehpihna in thumaanna tungtawna a uk theih nading ahi hi.