Read Zokam Rome-te 6 Bible Online

Rome-te 6 - Zokam bible

Rome-te 6

¹Tua ahileh bang i gen ding hiam? Hehpihna a khan nadingin mawhna bawl denden ding i hi hiam?

²Mawh denden peuhmah lo e! Mawhna i sihsan zo hi; tua mawhna sungah bangci nuntak thei lai ding i hi hiam?

³Christ Jesu sunga kibaptise eite khempeuh ama sihna sungah zong a kibaptise zo i hilam thei lo na hi uh hiam?

⁴Tua ahi manin Pa minthanna tungtawnin misi pan Christ a thawh kik mah bangin eite zong nuntakna thak sungah i nuntak theih nadingin ama sihna sungah i kibaptisena tungtawnin amah tawh i kivuikhawm hi.

⁵Ama sihna sungah eite kigawm khawm khin i hileh ama thawhkikna sungah zong amah tawh i kigawm khawm taktak ding hi.

⁶Ahang in, mawhna pumpi’ thahatna a bei a[24] a suah nading le mawhna sila i suah nawn loh nadingin i pianlui pumpi amah tawh a kilhlum khin zo hi, cih i thei hi.

⁷Bang hang hiam cih leh a si khinsa mi peuhmah mawhna pan a suakta hi.

⁸Tu-in Jesu tawh i sihkhawm leh amah tawh i nungta khawm ding hi, cih zong i um hi.

⁹Ahang in, misi pan Christ kithosak khin ahi nungsang a si kik thei nawn kei ding hi, cih i thei hi; sihna in amah a uk zo nawn kei hi.

¹⁰Ama sih sihna pen khatvei-a cing dingin mawhna sihsanna ahi hi; ahi hangin ama nuntak nuntakna pen Pasian ah a nungta ahi hi.

¹¹Tua mah bangin note, mawhna sihsan khinin kingaihsun unla, Pasian ah Jesu sunga a nungta in na kingaihsun un.

¹²Tua ahi manin mawhna kihhuai lunggulhnate na zuih khak loh nadingun a si thei na pumpi uh mawhna na uksak kei un.

¹³Tatsiatna vanzat dingin na pumpi nate uh mawhna tungah na pia kei un. Ahi hangin sihna pan nuntakna a kitunsate bangin Pasian tungah nomau na kipia zaw unla na pumpi nate uh thumaanna vanzat dingin amah na pia zaw un.

¹⁴Ahang in, note thukham nuai-a om hi loin hehpihna nuai-a om na hi manun mawhna in note hong uk teitei lo ding hi.

¹⁵Tua ahileh bang? Eite thukham nuai-ah om hi loin hehpihna nuai-a om i hi manin mawhna i bawl ding hiam? A hi peuhmah kei hi!

¹⁶Mi khatpeuh tungah ama thu mang dingin na kipiak uh ciangin ama thu na man pa uh sila na hi uh bangin, sihna ah hong tun mawhna sila na hi uh zongin, thumaanna ah hong tun thuman’na sila na hi uh zongin a thu na man pa uh sila na hilam uh thei lo na hi uh hiam?

¹⁷Ahi hangin mawhna sila na hi ngei uh hangin no hong ki-apsa thuhilhna, na lungsim khempeuh uh tawh mang na hi manun Pasian tungah lungdamna om ta hen.

¹⁸Mawhna panin note hong kisuaktasak khin zo a, thumaanna sila na suak khin ta uh hi.

¹⁹Na pianngei pumpi uh ah thanem na hi manun mihing kammal tawh hong gen ka hi hi. Na pumpi nate uh, siantholohna le a khang semsem tatsiatna-ah sila dingin na piak ngei bang tektek un, sianthona hong tun ding thumaanna-ah sila dingin na pumpi nate uh tu-in na pia un.

²⁰Mawhna sila na hi laitakun thumaanna in hong ukna pan na suakta zo uh hi.

²¹Tua hun laitakin tu laitaka na maizumpih uh nate panin bang phat tuamna gah at na hi uh hiam? Tua nate in sihna a tun hi.

²²Ahi hangin tu-in mawhna panin note hong khahkhia a, Pasian lamah sila suak khin zo na hi manun na at uh phattuamna in sianthona ah hong tuna, tua in nuntak tawntungna hong tun hi.

²³Ahang in, mawhna thaman sihna hi-a, ahi hangin Pasian letsong ahileh i Topa Jesu Christ sunga b[25] nuntak tawntungna ahi hi.