Read Zokam Rome-te 7 Bible Online

Rome-te 7 - Zokam bible

Rome-te 7

¹Sanggamte aw, thukham theite tunga thugen ka hi hi. Mi khat a nuntak sung teng bek thukham in ama tungah thu nei hi, cih thei hi lo na hi hiam?

²Gentehna in pasal nei numei khat, a pasal a nuntak laiteng thukham hangin a pasal tawh ki-awhcip hi. Ahi hangin a pasal a sih leh kitenna tawh kisai thukham panin amah a kikhahkhia ahi hi.

³Tua ahi ciangin a pasal a nuntak lai-in midang khat a tenpih leh amah angkawmnu a suak hi. Ahi hangin a pasal a sih leh tua thukham panin amah a kikhahkhia hi-a, midang khat a tenpih zongin amah angkawmnu a suak kei hi.

⁴Tua ahi ciangin sanggamte aw, misi pana tho kik midang khat tawh ki-awh a, Pasian ah gah na gah theih nadingun Christ pumpi tungtawnin note in zong thukham na sihsan uh hi.

⁵Pianngei c[26] mawhna in eite hong uk laitakin, sihna ading gah i gah nadingin thukham in a khanlawhsak lunggulh mawhnate in i pumpi sungah na a sem hi.

⁶Ahi hangin tu-in ahileh hun khat lai-a eite hong hencip pen i sihsan zo-a a kigelhsa ngeina-bucinga nuntakna lui sung hi lo Kha a nuntakna thak sungah na i sep theih nadingin tua thukham panin eite hong kikhahkhia zo hi.

⁷Tua hileh bang i gen ding hiam? Thukham pen mawhna ahi hiam? Hi zenzen lo hi! Thukham tungtawn hi kei leh mawhna bang hiam, cih ka thei kei takpi ding hi. Ahang in, thukham in "Deihgawh kei in" d[27] na ci lo hileh deihgawh kici bang cihna hiam, cih ka thei kei ding hi.

⁸Ahi hangin thupiak in a piankhiatsak hun hoih, mawhna in na bawh lian-a, keima sungah deihgawhna namkim gahkhiasak hi. Ahang in, thukham pualam ah mawhna a si hi

⁹Hun khat lai-in thukham pua-ah ka nungta hi; ahi hangin thupiak hong tun khit ciangin mawhna nungta a kei ka si hi.

¹⁰Nuntakna a tun ding thupiak tektek in a taktakin sihna a tun zawsop hi, cih ka theikhia hi.

¹¹Ahang in, thupiak in a piankhiatsak hun hoih na bawh lian-a, kei hong khemin thupiak tungtawnin kei hong sisak hi.

¹²Tua hi-a thukham siangtho a, thupiak zong siangtho-in maanin a hoih hi.

¹³Tua ahileh hoih a kici penin kei adingin sihna suak ahi hiam? Ahi peuhmah kei hi. Mawhna pen mawhna banga a kitheihtel theih nadingin a hoih tungtawnin keima sungah sihna a piangsak hi; tua in thupiak tungtawnin mawhna pen mawhna taktak a suah takpi nading ahi hi.

¹⁴Thukham ahileh khalam thu ahilam i thei hi; ahi hangin keimah ka khami kei a, mawhna ah sila banga hong kizuak ahi hi.

¹⁵Ka hih nop pen ka hih kei a, ahi hangin ka muhdah pen hih ka hi manin, ka hih pen ka theitel kei hi.

¹⁶Ka hih nop loh pen hih ka hileh thukham hoih hi, ci-a thukimpih ka hi hi.

¹⁷Tua hi-a tua banga a gamtang pen kei mahmah hi nawn loin ka sunga nungta mawhna ahi hi.

¹⁸A hoih bawl ding ka lunggulh hangin bawl thei lo ka hi manin mawhna a dim keima pianngei pumpi a[28] sungah a hoih bangmah nungta lo hi, cih ka thei hi.

¹⁹Ahang in, kei hihte a hoih ka hih nopte ahi kei hi; hi lo hi, ka hih nop loh a siate ka hih den zaw hi.

²⁰Tu-in ka hih nop lohte hih ka hileh, a hih pen kei hi nawn loin ka sunga nungta mawhna hih ahi hi.

²¹Tua ahi ciangin hih thukham in na sem ahilam ka phawkkhia hi: A hoih ka hih nop laitakin kei tawh a omkhawm den a gilo a om na hi mawk hi.

²²Ahang in, ka mihinna laigil ah Pasian thukham ka lungkimpih hi.

²³Ahi hangin ka pumpi nate sungah thukham dang khat nasem ka mu hi. Tua thukham in ka lungsim thukham do a, kei pumpi nate sunga mawhnate sungah hong koltangsak hi.

²⁴Hingim na zen ing e! Hih sihna pumpi panin kua in kei hong honkhia ding ahi hiam?

²⁵I Topa Jesu Christ tungtawnin Pasian tungah lungdamna om ta hen! Tua hi-a kei mahmah ka lungsim sungah Pasian thukham sila ka hi-a ahi hangin mawhdim ka piangngei sungah mawhna thukham sila ka hi hi.