Read Zokam Rome-te 8 Bible Online

Rome-te 8 - Zokam bible

Rome-te 8

¹Tua ahi manin Christ Jesu sunga omte adingin b[29] tu-in mawhpaihna a om kei hi.

²Bang hang hiam cih leh Christ Jesu tungtawnin nuntakna Kha thukham in mawhna le sihna thukham panin kei hong suaktasak zo hi.

³Ahang in, mawhdim pianngei c[30] in a thanemsak thukham, a thahatna bei-a, a sep theih loh pen, Pasian in mawhna hanga biakna d[31] a kizang dingin mawhdim mihing bangin e[32] ama Tapa mahmah hong sawlna tawh a sem zo hi.

⁴Tua ahi ciangin mawhdim pianngei banga nungta hi lo, Kha deihna banga nungta eite sungah thukham in a kalh thumaan a tun theih nadingin amah in mawhdim mihing sungah mawhna a mawhpaih hi.

⁵Pianngei mawhna banga nungtate in, tua pianngei deihna bekbek a lunggulh uh hi. Ahi hangin Kha deihna banga nungtate in Kha deihna bekbek a lunggulh uh hi.

⁶Mawhdim mi f[33] lungsim sihna hi-a ahi hangin Kha in a uk lungsim, nuntakna le lemna ahi hi.

⁷Mawhdim lungsim g[34] in Pasian a langneih hi. Tua in Pasian thukham a mang kei hi; zong a mang thei kei hi.

⁸Mawhdim pianngei in a uksa mite in Pasian a lungkimsak thei kei uh hi.

⁹Ahi zongin Pasian Kha note sungah a ten nak leh mawhdim pianngei in note hong uk nawn loin Kha in note hong uk hi zaw hi. Mi khatpeuh in Christ Kha a neih kei leh Christ aa ahi kei hi.

¹⁰Ahi hangin note sungah Christ a om leh mawhna hangin note pumpi si taleh thumaanna hangin na kha uh a nungta hi.

¹¹Misi pana Jesu a thosakpa Kha note sungah hong teng ahileh misi pana Christ a thosakpa in no sunga teng ama Kha tawnin a si thei na pumpite uh zong nuntakna a pia ding hi.

¹²Tua ahi ciangin sanggamte aw, tu-in bat khat i nei hi. Tua in mawhdim pianngei deihna banga a nungta dingin pianngei tungah i ba kei hi.

¹³Ahang in, mawhdim pianngei deihna banga na nuntak uh leh na si ding uh hi; ahi hangin Kha hangin na pumpi uh gamtatsiate na sihsak uh leh na nungta ding uh hi.

¹⁴Bang hang hiam cihleh Pasian Kha in a makaihte Pasian tapate ahi uh hi.

¹⁵Ahang in, note launa sila hong suaksak kik kha a sangte na hi kei uh hi; ahi hangin tapa-suahna h[35] Kha na sang zo uh hi. Tua hi a, ama hangin eite in, "Abba, i[36] Pa," i ci hi.

¹⁶Pasian tate i hina eimau kha tawh tua Kha mahmah in teci a pang hi.

¹⁷Tu-in tate i hileh gouluahte i hi hi. Christ minthanna eite in zong i tanhpih theih nadingin ama thuaknate i thuakpih takpi leh Christ tawh gouluah khawm Pasian gouluahte i hi hi.

¹⁸Tu laitaka i thuak gimnate le eite sunga hong kilang ding minthannate tehkak tham ka sa kei hi.

¹⁹A kipiangsak na khempeuh in Pasian tapate a kilaak nading lawptakin lamenin a ngak uh hi.

²⁰Ahang in, a kipiangsak nate khempeuh amau deihtel hang hi lo, amau a nuai siahpa deihna bangin bucinlohna nuai-ah kihen hi.

²¹Tua in a kipiangsak khempeuh muatna sila pan kisuaktasaka, a minthang Pasian tate suahtakna sungah a tun nading lametna hang ahi hi.

²²A kipiangsak khempeuh in tu hun mahmah dong nausuahnat thuak bangin tau lai uh hi, cih i thei hi.

²³Tua bek hi lo Kha gahmasa a nei eite mahmah zong eite pumpi tatkhiat nading tapa i suah ding lawptakin ngakin i sungah tau-in i om hi.

²⁴Ahang in, hih lametna sungah eite hotkhiat i hi hi. Ahi hangin a kimusa lametna pen lametna ahi peuhmah kei hi. Kua in a muhsate lamen ahi hiam?

²⁵Ahi hangin i muh nai lohte i lamet leh tuate i ngak keeikai hi.

²⁶Tua mah bangin i thanemnate ah Kha in eite hong huh hi. Eite in thu bangci nget ding cih i thei kei hi, ahi hangin Kha mahmah in kammala lawhkhiat theih loh tuanate tawh eite adingin hong thumsak hi.

²⁷Tua hi a, eite lungsim a zongpa in Kha lungsim a thei hi. Bang hang hiam cihleh Pasian deihna tawh kizui-in Kha in misiangte ading a thumsak hi.

²⁸Tua ciangin Pasian in ama ngimna tawh kizui-a, a sapsa mite a[37] ahi, amah a itte a hoih nadingin na khempeuh a sepsak hi, b[38] cih i thei hi.

²⁹Ahang in, Tapa pen sanggam tampite lakah tacil a suah theih nadingin Pasian in a theihkholhsa mite ama Tapa tawh a kibang dingin a laitansa ahi hi.

³⁰Tua hi-a a laitansate zong a sam hi; a sapsate zong dik a tangsak hi; dik a tansaksate zong a minthangsak hi.

³¹Tua ahileh hih thu dawn nadingin bang i gen ding hiam? Pasian eite lamah a pan leh ei langah kua pang zo ding ahi hiam?

³²Ama Tapa neihsun sit loin eite khempeuh ading hong pia pa in amah tawh na khempeuh hong citpiak khawm loin om ding ahi hiam?

³³Pasian in a telsate kua in mawhmat ding ahi hiam? Dik a tangsak Pasian ahi hi.

³⁴A mawhpaihpa kua ahi hiam? Si bek tham loin nungta-a, a tho kik pa Christ Jesu, tu-in Pasian taklamah tu-a eite adingin hong thumsak hi.

³⁵Christ hong itna panin eite kua in hong khenkhia zo ding hiam? Lungmanna, haksatna, bawlsiatna, kialna, silh ding kisapna, lauhuaina, namsaute in hong khenkhia zo ding ahi hiam?

³⁶Hih bangin kigelh hi: "Nangma hangin kote in ni thapai-in sihna ka maituah uh hi; gawh ding tuute bangin kote hong kiseh hi," c[39]

³⁷Hong khenkhia zo kei ding hi. Hihte khempeuh ah eite hong it ama tungtawnin gualzote sang i gualzo zaw hi.

³⁸Ahang in, sihna le hinna ahi zong in, vansawltakte le dawite d[40] ahi zongin, tu hun le tu nung ciang ahi zongin, vangliatna khatpeuh ahi zongin,

³⁹a thukna le a sanna ahi zongin, a kipiangsak nate khat beek in i Topa Christ Jesu sunga om Pasian hong itna panin hong khenkhia zo kei ding hi, cih ka kipsan takpi hi.