Read Zokam Rome-te 9 Bible Online

Rome-te 9 - Zokam bible

Rome-te 9

¹Christ sunga om tua thutak ka gen hi - ka zuau hi loin Khasiangtho sunga ka kitheihna lungsim in tua kipsakna,

²ka lung sungah dahna lianpi le lunggim ngitngetna nei-in ka om hi.

³Ahang in, Israel-te keima mipih ka sanggamte hangin kei mahmah Christ pan kikhen khia-in samsiatna thuak maileng ka ut hi.

⁴Tapa suahsakna amau aa hi-a Pasian minthanna ahi zongin, thukhunte ahi zongin, thukham ngahna ahi zongin biakinnpi-a biakna le kamciamte khempeuh amau aa ahi hi.

⁵Pubulte amau aa hi a, amaute panin Christ leitung pu le pate kiguisut hi. Tua Christ in na khempeuh tunga Pasian hi-a a tawntungin kiphat hi! e[41] Amen.

⁶Pasian thu a hawmsuak bang ahi kei hi. Ahang in, Israel-te pana piangte khempeuh Israel ahi kim kei uh hi.

⁷Amaute ama suan le khak ahi uh hangin Abraham tate ahi kim kei uh hi. Tua sangsikin: "Na suan na khakte Isaac tungtawnin kiseh ding hi." f[42] ci hi.

⁸Kammal dangin gen lehang pianngei tate Pasian tate ahi kei uh hi. Ahi hangin kamciamna tate, Abraham suan le khakte in kisim hi.

⁹Ahang in, tua kamciam in: "A kisehsa hun a tun ciangin kong kileh kik dinga, Sarah in tapa khat a nei ding hi" g[43] a na ci hi.

¹⁰Tua bek tham loin Rebecca tate in pa kikhat eite pa Isaac a nei uh hi.

¹¹Tua hi napi tua a peng tate gel a suah ma uh asia apha a bawl theih mapek un, Pasian teelkhiatna tawh kisai ama ngimna:

¹²sepna hang hi lo hong sampa hangin, cih thu a kip nadingin tuanu kiangah, "A uzaw in a naupa nasem a suak ding hi" h[44] ci-in na kigen hi. Tua bang tektek in:

¹³"Jacob ka it a, ahi hangin Esau ka mudah hi." i[45] ci-in kigelh zo hi.

¹⁴Tua ahileh bang gen ding i hi hiam? Pasian a thutang lo ahi hiam? Hi peuhmah lo hi!

¹⁵Ahang in, amah in Moses kiangah "Ka lainatte ka lainat dinga, ka khuatuahte ka khuatuah ding hi" j[46] a na ci hi.

¹⁶Tua ahi ciangin mihing lunggulhna tung ahi zongin, a hanciamna tungah ahi zongin kinga loin Pasian lainatna tung bekah kinga hi.

¹⁷Ahang in, Laisiangtho in Pharaoh kiangah: Ka vangliatna nangma sungah ka lah theih nading le leitang tung khempeuh ah ka min a kitangko theih nading ngimna tawh nang kong laamto zo hi." k[47] ci hi.

¹⁸Tua ahi manin Pasian in a lainat nopte tungah lainatna nei-a, a lungkhauhsak nopte a lung khauhsak hi.

¹⁹Note khatpeuh in ka kiangah: "Tua ahileh bang hangin Pasian in eite hong mawhsak lai ahi hiam? Kua in ama deihna nang ahi hiam?" nong ci kha ding uh hi.

²⁰Ahi hangin mihing aw, Pasian a sel kik dingin nang kua na hi hiam? A kibawl na in a bawlpa kiangah, ‘Bang hangin kei hih bangin hong bawl na hi hiam?’ ci thei ding hiam" l[48]

²¹Beelseekpa in beellei lom khat panin a thupi-a zat ding beel le zattaang ding beel, bawl theihna thu nei hi lo ahi hiam?

²²Pasian in a thangpaihna lak ding le ama vang kitheikhawksak dingin suksiat dinga a koihsa ama thangpaihna a tun nadingte lungduaitakin thuak keikai ahileh bang gen nawn tuan ding i hi hiam?

²³A minthang dinga a bawlkholhsa, ama lainatna a ngahte tungah a kicing ama minthanna a lahkhiat ding

²⁴Jew-te pan bek hilo Gentile-te laka eite nangawn hong sam ahileh bang gen nawn ding i hi hiam?

²⁵Amah in Hosea sungah: "Keima mi ahi lo amaute, ‘keima mite’ ka ci ding hi; ka it loh nu zong, ‘ka it nu’ a[49] ka ci ding hi,

²⁶le " ‘Note, keima mite na hi kei uh hi,’ ci-a amau tunga ka genna mun tekek ah amaute, ‘a nungta Pasian tapate,’ b[50] kici ding hi, cih thu a tung ding hi." ci-in a gen hi.

²⁷Israel tawh kisai-in Isaiah in: "Israel mite tuipi gei-a sehnel zahin a tam uh hangin a baanglaite bek kihonkhia ding hi.

²⁸Ahang in, Topa in leitang tungah ama thukhenna a kip den dingin a manlangin tungsak ding hi," c[51] ci-in a kiko hi.

²⁹Nidang lai-a Isaiah in: "Thahatpen Topa in eite ading suan le khak hong nusiat lo hileh eite, Sodom bang i hi khin zo dinga, eite Gomorrah bang i hi khin zo ding hi," d[52] ci-a a gen bang tektek ahi hi.

³⁰Tua ahileh bang i gen ding hiam? Thumaanna a deih lo Gentile-te in upna hanga kingah tua thumaanna a ngah zo uh hi;

³¹ahi hangin Israel-te in a delh uh tua thumaanna thukham a ngah kei uh hi.

³²Bang hanga ngah lo? Amaute in upna tawh zong loin sepna tawh a zon hang uh ahi hi. Amaute kimuktukna suang tungah a muktu uh hi. Hih bangin kigelh hi:

³³"En in, mi a muktusak ding suangtum khat le amaute a puksak ding suangtumpi khat Zion ah ka nga a, amah amuangte a maizum ngei kei ding uh hi," e[53]