Read Zokam 1 Corinth-te 1 Bible Online

1 Corinth-te 1 - Zokam bible

1 Corinth-te 1

¹Pasian deihna hanga Christ Jesu sawltakpi khat dinga kisam Paul le i sanggampa Sosthenes in,

²Corinth a om Christ Jesu sunga sianthosaksa Pasian pawlpite le a siangtho dinga sapte, koimah peuh a om amaute le eite Topa - Topa Jesu Christ min a lote khempeuh tungah:

³I Pa Pasian le Topa Jesu Christ tung pana hehpihna le lemna note tungah om ta hen.

⁴Christ Jesu sungah note hong piak hehpihna hangin note adingin Pasian tungah lungdam ka ko tawntung hi.

⁵Ahang in, ama sungah note na thugenna uh le na theihna khempeuh uh lam citengah hong kihausak zo hi;

⁶bang hang hiam cih leh Christ thu teci ka panna uh note sungah kikipsak zo hi.

⁷Tua ahi ciangin eite Topa Jesu Christ hong kilaak ding lawptaka na ngak kawmun khalam letsong kisap na nei kei uh hi.

⁸I Topa Jesu Christ ni ciangin kawk na baan loh nadingun amah in a tawp dongin hong thakhauhsak ding hi.

⁹A Tapa i Topa Jesu Christ tawh kipawlna sunga note hong sampa Pasian a muanhuai hi.

¹⁰Sangamte aw, note khempeuh khat le khat kithutuakin note lakah kipawl khenna a om loh nading le lungsim le ngaihsutna-a kicingtaka na kigawm theih nadingun i Topa Jesu Christ minin kong thum hi.

¹¹Ka sanggamte aw, Chloe innkuanpihte pawlkhat in note lakah kitotna om ci-in hong zasak zo uh hi.

¹²Ka cihnopna hih ahi hi. Note khat in,"Ken Paul ka zui hi," adang khat in,"Ken Apolos ka zui hi," adang khat leuleu in, Ken Cephas a[1] ka zui hi," adang khat lai in, "Ken Christ ka zui hi," na ci ciat uh hi.

¹³Christ kisehkhen ahi hiam? No adingin Paul kikilhlum ahi hiam? Paul min sungah b[2] note kibaptise na hi uh hiam?

¹⁴Crispus le Gaius longal note kong baptize khak loh ka nuam mahmah hi.

¹⁵Tua ahi ciangin kuamah in kei min sungah na kibaptise uh, ci-in a ci thei kei hi.

¹⁶(Himah hi, Stephanas-te innkuan zong ka baptise lai hi. Tua lo adang ka baptise lam ka phawk kei hi.)

¹⁷Ahang in, Christ in baptize dingin hong sawl lo a, lungdamna-thu hilh dingin hong sawl hi. Tua pen mihing pilna kammalte tawh gen ding hilo hi. Hi hileh Christ singlamteh vangliatna a hawmsuaksak kha ding hi.

¹⁸Ahang in, a mangthang mite adingin singlamteh thupuak, haina ahi hi. Ahi hangin hong kihonkhia eite adingin Pasian vangliatna ahi hi.

¹⁹Ahang in, "A pilte pilna ka susia ding hi; a tei mite teina ka hawmsuaksak ding hi," a[3] ci-in kigelh zo hi.

²⁰Mipil koi-ah om hiam? Lai siam koi-ah om hiam? Hih khanghun ah thuguizuih mi koi-ah om hiam? Pasian in leitung pilna, haina suaksak hi lo ahi hiam?

²¹Ahang in, Pasian pilna sungah leitung in ama pilna tungtawnin amah thei lo ahi nungsang a kihilh haihuaina tungtawnin a um mite a hotkhiat ding Pasian lungkimna ahi hi.

²²Jew-te in lim lamdang ngen uh a, Greek-te in pilna a zong uh hi.

²³Ahi hangin kote in Jew-te adingin kisuih khakna suang, Gentile-te adingin haina ahi, a kikilhlum Christ thu ka hilh uh hi.

²⁴Ahi hangin Pasian sap Jew-te le Greek-te tungah Christ, Pasian vangliatna le Pasian pilna ahi hi.

²⁵Ahang in, Pasian haina in mihing pilna sangin pilzaw a, Pasian thanemna in mihing hatna sangin thakhauhzaw hi.

²⁶Sanggamte aw, note hong kisap lai-in, bang na hi uh hiam, ngaihsun un. Hong sap mite lakah mihing tehnate-a apil na tam kei uh hi; mihing a thuzawh zong na tam kei uh hi; pianpih nampi zong tampi na om kei uh hi.

²⁷Ahi hangin Pasian in a pilte a maizumsak nadingin leitunga a hai nate a teel hi; Pasian in a thahatte a maizumsak nadingin leitunga a thanemte a teel hi;

²⁸Amah in a om nate a guak suaksak nadingin hih leitung na niamte, a simmawhhuai nate le a om lo nate a teel hi.

²⁹Tua pen ama mai-ah kuamah a kisaktheih loh nading ahi hi.

³⁰Ama hangin eite adinga Pasian tung pana pilna a hong suakpa Christ Jesu sungah note na om uh a, tua in eite thumaanna, sianthona le tatkhiatna ahi hi.

³¹Tua ahi manin "A kisial peuhmah Topa sungah kisial ta hen," b[4] ci-in kigelh hi.