Read Zokam 1 Corinth-te 10 Bible Online

1 Corinth-te 10 - Zokam bible

1 Corinth-te 10

¹Bang hang hiam cih leh sanggamte aw, i pu i pate meiipi nuai-ah omin amaute khempeuh tuipi sung tawna a paisuakna thu na theih loh ding uh ka deih kei hi.

²Amaute khempeuh Moses sungah meii le tuipi-in a kibaptise uh hi.

³Amaute khempeuh in khalam an a kibang ne uh a,

⁴khalam dawn a kibang a dawn uh hi; ahang in, amaute a tonpih khalam Suangpi panin dawn uh a, tua Suangpi Christ ahi hi.

⁵Ahi hangin amaute a tamzaw tungah Pasian lungkim lo a, amaute pumpi gamlakah a kithehthang hi.

⁶Amaute bangin a gilo nate lunggulhin i om loh nadingin eite etteh a[21] dinga hihte a tungkhol ahi hi.

⁷"Tua mite a ne a dawn dingin tusuk uh a, lawkite noptatna haihuai sunga bual dingin a dingto uh hi." b[22] ci-a kigelhsa amaute pawlkhat bangin milim biate suak kei ni.

⁸Amaute pawlkhat in numei pasal paktatna a bawlna uh hangin ni khatin tul sawmnih le tulthum si uh hi - eite in tua bang mawhna bawl kei ni.

⁹Amaute pawlkhat in Topa zia-et uh a, gul in a tuklup bangin eite in i Topa zia-et kei ni.

¹⁰Amaute pawlkhat phun uh a, a thatgam thei vansawltak in amaute a thah bangin eite phun kei ni.

¹¹Amaute tungah hih thute etteh dingin na pianga, khanghunte a bukimna hong tunna, eite kivauhilh nadingin a kigelh hi.

¹²Tua ahi ciangin kiptakin dinga na kingaihsut leh na puk loh nadingin kidawm in!

¹³Note in mihingte tuah ngei zia-etna longal na tuak kei uh hi. Pasian a muanhuai hi; na thuak zawh loh ding zahval zia-etna hong tungsak kei ding hi. Ahi hangin note hong kizia-et ciangin na thuakzawh nadingun suahtakna lampi hong bawlsak ding hi.

¹⁴Tua ahi manin ka lawm itte aw, milim biakna na taisan un.

¹⁵Thu ngaihsun thei mite kianga thugen ka hi hi. Ka thugente nomau mahmah adingin na khentel un.

¹⁶Eite in lungdam i koh tua lungdamkohna hai in, Christ sisan a i kihelna hi lo ahi hiam? Eite in i balkhap anlum zong Christ pumpi-a i kihelna mah hi lo ahi hiam?

¹⁷Bang hang hiam cih leh anlum khat om a, lum khat panin ne tek i hi manin a tampi eite pum khat i hi hi.

¹⁸Israel mite ngaihsun dih un: kithoihna sa a nete in biaknatau ah kihelna nei uh hi lo ahi hiam?

¹⁹Tua ahileh milim tunga kipia kithoihna na khatpeuh ahi zongin, milim ahi zongin thupi hi, ka cihnopna ahi hiam?

²⁰Hilo hi. Ahi hangin lawkite kithoihna pen dawite tungah thoihna-a kipia hi-a, Pasian tunga kipia ahi kei hi. Tua hi-a dawite tawh na kikop khawm ding uh ka deih kei hi.

²¹Topa hai dawnin dawite hai zong na dawn khawm thei kei ding uh hi. Topa sabuai le dawite sabuai ah a nihin na umkhawm thei kei ding uh hi.

²²Eite in Topa hazatna sosak dingin hanciam i hi hiam? Eite amah sangin thahat zaw i hi hiam?

²³Na khempeuh hih ding a kiphal hi. Ahi hangin na khempeuh phattuamna ahi kim kei hi. Na khempeuh hih ding a kiphal hi - ahi hangin na khempeuh in a hoihsak kim kei hi.

²⁴Kuamah in ama hoih nading bek zong loin midangte hoih nading zong zaw hen.

²⁵Na kitheihna lungsim dong loin sa zuakna-a kizuak sa khatpeuh na ne in.

²⁶Ahang in, "Leitung le a sunga om khempeuh Topa aa ahi hi." c[23]

²⁷Thu um lo mi khatpeuh in an ne dingin hong sapa na va hawh nop leh na kitheihna lungsim dong loin na mai-a kilui peuhpeuh ne in.

²⁸Ahi hangin mi khatpeuh in, "Hih in kithoihna-a kipia sa ahi hi," hong cih leh tua hong genpa hang le na lungsim kisuantakna hangin ne kei in. d[24]

²⁹Nang aa hi lo midang lungsim kitheihna gen ka hi hi. Ahang in, bang hangin kei suahtakna, midangte lungsim kisuantakna in thu kikhen ding ahi hiam?

³⁰Lungdamtaka tua an ka nek leh bang hanga na khatpeuh tungtanga Pasian tung lungdam ka kohna hangin kei hong kimawhsak ahi hiam?

³¹Tua ahi ciangin na ne, na dawn uh zongin na hihna peuhpeuhuah na hihna khempeuh uh Topa minthan nadingin na hih un.

³²Jew-te le Greek-te ahikeh Pasian pawlpi khat peuhpeuh ahi zongin kimuktusak kei unla,

³³lam khempeuh ah mi khempeuh lungkimsak ka sawm bangin na hih un. Bang hang hiam cih leh amaute a kihotkhiat theih nadingin keimah kia hoih nading zong loin mi tampi hoih nading ka zong hi.