Read Zokam 1 Corinth-te 11 Bible Online

1 Corinth-te 11 - Zokam bible

1 Corinth-te 11

¹Keimah in Christ ka etteh bangin kei hong etteh un.

²Na khempeuh ah kei nong phawk gige man uh leh kong piaksawn hilhnate e[25] bang tektekin lenkipa na sep manun note kong phat hi.

³Tu-in pasalte khempeuh lutang Christ hi-a, numei lutang pasal hi-in, Christ lutang Pasian ahilam na theihtel ding uh ka deih hi.

⁴Pasal peuhmah in thu a ngen a, thu a gen zongin a lutang a khuh leh a lutang simmawh ahi hi.

⁵Tua mah bangin numei peuhmah in thu a ngen a, thu a gen zongin a lutang a khuh kei leh a lutang simmawh ahi hi - tua pen a sam a metmai tawh kibang tektek hi.

⁶Numei in a lutang a khuh kei leh a sam a tan ding hi Numei adingin sam tan ahikeh sam metmai a zumhuai ding leh a lutang a khuh ding hi.

⁷Pasal pen Pasian lim le a minthanna ahi nungsang a lutang a khuh kei ding hi. f[26] Ahi hangin numei pen pasal minthanna ahi hi.

⁸Ahang in, numei pana pasal kibawl hi loin, numei pen pasal pan hizaw hi.

⁹Numei adingin pasal kibawl hi lo a, pasal adingin numei kibawl hizaw hi.

¹⁰Hih thu hang le vansawltakte hangin numei in a lutang tungah thu a kineihna lim a neih ding kilawm hi.

¹¹Bangbang ahi zongin Topa sungah pasal loin numei a tangdin kei a, numei loin pasal a tangdin tuan kei hi.

¹²Ahang in, pasal panin numei a kibawl bangin pasal zong numei pana suak ahi hi. Ahi hangin na khempeuh Pasian pana piang ahi hi.

¹³No le no in khentel un: Numei in a lutang khuh loin Pasian tungah thu a nget ding a kilawm hiam?

¹⁴A pianzia mahmah in zong pasal a sam a sau leh zumhuai-a,

¹⁵ahi hangin numei a sam a sau leh ama minthanna ahi hi, ci-in hong hilh hi lo ka hi hiam? Ahang in, samsau pen numei lutang khuh nadinga kipia ahi hi.

¹⁶Hih thu tawh kisai-in mi khatpeuh a selkhah nop leh eite in zat ngeina adang i nei kei a, Pasian pawlpite in zong a nei kei uh hi.

¹⁷Na kikhopnate un hoihna sangin siatna piangsak zaw ahi manin a nuai-a kong lahte ah note kong phat kei hi:

¹⁸A masa penin pawlpi hina tawh note na kikhop uh ciangin note lakah kipawl khenna om cih ka za a, upna ciang zong ka nei hi.

¹⁹Note lakah kuate Pasian san hiam, cih a kilat nadingin ngaihsutna kibang lo zong a om ding mah ahi hi.

²⁰Note na kikhop uh cianga na nek pen uh Topa nitak-an ahi kei hi.

²¹Ahang in, na nek uh ciangin kuamah kingak loin na ne tek pah uh hi. Khat gilkialin om a, adang khat in zu a kham hi.

²²Na nek na dawn nading uh inn nei lo na hi uh hiam? Ahikeh Pasian pawlpi simmawhin bangmah a nei lote zahlaaksak na hi uh hiam? Note kiangah bang kong gen ding hiam? Hih thu hangin note kong phat ding hiam! Kong phat peuhmah kei hi!

²³Ahang in, note kong piaksawn pen Topa tung pana ka ngah ahi hi: Topa Jesu a kilehhek ni zanin anlum la a,

²⁴lungdam a koh khit ciangin balkham a, "Hih in note adinga kipia ka pumpi ahi hi, kei nong phawk nadingun na hih un," a ci hi.

²⁵Tua mah bangin nitak-an a nek khit uh ciangin hai la a, "Hih hai in ka sisana thukhunna thak ahi hi. Na dawn simun kei nong phawk nadingun na hih un," a ci hi.

²⁶Ahang in, hih anlum ne a, hih hai na dawn simun Topa sihna ama hong pai dong a tangko na hi uh hi.

²⁷Tua ahi manin a kilawm loin anlum ne a, Topa hai a dawn peuhmah Topa pumpi le ama sisan tungah a mawh hi.

²⁸Mi khatpeuh in anlum a nek ma le hai a dawn ma-in amah a kisittel ding kisam hi.

²⁹Ahang in, Topa pumpi theician lopi-a, a ne a dawn mi peuhmah ama tungah thukhenna a tun nadingin a ne a dawn ahi hi.

³⁰Tua thu hangin note lakah tampi zawngkhalin cina uh a, mi tampi a ihmu zo uh hi.

³¹Ahi hangin eite, ei le ei thu i kikhen khit leh thukhenna i thuak kei ding hi.

³²Topa in eite thu hong khen ciangin leitung tawh hong kimawhpaih khawm loh nadingin eite hong sekna ahi hi.

³³Tua ahi tak ciangin sanggamte aw, a ne dinga na kikhop uh ciangin khat le khat na kingak un.

³⁴Na kikhopna un thukhenna hong tut loh nadingin a gilkial khatpeuh a om leh a inn ah ne ta hen. Tua banah kong pai ciangin thudangte kong lak lai ding hi.