Read Zokam 1 Corinth-te 12 Bible Online

1 Corinth-te 12 - Zokam bible

1 Corinth-te 12

¹Sangamte aw, tu-in khalam letsongte thu na theih loh ding uh ka deih kei hi.

²Note lawki na hih lai-un, a pau thei lo milimte lamah midangte thuzawh le pimangin na om lam uh na thei uh hi.

³Tua ahi manin Pasian Kha pansana thugen mi peuhmah in, "Jesu kihamsiat hen" ci thei lo a, Khasiangtho pansan longal kuamah in, "Jesu in Topa hi," a ci thei kei hi, cih kong gen hi.

⁴Letsong a tuamtuam a om hangin Kha a kibang ahi hi.

⁵Nasepna a tuamtuam a om hangin Topa a kibang hi.

⁶Sepsakna nam tuamtuam a om hangin mi khempeuh sungah tua Pasian mah in a sem hi.

⁷Tu-in mi khempeuh i hoihkim nading mikim tungah Kha kilatkhiatna kipia ciat hi.

⁸Mi khat tungah Kha tungtawnin pilna thupuak kipia hi. Midang khat tungah tua Kha mah in theihna thupuak,

⁹midang khat tungah a kibang Kha in upna kipia a, tua Kha khat mah in cina damsakna letsongte,

¹⁰midang khat tungah nalamdang bawl theihna vangte, midang khat tungah thu magen theihna, midang khat tungah khate khentel theihna, midang khat tungah pau nam tuamtuam a[27] pau theihna, midang khat lai tungah paute khiat theihna b[28] kipia hi.

¹¹Hihte khempeuh a kibang Kha khat nasep hi-a, amah in a sehsa bangin amaute a pia ciat hi.

¹²Pumpi in na tampi tawh kibawl hi napi pumkhat ahi hi. A nate tampi ahi hangin pumpi khat a piangsak uh hi. Christ zong tua mah bang ahi hi.

¹³Ahang in, eite Jew-te i hi-a, Greek-te i hi zongin sila i hi-a, sila lo i hi zongin Kha khat in c[29] pumpi khat sungah i vekpi-in hong baptise a, eite i vekpi in i dawn ding Kha khat mah hong kipia hi.

¹⁴Na khat bek tawh pumpi kibawl hi loin na tampi tawh kibawl ahi hi.

¹⁵Khe in,"Khut hi lo ka hi manin pumpi aa ka hi kei hi," cileh tua a cihna lel tawh pumpi na a hina a bei tuan kei hi.

¹⁶Tua ciangin bil in, "Kei mit hilo ka hi manin pumpi aa ka hi kei hi," cileh tua a cihna lel tawh pumpi aa a hihna a bei tuan kei hi.

¹⁷Pumpi a vekpi in mittang khat hi mawk leh khuazak theih nading koi-ah om ding ahi hiam? Pumpi a vekpi-in bil khat hi mawk leh a gimnam zak theih nading koi-ah om ding ahi hiam?

¹⁸Ahi hangin Pasian in amaute, ama deihna bang tektekin pumpi tungah a guang kim hi.

¹⁹Amaute khempeuh pumpi na khat bek hileh pumpi koi-ah om ding ahi hiam?

²⁰Tu in ahileh pumpi na tampi om a, ahi hangin pumpi khat ahi hi.

²¹Mit in khut kiangah,"Nang kong kisam kei hi," a ci thei kei hi. Lutang in zong khepek kiangah, "Nang kong kisam kei hi," a ci thei kei hi.

²²Tua sangsikin pumpi na a gina lo hileh a kilawmte a kisampente hizaw hi.

²³Tua hi-a i thupisim loh pumpi nate i nak pahtawite hi thei zaw hi. A kithusim tham lo pumpi nate nakpi-in dop kulzaw hi.

²⁴I thusimzawk pumpi nate, tua banga limbawl tuan a kul kei hi. Ahi hangin Pasian in pumpi nate ki-awhsaka a kisamzaw pumpi nate tungah nakpitakin pahtawina pia-in,

²⁵pumpi sungah tua bangin kituam khenna om loin, a nate khat le khat a kibanga a kithusim tuah ciat nading uh ahi hi.

²⁶Khat in a thuak leh adang khempeuh in a thuakpih hi. A nate khat a kipahtawi leh adang khempeuh in a lungdampih uh hi.

²⁷Tu-in note Christ pumpi na hi uh a, a pumpi nate na hikim uh hi.

²⁸Tua hi-a Pasian pawlpi sungah a masapenin Pasian in sawltakpite, a nihna-in kamsangte, a thumna ah lai hilhte, tua ciangin nalamdang bawlte, cina damsak theihna letsong ngahte, midang a huh theite, ki-ukna letsong ngahte le pau nam tuamtuam a paute zong a seh hi.

²⁹Mi khempeuh sawltakpi ahi uh hiam? Mi khempeuh kamsangte ahi uh hiam? Mi khempeuh lai hilhte ahi uh hiam? Mi khempeuh in nalamdangte a bawl uh hiam?

³⁰Mi khempeuh in cina damsakna letsong a nei uh hiam? Mi khempeuh paute a[30] in a pau uh hiam? Mi khempeuh in a khiatna a gen uh hiam?

³¹Ahi hangin letsong lianzawte lawpin na lunggulh zaw un. b[31]