Read Zokam 1 Corinth-te 15 Bible Online

1 Corinth-te 15 - Zokam bible

1 Corinth-te 15

¹Sanggamte aw, tu-in note in na sansa uh le dinmuna na neihsa uh kong hilh lungdamna-thu kong phawksak kik nuam hi.

²Note kianga kong hilhsa thu kiptaka na let nak uh leh hih lungdamna-thu pansanin hotkhiat na hi ding uh hi. Tua hi kei leh a mawkna-a um na hi uh hi.

³Ahang in, a thupi e[43] masa penin ka sansa kong piaksawn ahi: Laisiangtho gen bangin eite mawhna adingin Christ si a,

⁴amah kivui-in, Laisiangtho gen bangin a nithum ni-in tho kika,

⁵Peter f[44] kiangah kilangin tua khit ciangin Sawm-le-nihte kiangah a kilang hi.

⁶Tua khit ciangin hun kibangin sanggam zanga sanga tamzawte kiangah a kilang hi. Amaute pawlkhat a ihmut khit uh hangin a tamzaw a nungta lai uh hi.

⁷Tua ciangin James tungah kilang a, tua khit ciangin sawltakpite khempeuh kiang le

⁸a nunung penin mi suah ngei banga suak lo kei tungah zong hong kilang hi.

⁹Ahang in, sawltakpite lakah kei a neupen ka hi-a, Pasian pawlpi bawlsia ka hi manin sawltakpi cih ding nangawnin ka kilawm kei hi.

¹⁰Ahi hangin Pasian hehpihna hangin ka hi bangbang ka hi-a, kei tungah ama hehpihna a mawkna-in a bei kei hi. A bei kei takpi hi, amaute khempeuh sangin na ka nak sepzaw a, tua nangawn kei sep hi loin kei tawh a omkhawm Pasian hehpihna sep ahi hi.

¹¹Tua ahi ciangin kei ka hi-a, amaute ahi zongin ka hilh uh thu hih thu hi-a, note up zong hih thu mah ahi hi.

¹²Ahi hangin misi panin Christ kithosak hi, ci-in kihilh ahileh bangci bangin note pawlkhat in misi thawhkikna om lo hi, ci thei ahi hiam?

¹³Misi thawhkikna om lo hileh Christ nangawn kithosak lo hi ding hi.

¹⁴Christ tho kik lo hileh kote thuhilhna kimanna nei lo hi dinga note upna zong kimanna nei lo hi ding hi.

¹⁵Tua tham loin Pasian in Christ misi pan thosak hi, cih thu teci ka pan manun kote Pasian thu ah zuau teci pang hong suaksak ding hi. Ahi hangin misi kithokiksak lo takpi hileh Pasian in amah a thokiksak lo hi ding hi.

¹⁶Ahang in, misi kithokiksak lo hileh Christ zong a kithokiksak nai lo lai hi ding hi.

¹⁷Tua hi-a, Christ kithokiksak lo hileh na upna uh a mawkna hi-a na mawhnate uh sungah a om lai na hi ding uh hi.

¹⁸Tua ciangin Jesu sunga a ihmu masate zong a mangthang ahi ding uh hi.

¹⁹Tu i nuntak sunga ding bekin Christ sunga lametna nei i hileh mi khempeuh sangin a hehpih huaizaw i hi ding hi.

²⁰Ahi hangin misi pan Christ kithokiksak zo takpi-a a ihmusate lak pan gahmasa ahi hi.

²¹Ahang in, mi khat tungtawnin sihna hong tun mah bangin misi thawhkikna zong mi khat mah tungtawnin hong tung hi.

²²Ahang in, Adam sungah mi khempeuh a sih bangin Christ sungah mi khempeuh a kinungtasak ding hi.

²³Ahi hangin mi khempeuh amau hun ciat hi ding uh hi. A gahmasa Christ ahi hi; tua ciangin ama hong pai ciangin ama mite a tho kik ding uh hi.

²⁴Tua ciangin amah in ukna thuneihna le vangliatna khempeuh a suksiat khit, Pa Pasian tungah kumpi-gam a piakkhiat ciangin beina a tung ding hi.

²⁵Ahang in, amah in a galte khempeuh a khepek nuai-ah a koih mateng a uk ding hi.

²⁶A kisusia ding gal nunung pen sihna ahi hi.

²⁷Ahang in, amah in, "A khepek nuai-ah na khempeuh koih zo hi" a[45] Ama nuai-ah "Na khempeuh" a cih ciangin Christ nuai-ah na khempeuh a koihpa Pasian a gen khak loh lam kitel hi.

²⁸Amah in hih a sep khit ciangin Pasian pen na khempeuh ah na khempeuh ahi theih nadingin ama nuai-ah na khempeuh a koihnapa Tapa mahmah zong ama nuai-ah a koih ding hi.

²⁹Tua hi-a thawhkikna om lo hileh misi adinga kibaptise-te in bang hih ding uh ahi hiam? Misi kithosak lo hileh bang hanga amaute adingin mite kibaptise uh ahi hiam?

³⁰Kote adingin bang dinga a nai simin ko le ko kilausak ka hi uh hiam?

³¹Sanggamte aw, nisimin ka si hi - ka cih pen i Topa Christ Jesu sungah note kong minthanpih bang tektek hi, ka cihnopna ahi hi.

³²Mihing ngaihsutnate hang lelin Ephesus a gamsa gilote tawh ka kilai leh bang lawhtak ka hi hiam? Misi kithosak lo ahileh, "Zing cianga si ding i hi manin ne-in dawn lel ni" b[46]

³³Mi khemsa-in om kei un: Kikholhpih hoih lo in tatzia hoih siasak hi."

³⁴Note ahi ding bangin kiphawk kik unla, mawh nawn kei un; Pasian phawk lo pawlkhat om na hi manun na maizum nadingun hih thu kong gen hi.

³⁵Ahi hangin mi pawlkhat in, "Misite bang kici thawhkiksak hiam? Amaute bangci pumpi hong hi ding hiam?" ci-in dong thei kha ding hi.

³⁶Haihuai na zen e! Na tuh pen a sih phot kei leh a hing thei kei hi.

³⁷Na tuh ciangin a kungpi ding pen na suan kei hi; mangbuh ci ahikeh adang khatpeuh na tuh hi.

³⁸Ahi hangin Pasian in ama geelsa bangin kung guana, khaici nam tekah amau kung ciat a guan hi.

³⁹Sa khempeuh a kibang kim kei hi. Mihing in sa nam khat i nei hi. Gamsate in atuam, vasate in atuam, ngasate in atuam a nei hi.

⁴⁰Van pumpite zong om-a lei pumpite zong a om hi; ahi hangin van pumpite a thupina nam khat hi a, lei pumpite a thupina a namtuam khat ahi hi.

⁴¹Ni in thupina nam khat nei a, kha in adang khat nei-in, aksite in zong adang khatmah a nei uh hi. Aksi ciatciat zong a thupina a kibang kei hi.

⁴²Misite thawhkikna zong tua tawh a kibang ding hi. A kituh pumpi a sia thei ahi hi. A sia thei loin a kithokiksak hi;

⁴³a simmawh huai-in kituh a, minthanna in kithokiksak hi. A thanemin kituh a, a vanglianin kithokiksak hi;

⁴⁴pianpih pumpi-in kituh a, kha pumpi in kithokiksak hi. Pianpih pumpi om ahileh kha pumpi zong a om hi.

⁴⁵Tua ahi ciangin "Mi masa Adam, a nungta mi suak hi." c[47] ci-in kigelh hi. A nunung Adam, nuntakna a pia kha ahi hi.

⁴⁶Ahi hangin khalam a om masa kei a, pianngei om masa-in tua khit ciangin khalam a om pan hi.

⁴⁷Mi masapen leitang vui tawh kibawl hi a, a nihna mi vantung pan ahi hi.

⁴⁸Lei mipa bangin lei mite a om uh hi. Vantung pana mipa bangin vantung a te a om uh hi.

⁴⁹Lei mipa tawh kibatna i neih bangin eite d[48] in vantung pana mipa tawh kibatna i nei ding hi.

⁵⁰Sanggamte aw, si le sa in Pasian gam a luah thei kei hi, a kisia thei na in a kisia thei lo na a luah thei kei hi, cih note tungah kong pulak hi.

⁵¹Ngai un, thuthuk khat kong gen ding hi: Eite khempeuh i ihmu kim kei ding hi.

⁵²Ahi hangin a nunung pengkul a mut ciangin thakhat thu mitphiat khat sungin i vekpi-in i kikhel ding hi. Ahang in, pengkul hong ging dinga, misite a sia thei lo dingin kithosak dinga eite i kikhel ding hi.

⁵³Ahang in, a siatheite in siat theihlohna silhin, a si theite in sihtheihlohna a silh ding hi.

⁵⁴A sia theite in siat theihlohna silh-a a si theite in sih theihlohna a silh ciangin: "Gualzawhna sungah sihna kivalhtum zo hi." e[49]

⁵⁵"Sihna aw, na gualzawhna koi-ah om hiam! Sihna aw, na gu koi-ah om hiam?" f[50] ci-a kigelh thu a tung ding hi.

⁵⁶Sihna gu in mawhna hi-a mawhna vangliatna in thukham ahi hi.

⁵⁷Ahi hangin Pasian tungah lungdamna om ta hen! Amah in eite Topa Jesu Christ tungtawnin gualzawhna hong pia hi.

⁵⁸Tua ahi manin kong it sanggamte aw, kiptakin ding un. Bangmah kilokzosak kei un. Topa sungah na nasepna uh a mawkna ahi loh lam thei na hi uh ciangin Topa nasem dingin nomau mahmah na kipum piak tawntung un.