Read Zokam 1 Corinth-te 16 Bible Online

1 Corinth-te 16 - Zokam bible

1 Corinth-te 16

¹Tu-in Pasian mite ading kaihkhopna thu: Galatia pawlpite hih dinga ka gen bangin na hih un.

²Kong pai cianga kaihkhop a kul nawn lo dingin nipi kalkhat a ni masapen simin na sum ngahzah uh tawh kizui-in sehkhia ciat unla, na koih un.

³Kong tun ciangin no hoihsak mite thu ka pulakna lai ka gelh dinga, na letsongte uh tawh Jerusalem ah amaute ka puasak ding hi.

⁴Kei zong ka va pai ding a kul leh amaute ka tonpih ding hi.

⁵Macedonia gam tawna pai ding ka hi manin Macedonia ka nawk khit ciangin no kiangah kong pai ding hi.

⁶Note kiangah tomkha sung bang kong taam thei kha ding hi. Ahi kei leh ka paina peuhpeuha ka khualzinna nong huh theih nadingun phalbi sung nangawn ka taam kha ding hi.

⁷Tu laitakin ban pak ding bek ka ut kei hi. Topa in hong phal leh no kiangah tawmvei sung kong taam ding ka lamen hi.

⁸Ahi hangin Pentecost ni dong Ephesus ah ka taam ding hi.

⁹Bang hang hiam cih leh kei adingin a lawhcin huai nasep theihna kong lianpi khat hong kihon zo hi. Ahi zongin kei hong langpan tampi a om hi.

¹⁰Timothy hong pai leh no kiangah a om sung bangmah a kihtak loh nadingin na bilpil un. Ahang in, amah zong keimah banga Topa na a sem den ahi hi.

¹¹Tua ahi ciangin amah san ding kuamah in nial kei hen. Kei kiangah hong ciah kik theih nadingin a khualzinna ah lungmuangtakin na kha un. Amah sanggamte tawh hong tonkhawm dingin ka lamen hi.

¹²I sanggampa Apolos tawh kisai-in: Sanggamte tawh no kiangah pai dingin nakpitakin ka kun hi. Tu-in hong pai nop het loh hangin hun hoih a neih peuhpeuh ciangin hong pai ding hi.

¹³Note kikem un, upna-ah kiptakin ding un; pasal hangte hi un, thahat un.

¹⁴Na khempeuh itna tawh sem un.

¹⁵Stephanas-te innkuan Achaia ah a piangthak masapente hi uh a, amaute mahmah zong misiangte nasepna ah a kipumpiak zo mahmah uh ahilam na thei uh hi.

¹⁶Sanggamte aw, hih bang mite le amau naseppihte khempeuh le tua lai-a nasem mite tungah na kiniamkhiat ding uh kong thum hi.

¹⁷Stephanas, Fortunatus le Achaicus-te hong tun uh ciangin ka nuam hi. Bang hang hiam cih leh note tung pan a kisam laiteng amaute in hong puak uh hi.

¹⁸Ahang in, amaute in kei lungsim le no aa zong hong thakhauhsak uh hi. Tua bang mite a phawktak hi.

¹⁹Asia gam sunga pawlpite in hong hopih uh hi. Aquila le Priscilla a[51] te in Topa sungah lungsimtak tawh hong hopih uh a, amau inn a kikhawm pawlpi mite in zong hong hopih uh hi.

²⁰Hih lai-a om sanggamte khempeuh in zong hong hopih uh hi. Kinapna siangtho tawh khat le khat na kihopih un.

²¹Keimah Paul in hih hopihna keima khut tekteka ka gelh ahi hi.

²²Mi khatpeuh in Topa a it kei leh hamsiatna thuak ta hen. Topa aw, hong pai ta in! b[52]

²³Topa Jesu hehpihna note tawh om ta hen.

²⁴Christ Jesu sunga om note khempeuh tawh ka itna om ta hen. Amen. c[53]