Read Zokam 1 Corinth-te 3 Bible Online

1 Corinth-te 3 - Zokam bible

1 Corinth-te 3

¹Sanggamte aw, khamite kianga gen bangin note kiangah kong gen thei kei hi. Ahi hangin samite Christ sunga naupangnote kianga gen bangin kong gen hi.

²Note in antak ne zo nai lo na hi manun antak hong pia loin nawizu kong pia hi. Hitakpi hi, tu dongin na ne zo nai kei uh hi.

³Note na sami lai uh hi. Note sungah kihazatna le kitotna a om lai nungsang, note sami lai hi lo na hi uh hiam? Note mihing lel banga gamta hi lo na hi uh hiam?

⁴Ahang in, khat in, "Ken Paul ka zui hi," ci a, adang khat in,"Ken Apolos ka zui hi," a cih ciangin note mihing lel mah hi lo na hi uh hiam?

⁵Bangbang hi ta leh Apolos bang hi peuhmah hiam? Paul zong bang hi mawk hiam? Amaute tungtawna na up theih nadingun amaute sep dinga Topa in a guat ciat nasemte hi bek uh hi.

⁶Keimah in a ci ka tuh a, Apolos in tui buak hi, ahi hangin Pasian in a khangsak hi.

⁷Tua ahi ciangin a khangsakpa Pasian bek longal a tuhpa ahi-a tui buakpa ahi zongin bangmah ahi kei hi.

⁸A tuhpa le tuibuakpa a tup uh a kibang hi a, a sepna uh tawh kizui-in pahtakman kipia tuak ding hi.

⁹Ahi hangin kote Pasian tawh nasem khawmte ka hi uh a, note Pasian inn Pasian lo na hi uh hi.

¹⁰Pasian in hong piaksa hehpihna zangin inn lam siampa bangin bulkip khat ka phut zo a, midang khatpeuh in tua tungah a lam hi. Ahi hangin mikim in a lamdan pilvang uh hen.

¹¹Ahang in, khat a kiphutsa Jesu Christ longal bulkip dang peuhmah kuamah in a phut thei kei hi.

¹²Mi khatpeuh in hih bulkip tungah kham, ngun, suang manphate, sing, lopa keu ahikeh buhtu zangin a lam leh,

¹³tua Ni in tua nasep khuavak ah pholak ding ahi manin ama nasep bang ahi hiam cih a kilakkhia ding hi. Mei tawh tua nasep kilakkhia dinga, mei in mikim nasep ahina bangbang a zia-et ciat ding hi.

¹⁴A lamsate bangmah a cih kei leh ama pahtakman a ngah ding hi.

¹⁵A kattum leh a sum ding hi; amah bek mah suakta dinga, ahi hangin meikuang laka suakta bang lelin a suakta ding hi.

¹⁶Note mahmah Pasian biakinnpi hi-in, note sungah Pasian Kha a ten lam thei lo na hi uh hiam?

¹⁷Pasian biakinnpi siangtho a, note tua biakinnpi na hi manun, mi khatpeuh in Pasian biakinnpi a suksiat leh Pasian in amah a susia ding hi.

¹⁸No le no kikhem kei un. Note lakah mi khatpeuh in tu khanghun tawh kituaka pil a kisak leh a pil a suah theih nadingin a "hai" suak hen.

¹⁹Ahang in, hih leitung pilna Pasian mitmuh ah haina ahi hi. "Amah in a pilte amau zuau siamna a[9] ah a man hi" a cihleh

²⁰"Topa in a pilte ngaihsutna a mawkna hi, cih a thei hi" b[10] ci-a kigelh bang ahi hi.

²¹Tua ahi tak ciangin mihingte kisaktheihpih ding ahi nawn kei hi. Na khempeuh no aa hi a,

²²Paul ahi-a, Apolos ahi-a, Cephas c[11] ahikeh leitung ahi-a, nuntakna ahi-a, sihna ahi-a, tu hun ahi a, mailam hun ahi zongin - a vekpi-in no aa hi-a,

²³note Christ aa hi-in, Christ Pasian aa ahi hi.