Read Zokam 1 Corinth-te 4 Bible Online

1 Corinth-te 4 - Zokam bible

1 Corinth-te 4

¹Tua ahi ciangin mite in kote Christ nasemte le Pasian thusim a kemte bangin hong ngaihsut ding uh ahi hi.

²Kep ding a kipiakna mite a muanhuai pelmawh ding uh kisam hi.

³Note na hi uh a, leitung thukhen zum khatpeuh ahi zongin kei tungah thu nong khen uh hangin phamawh ka sa kei hi; a taktakin kei le kei nangawn thu ka kikhen kei hi.

⁴Kisuantakna ka nei kei hi, ahi hangin tua in kei mawhpeng hong suaksak tuan lo hi. Kei tunga thukhenpa Topa ahi hi.

⁵Tua ahi ciangin a kisehsa hun a tun matengin bangmah thu na khen kei un; Topa hong pai ding ngak un. Amah in khuamial sunga kiselsimte khuavak ah pusuahkhia dinga, mihing lungtang tupnate a pholakkhia ding hi. Tua hun ciangin mikim in Pasian tung pan phatna a ngah ciat ding uh hi.

⁶Sanggamte aw, tu-in no phattuam nadingin "Akigelhsa khengin pai kei in" cih thu a khiatna kote panin na sin theih zawk nadingun hih thute kei mahmah le Apolos tungah ka bulh hi. Tua hi-a mi khat sangin midang khat na kisaktheihpih zaw kei ding uh hi.

⁷Ahang in, kua in note midang khatpeuh tawh a kibang loin hong bawl ahi hiam? Na ngah loh uh bang nei na hi uh hiam? A ngah na hi uh leh bang hangin a ngah lo bang kekin kisathei na hi uh hiam?

⁸Na deih khempeuh uh na nei khin uh hi! A hau khin na hi uh hi! Kote tawh loin kumpi na suak khin uh hi! Note tawh kumpi ka suahkhawm theih nadingin kumpi suak takpi le uh cin ka ut mahmah hi!

⁹Pasian in ko sawltakpite, kidemna muna mihonpite meizoma thah dinga kimawh paihsa mite tawh kibanga hong koih tawh kibang ka sa hi. Kote, khuavannuai buppi-a om vansawltakte le mihingte etnop lelin hong kinei hi.

¹⁰Christ adingin kote a hai ka hi uh a, ahi hangin note Christ sungah na pil mahmah uh hi! Kote ka thanem uh a, note na thakhauh uh hi! Note hong kipahtawi-a, kote hong kisimmawh hi!

¹¹Tu hun laitak mahmah in ka gil uh kialin ka dang uh taka, puansiapi silhin, mi ngongtatna ka thuak uh a, inn loin ka om uh hi.

¹²Ka khut uh tawh nakpi-in na ka sem uh hi. Hong kihamsiat ciangin thupha ka pia uh hi; hong kibawlsiat ciangin ka thuak keikai uh hi.

¹³Hong kigensiat ciangin kamkhumin ka thuk uh hi. Tu hun mahmah ciang dong leitung deih loh leitang tunga ninpathem bang ka suak uh hi.

¹⁴Hih lai note maizumsak nadinga ka gelh hi loin ka it ka tate banga kong vauhilhna hizaw hi.

¹⁵Christ sungah hong kem tulsawm bang na nei zawzen uh zongin pa tampi na nei kei uh hi. Ahang in, lungdamna-thu tungtawnin Christ Jesu sungah note pa ka suak hi.

¹⁶Tua ahi manin note in kei nong etteh ding uh kong thum hi.

¹⁷Hih thu hangin Topa sungah a muanhuai ka it ka tapa Timothy no kiangah kong sawl hi. Amah in mun khempeuh a, pawlpi khempeuh ah ka thu hilh tawh kituaka, Christ Jesu sunga ka nuntak zia note hong phawksak ding hi.

¹⁸Note kiangah kei hong pai nawn lo ding bangin note pawlkhat na ki-uangsak uh hi.

¹⁹Ahi hangin Topa in hong awi leh no kiangah kong pai baih dinga, tua ciangin hih a ki-uangsak mite kampauzia bek hi lo, bang vangliatna nei uh hiam, cih ka mukhia ding hi.

²⁰Ahang in, Pasian gam pen genzawh thu hi loin, vangliatna hizaw hi.

²¹Note kiangah satna ciang tawh hong pai ding ka hi hiam? Itna le lungnemna tawh hong paizaw ding ka hi hiam? Bang teelzaw na hi uh hiam?