Read Zokam 1 Corinth-te 8 Bible Online

1 Corinth-te 8 - Zokam bible

1 Corinth-te 8

¹Tu-in milim thoihna an tawh kisai-in: Eite khempeuh in theihna i neih lam i thei tek hi. b[18] Theihna in mi kisatheisak a, itna in a khansuah hi.

²Ka thei hi ci-a a kingaihsun mi in ama theih ding zah a thei nai kei hi.

³Ahi hangin Pasian a it mi Pasian in a thei hi.

⁴Tua tak ciangin milim thoihna an nekna thu panin milim pen, leitung ah bangmah a hi lopi hi-a Pasian khat longal adang om lo cih i thei hi.

⁵Ahang in, vantung ahi-a leitung ahi zongin pasian a kicite om taleh zong ("pasiante" tampi le "topate" tampi om takpi hi.)

⁶eite adingin Pasian khat bek om a, amah Pa hi-in, na khempeuh amah panin pianga eite ama adingin i nungta hi; tua ciangin Topa khat bek om a, amah Jesu Christ ahi hi; ama tungtawnin na khempeuh pianga, ama tungtawnin eite i nungta hi.

⁷Ahi hangin mi khempeuh in hih thu a thei kim kei hi. Mi pawlkhatte milim biak zongsang khin lua uh ahi manin tua bang ante a nek uh ciangin milim thoihna-a kizangsa ci-a ngaihsunsa-in a ne uh hi. Amau kitheihna lungsim thanem ahi manin a buah a suak uh hi.

⁸Ahi hangin an in Pasian tawh hong kinaisak tuan kei hi. I nek loh hangin i siazaw tuan kei a, i nek hangin zong i hoihzaw tuan kei hi.

⁹Bangbang ahi zongin na suahtakna uh na zatna uhah a thanemte adingin kimuktukna a suah loh nadingin kidawm un.

¹⁰Ahang in a kitheihna lungsim thanem mi khatpeuh in theihna a nei nang milim biakna inn sungah an na nek hong mu leh milim thoihna-a kipiate a nek ding uh maingal kha lo ding uh ahi hiam?

¹¹Tua ciangin ama adinga Christ a si, a thanem sanggampa nang theihna in a siasak ahi hi.

¹²Hih bangin na sanggamte uh tunga na mawh uh a, a thanem amau kitheihna lungsim na liamsak beh uh ciangin Christ tunga mawh na hi uh hi.

¹³Tua ahi manin ka annek in mawhna sungah ka sang gampa a puksak leh amah ka puksak loh nadingin sa ka ne nawn peuhmah kei ding hi.