Read Zokam 1 Corinth-te 9 Bible Online

1 Corinth-te 9 - Zokam bible

1 Corinth-te 9

¹Kei suakta hi lo ka hi hiam? Sawltakpi khat hi lo ka hi hiam? I Topa Jesu mu khin hi lo ka hi hiam? Topa sunga ka nasepna gah note hi lo na hi uh hiam?

²Adangte tungah sawltakpi ka hi kei kha zongin note adingin ka hi taktak hi! Ahang in, Topa sungah sawltakpi ka hina ciamtehna, note na hi uh hi.

³Kei tunga thukhena tute tungah ka kihutna hih ahi hi.

⁴A ne a dawn dingin thuneihna nei lo ka hi uh hiam?

⁵Sawltakpi dangte Topa sanggamte le Cephas a[19]-te bangin thu um mi zi neih theihna thuneihna nei lo ka hi uh hiam?

⁶Ahikeh kivakna nasem ding Barnabas le kei bek ka hi uh hiam?

⁷Ama sum zanga galkap na a sem kua ahi hiam? Lenggui suan napi lenggah ne lo kua ahi hiam? Ganhon khawi napi a nawi dawn lo kua ahi hiam?

⁸Mihing muhna lel ah hih thu a gen ka hi hiam? Thukham in zong tua mah gen hi lo ahi hiam?

⁹Ahang in, Moses thukham sungah "Bawngtal in buh a cil laitakin a muk hencip kei in" b[20] ci-in kigelh hi. Pasian lunghimawh bawngtalte ahi hiam?

¹⁰Amah in eite adingin hih thu gen takpi hi lo ahi hiam? Himah hi, eite adinga kigelh ahi hi. Bang hang hiam cih leh lokhopa in lo a khawh a, ancilpa in an a cil ciangin a gah ngah ding lamena a sep ding mah ahi hi.

¹¹Kote in note lakah khalam khaici vawhin note pan leitung nate ka at uh val lua ahi hiam?

¹²Midangte in note panin hih huhna thuneihna ngah uh ahileh kote in a tamzaw san ngah lo ding ka hi uh hiam? Ahi hangin hih thuneihna ka zang kei uh hi. Tua tangin Christ lungdamna-thu a khaktan ka suah loh nadingun na khempeuh ka thuak zaw uh hi.

¹³Biakinnpi sunga nasemte in biakinnpi panin an ngah uh a, biakna-tau a nasemte in biakna-tau tunga kiluite a ngah lam thei lo na hi uh hiam?

¹⁴Tua mah tawh kibangin Topa in: Lungdamna-thu a hilhte in, lungdamna-thu panin kivakna a ngah ding uh hi, ci-in thu a pia hi.

¹⁵Ahi hangin hih thuneihnate khat beek ka zang kei uh hi. Kei adingin tua bang nong hih ding uh lamenin lai hong khak ka hi kei hi. Mi khatpeuh in hih kisialhna hong suhkhiat sangin ka si zaw ding hi.

¹⁶Tua hi napi hih teitei dinga phut ka hi manin lungdamna-thu ka hilh ciangin ka kisial thei kei hi. Lungdamna-thu ka hilh kei leh gimna ka thuak hi!

¹⁷Keima utthu-a hilh ka hileh pahtakman ka nei hi. Keima utthu-a hilh ka hi kei leh muanga sep dinga hong kipia a semkhia bek ka hi hi.

¹⁸Tua hileh ka pahtakman ding bang ahi hiam? Lungdamna thu ka hilhna ah ka thuneihna zang lo a, man nei loin ka piak theih nading bek mah ahi hi.

¹⁹Kei suakta-in kuama aa ka hi lo hangin mi a tam theithei ka ngah zawh nadingin mi khempeuh sila ka kisuaksak hi.

²⁰Jew-te ngah nadingin Jew-te tungah Jew-te bang ka suak hi. Thukham nuai-a omte ka ngah theih nadingin(kei mahmah thukham nuai-ah om lo napi) thukham nuai-a omte khat bangin ka om hi.

²¹Thukham nei lote ka ngah zawh nadingin (Pasian thukham pan suakta hi loin Christ thukham nuai-ah omzaw in)thukham nei lote kiangah thukham nei lote khat bangin ka om hi.

²²A thanemte ka ngah theih nadingin a thanemte kiangah a thanem ka suak hi. Mi pawlkhat ka hotkhiat theih nadingin a hih theihna lamlam ah mi khempeuh tungah na khempeuh ka suak hi.

²³Lungdamna thuphate ah tanh ka neih theih nadingin lungdamna-thu hangin hihte khempeuh ka sem hi.

²⁴Tai kidemna ah a taite khempeuh tai uh a, ahi hangin khat bek in pahtakman a san lam thei lo na hi uh hiam? Pahtakman na san theih nading lam lamun tai un.

²⁵Kidemna-a kihel dingte peuhmah nakpitakin a kisin uh hi. Amaute a kisia thei lukhu ngah dingin a kidem uh hi. Ahi hangin eite in a kisia thei lo ding lukhu ngah dingin i kidem hi.

²⁶Tua ahi manin tupna mel a nei lo mite a tai bangun ka tai kei hi. Huih lak a tum mi bangin ka do kei uh hi.

²⁷Tua bang lel bek hi loin midangte tungah thu ka hilh khit ciangin pahtakman sang dingin ka cinlah phing loh nadingin ka pumpi tumin sila in ka bawl hi.