Read Zokam 2 Corinth-te 1 Bible Online

2 Corinth-te 1 - Zokam bible

2 Corinth-te 1

¹Pasian deihna hanga Christ Jesu sawltakpi Paul le i sanggampa Timothy in, Corinth a Pasian pawlpi tung le Achaia gam sung tenga misiangte khempeuh tungah:

²I Pa Pasian le Topa Jesu Christ tung pana hehpihna le lemna no tungah om ta hen.

³Eite Topa Jesu Pasian le Pa, khuatuahna Pa le hehnepna khempeuh Pasian kiphat ta hen.

⁴Pasian tung pana ka ngah uh hehnepna tawh gim thuakte ka hehnep theih nadingun amah in kote ka gim thuakna khempeuh panun hong hehnem hi.

⁵Ahang in, kote nuntakna sunga hong luang Christ thuaknate bang tektekin Christ tungtawna hong pai kote hehnepna a dimlet hi.

⁶Kote ka lungdon uh leh note hehnepna le hotkhiat nading ahi hi; kote hong kihehnem leh tua in kote thuak bangbang na thuak zawh nading uh note thuakzawhhatna hong guan hehnepna ahi hi.

⁷Ko thuakte bang tektek na thuakna uh le kote hehnepna na ngah manun note adinga ka lametna uh a kip hi.

⁸Sanggamte aw, Asia gama ka thuak uh haksatnate thu theihsak lo-a na om ding uh ka deih kei hi. Nuntakna nangawn khahsuah nading zahin kote thuak zawhzah valin hong kinehcih hi.

⁹Hitakpi hi, ka lungsimun sihna thu khenna a thuak khinin ka kingaihsun uh hi. Ahi zongin ko le ko kimuang loin misite a thosak Pasian ka muan nadingun hih thu a piang ahi hi.

¹⁰Amah in kote tua banga lauhuai sihtheihna panin hong hukhia khin a, hong hukhia lai ding hi. Na thungetna uh tawh nong huhna uh hangin amah in hong hukhia lai ding ci-in amah ka lamen uh hi.

¹¹Tua ciangin mi tampite thungetna dawnga, hehpih angvanna ko tungah hong kipia ahi manin kote a[1] tangin mi tampite in lungdamna a ko kik ding uh hi.

¹²Kote kisialhna hih ahi hi: Leitunga ka gamtatnate uh le a diakdiakin note tawh i kizopna thu ah kote ngaihsutna zang loin Pasian tung pana sianthona le cihtakpina tawh ka gamtatna uh ka lungsim kitheihna un teci a pang hi. Kote in leitung pilna tawh kizui-in hih loin Pasian hehpihna tawh kizui-in tua bangin ka hih uh hi.

¹³Ahang in, note in na sim theih loh ding uh le na theihtel loh dingun bangmah kong gelh kei uh hi.

¹⁴Tua ciangin note in kote a kim lo-a nong theihsa uh bangin Topa Jesu ni ciangin kote in note kong kisialhpih ding bangun note in zong kote hong kisialhpih thei ding ci-in a cingtaka na theihtel takpi ding uh ka lamen hi.

¹⁵Hih mah ka muan manin nihvei na hamphat theih nadingun note kianga hawh masak dingin ka geel hi.

¹⁶Macedonia a ka pai kawmin no kiangah hong hawhin, Macedonia pan kong ciah ciangin hong bang leuleu lenga, Judea ka manawh ciangin hong kha le uhcin ci-in ka geel hi.

¹⁷Hici-a ka geel ciangin baihtaka geelziau ka hi hiam? Ahikeh lei mite hih bangin, Hihi, hihi," le "Hikei, hikei," cih a thuah lel ka hi hiam?

¹⁸Ahi hangin Pasian a muanhuai takpi bangin kote in note tunga kong thupuak uh, "Hihi," le "Hikei," a hikhawm kei hi.

¹⁹Ahang in, note lakah kei le Silas a[2] le Timothy in kong hilh uh Pasian Tapa Jesu Christ thu ah, "Hihi" le "Hikei," cih a hikhawm kei hi. Ahi hangin ama sungah, "Hihi," cih a hiden hi.

²⁰Ahang in, Pasian in bangzah ta in thuciam a bawl khin zongin tuate Christ sungah,"Hihi," cih ahi khin hi. Tua ahi ciangin ama tungtawnin Pasian minthan nadingin eite in, "Amen," i ci hi.

²¹Tu-in Christ sungah note le kote kiptaka hong ding khawmsakpa Pasian ahi hi.

²²Amah in eite sathau hong nilh zo a, ama hong neihna seal eite tungah hong khenin, hong tung ding ciamna-in khamkholhna ama Kha eite lungsungah hong koihsak hi.

²³Corinth ah kong kileh kik lohna note kong dopna ahilam ka teci ding Pasian ka ko hi.

²⁴Note upna tunga kiliansak hi loin, note na upna hangun kiptaka ding na hi manun, na lungnop nadingun no tawh a semkhawm ka hizaw hi.