Read Zokam 2 Corinth-te 10 Bible Online

2 Corinth-te 10 - Zokam bible

2 Corinth-te 10

¹Note tawh i kimaituah cianga "zahkai" a, i kigamlat cianga "hang san" pa keimah Paul in Christ lungnemna le migitna pansanin kong ngen hi!

²Hih leitung mite gamtat bangin gamta-a hong ngaihsun mi pawlkhat tungah, kong pai ciangin hangtaka cih ka sawm bangin cih a kul loh nadingin kong thum hi.

³Ahang in, leitunga teng ka hi uh hangin leitung mi bangin gal ka do kei uh hi.

⁴Kote galdona galvante leitung galvante ahi kei hi. Tuate tawh kilehbulhin, akip mahmah kulhte phel nading Pasian vangliatna a neizaw hi. Kitotnate le

⁵Pasian theihna langdo-in, kipilsaknate khempeuh ka phelkhia uh a, Christ thu a mang dingin ngaihsutna khempeuh salin ka kai uh hi.

⁶Note thuman’na khatvei-a a kicin siang nak leh thuman’lohna nasep peuhmah gawtna pia dingin kigingsa in ka om ding uh hi.

⁷Note in nate a pualama kilangkhia bekin na en uh hi. a[15] Mi khatpeuh in: Christ aa ka hi hi, ci-a a kimuan leh amah tawh kibang zahin kote zong Christ aa ka hilam uh ngaihsun kik hen.

⁸Ahang in, note hong phelgawp ding hi lo, hong laamto dinga Topa hong piak thuneihna kidaam lo-a a suang ka hileh zong ka zumpih kei ding hi.

⁹Ka laikhakte tawh note hong linthawn ka bat ding ka ut kei hi.

¹⁰Ahang in, mi pawlkhat in, "A laikhakte gikin khauh naven, amah taktakin mi lungsim kuai zo kei, a thugen zong bangmahpi hi kei," hong ci uh hi.

¹¹Tua bang mite in no kiangah om lo-a, ka laikhakte uh sunga ka gelh bangbangun note kianga ka om ciangin zong ka hih ding uh ahilam phawk uh hen.

¹²Amau le amau a kiphat mi pawlkhatte laka kihel ahikeh a kitehkak ngam ka hi kei uh hi. Amau le amau mah kitehin, amau le amau mah a kitehkak uh ciangin amau a pil ahi kei uh hi.

¹³Kote ka hi uh leh a kilawm zah valin ka kisial kei uh a, bangbang ahi zongin Pasian in kote adinga hong sehsaksa zah note nangawn hong huamkha ciangah ka kisial ding uh hi.

¹⁴Note kiang hong tung khin lo bangin aval akanin ka kisial kei ding uh hi. Ahang in, Christ lungdamna-thu tawh no ciangciang kong ban khin ta uh hi.

¹⁵Ko adinga kisehsa valin midangte nasepsa a kisialhpih zong ka hisam kei uh hi. b[16] Kote lametna ahileh na upna uh a khantohna bangbangin note laka ka nasepna uh nakpi-a a zai semsem nading ahi hi.

¹⁶Tua banga note khena gamte ah zong lungdamna-thu ka gen theih nading uh ahi hi. Ahang in, midangte gamhuam sunga na kisemsa ka kisialhpih nuam kei uh hi.

¹⁷Ahi hangin, "A kisial mi, Pasian sungah kisial ta hen," c[17]

¹⁸Ahang in, amah le amah a kiphatte kuamah in sang lo-a Topa in a phat mi kisang hi.