Read Zokam 2 Corinth-te 12 Bible Online

2 Corinth-te 12 - Zokam bible

2 Corinth-te 12

¹Ka kisial lailai ding hi. Met nading bangmah a om kei zongin Topa tung pana mangmuhnate le kilaaknate ka gen lai ding hi;

²a kilato Christ sunga mi khat ka thei hi. A beisa kum sawm le li lai-in van thumna-a kila to, a pumpi-in maw, a pumpi loin maw, cih ka thei kei a, Pasian in a thei hi.

³Hih mipa ka thei-a a pumpi-in hiam, a pumpi tawh kikhen hiam, ka thei kei hi; ahi hangin Pasian in thei-a,

⁴paradise ah kilato hi. Amah in genkhiat theih loh nate, mihing gen dinga kiphal lo nate a za hi.

⁵Tua bang mipa ka kisialhpih dinga ahi hangin kei tungtang ah ka thanemnate longal ka kisialhpih kei ding hi.

⁶Thutak gen ding ka hi manin kisial nuam leng zong mihai ka hi kei ding hi. Ahi hangin ka thugen le ka nasepna in a kilatsak zah vala kuamah in hong ngaihsut loh nadingin ka kidawm hi.

⁷Hih a lian pha mahmah kilaaknate hanga ka ki-uatsak luat loh nadingin kei hong gimsak ding, ka ci-le-sa sungah ling khat - Satan thupuapa khat kei hong kipia hi.

⁸Kei tung panin tua hong kilakkhiatsak nadingin Topa tungah thumvei ka ngen zo hi.

⁹Ahi hangin amah in, "Ka hehpihna nang adingin kicing hi; ahang in, thanemna sungah ka vangliatna kicing hi," hong ci hi. Tua ahi manin Christ vangliatna kei tungah a om theih nadingin lungdam semsemin ka thanemna ka kisialhpih ding hi.

¹⁰Tua hi a, thanemnate, simmawhnate, thuaksiatnate, bawl-siatnate, haksatnate sunga ka lung-nopna Christ hang ahi hi. Ahang in, ka thanem ciangin ka tha a khauh hi.

¹¹Keimah le keimah mihai kong kisuah a, ahi hangin note in tua banga nong bawl uh ahi hi. Note in kei nong phat ding uh ahi hi. Ahang in, bangmah ka hi lo hangin "sawltakpi-pente" sangin neucik zong ka niamzaw peuhmah kei hi.

¹²Sawltakpi khat kiciamtehna limte alamdangte le nalamdangte note lakah lungduaitakin kibawl zo hi.

¹³Note adingin vangik ka suah lohna lobuang pawlpi dangte sanga na niam zawkna uh bang om ahi hiam? Hih ka tatkhialhna hong maisak un.

¹⁴Tu-in a thumveina note kiangah hong hawh dingin ka kithawi zo hi. Na neihsate uh deih ka hi kei hi, kei deih note hizaw na hi manun note adingin vangik ka suak kei ding hi. A taktakin, tate in nu le pate ading a khol ding uh hi loin nu le pate in tate ading a khol ding uh hizaw hi.

¹⁵Tua ahi ciangin note adingin ka neihsa khempeuh lungdamtakin pia-in kei mahmah nangawn ka kizang nuam hi. Ken note kong it semsem leh note in kei hong it lo semsem ding na hi uh hiam?

¹⁶Tua pen ahi hi, himai ta hen, note adingin vangik ka suak kei hi. Tua hi napi khemsiamin note khembawlin note hong man ka hi ve maw!

¹⁷No kianga kong sawlte khatpeuh zangin a met lakna-in hong zang ka hi hiam?

¹⁸No kianga pai dingin Titus ka kun-a, i sanggampa kong zuisak hi. Titus in note a met lakna-in hong nei lo hi, hong nei ahi hiam? Ka lungsim uh kibangin lam khat zuikhawm lo ka hi uh hiam?

¹⁹Note tungah kote a kihu nilohin hong ngaihsun lai na hi uh hiam? Christ sunga omte bangin Pasian mitmuh a thu gengen ka hi uh hi. Tua hi-a kong it lawmte aw, ka hih khempeuh uh note thakhauhsak nading ahi hi.

²⁰Ahang in, kong pai cianga note na hi ding uh kong deih banga kong muh loh khak ding le note in kei ka hi dinga nong deih bangua nong muh loh khak ding uh ka lau hi. Kitotna, kihazatna, heh-a kiselnate, kipawlkhennate, kidaisakna, kigensiatna, ki-uatsakna le buaina a om khak ding zong ka lau hi.

²¹Note kiangah kong pai kik ciangin ka Pasian un note mai-ah hong niamkhiatin nidanga na khialhnasa uh: kihuai-gamtatna, numei-pasal mawhna, huk luatna lanluatnate hangin mawh napi a kisik lo mi tampite hangin ka dah khak ding ka lau hi.