Read Zokam 2 Corinth-te 2 Bible Online

2 Corinth-te 2 - Zokam bible

2 Corinth-te 2

¹Tua ciangin note a dahsaka kong hawh nawn loh nadingin ka lungsim ka khensat hi.

²Ahang in, note hong dahsak leng kong dahsak note longal kei hong nuamsak ding kua dang om ahi hiam?

³Kong pai ciangin kei hong lungnuamsak dinga kilawmte in hong lungkhamsak loh nadingin hih bangin lai kong gelh hi. Kei lungnopna hong lungnoppih dingin note khempeuh tungah muanna ka nei hi.

⁴Ahang in, note kong lungkhamsak nopna hi loin kong itna athukzia kong theihsak nopna-in lungdonna lianpi, lungsung natna le khitui tampi tawh lai hong gelh ka hizaw hi.

⁵Ka uanggenna hi loin mi khatpeuh in lungkhamna a piansak leh note khempeuh hong lungkhamsakna zahin kei hong lungkhamsak lua kei hi.

⁶Mi a tamzawte in ama tungah gawtna a piak uh ama adingin kicing khin hi.

⁷Tu-in ahileh tua sangsikin amah a khengvala dahna in a vukcip loh nadingin maisakin na hehnep zawk ding uh kisam hi.

⁸Tua ahi manin amah na itna uh kipsak kik dingin note kong kun hi.

⁹Lai kong gelhna pen note in zia-etna thuak zo-in na khempeuh ah na thumang uh hiam, cih kong zia-etna ahi hi.

¹⁰Note in mi khatpeuh na maisak uh leh kei zong amah ka maisak hi. A mawhna ka maisak khitin maisak ding dang a om lai leh note tangin Christ muhna ah

¹¹Satan in eite hong nopneh loh nadingin amah ka maisak hi. Ahang in, ama hong sawmnate i haih kei hi.

¹²Troas ah Christ lungdamna-thu gen dingin ka pai lai-in Topa in kei ading kong khat hong honsak hi, cih thei napi,

¹³tua lai-ah ka sanggampa Titus mu lo ka hi manin ka lung a nuam kei lailai hi. Tua ciangin amaute mangpha ka khaka, Macedonia ah ka paisuak hi.

¹⁴Ahi zongin Christ hanga gualzawhna ah hong makaih den kote tungtawna ama theihna namtui mun khempeuh ah a kizelsakpa Pasian tungah lungdamna om ta hen.

¹⁵Ahang in, a kihonkhiate le a mangthangte lakah kote, Pasian tungah gimnamtui ka hi uh hi.

¹⁶Khat tungah sihna gimnam ka hi uh a, adang khat tungah nuntakna gimnamtui ka hi uh hi. Tua bang nasem dingin kua kicing ahi hiam?

¹⁷Mi tampite tawh kibang loin met nadingin Pasian thu ka thangbawl kei uh hi. Tua sangsikin Pasian kiang pana kisawl mite bangin Pasian mai-ah cihtakna tawh Christ sungah thu ka gen uh hi.