Read Zokam 2 Corinth-te 5 Bible Online

2 Corinth-te 5 - Zokam bible

2 Corinth-te 5

¹Tu-in eite tenna leibuk a kisiat leh mihing khut tawh kibawl lo, Pasian bawlsa tawntung inn khat vantungah i neih lam i thei hi.

²Tu laitakin vantunga ten nading hong kisilhsak ding lunggulhin i thum i tau hi.

³Bang hang hiam cih leh eite hong kisilhsak ciangin guaktangin i om kei ding hi;

⁴ahang in, eite hih buk sungah i om laitakin hong kigimsaka i tau hi; tua pen silh loh ding i ut man hi loin i vantung tenna hong kisilhsak ding i ut man le a sithei pen nuntakna in a valh ding i ut man hizaw hi.

⁵Tua hi-a hih ding mah a eite hong bawl Pasian in hong tung ding khamkholhna-in Kha hong piakhol zo hi.

⁶Tua ahi manin eite muangtakin i om den a, i pumpi-a i om laitengin Topa kiang tawh i kigamlat lam lah i thei hi.

⁷Eite muhna tawh nungta loin upna tawh i nungta hi.

⁸Eite lungmuangtakin i om a, pumpi nusia-in Topa tawh inn a omkhawm ding i utzaw lai hi, ka ci hi.

⁹Tua hi-a i pumpi inn ah i om a, i om kei zongin amah i lungdamsak ding i tuppi pen ahi hi.

¹⁰Ahang in, eite khempeuh Christ thukhenna tokhom mai-ah i ding pelmawh ding hi. Tua ciangin mi khempeuh in asia ahi zongin apha ahi zongin, pumpi-a a om sunga a hihsate hangin amau ngah dinga kituakte a sang ding uh hi.

¹¹Tua ahi ciangin kote in Topa kihtakzia ding thei ka hi manun mite zol ding ka hahkat uh hi. Kote ka hi bangun Pasian mai-ah a kiteltakin ka kilang uh a, tua pen mah note in zong na lungsim uh tawh na theihtel ding uh ka lamen hi.

¹²Lung sunga om pen hi lo, a kimu thei pen a kisaktheihpihte na dawn theih nadingun note tungah hong kisial kik ka hi kei uh a, kote nong kisaktheihpih nadingun hun hoih hong bawlsak ka hizaw uh hi.

¹³Kote ka hai uh leh Pasian hang ahi hi; ka hai kei uh leh note ading ahi hi.

¹⁴Ahang in, mi khempeuh adingin mi khat si-a, tua ahi manin mi khempeuh si hi, cih taksang takpi ka hi manun Christ itna in kote hong sawl teitei hi.

¹⁵Tua hi-a ama hangin a nungtate amau adingin nungta nawn loin amau adingin si-a, a tho kiksakpa adingin a nuntak theih nadingun amah mi khempeuh tangin a si hi.

¹⁶Tua ahi ciangin tu-a kipan kote in leitung mite muh bangin kuamah ka mu kei uh hi. Khatvei lai-in hih bangin Christ ka na mu uh a, tu-in ka mu nawn kei uh hi.

¹⁷Tua ahi ciangin mi khatpeuh Christ ah a om leh amah piansak thak ahi hi; alui pen beimanga, athak a tung zo hi!

¹⁸Hihte khempeuh Christ tungtawna kote amah tawh hong kilemkiksaka kilemna nasep hong piapa Pasian tung pan ahi hi:

¹⁹Pasian in Christ tungtawnin leitung amah tawh kilemsaka, mihingte mawhna amaute mawhna-in a simsak kei hi. Tua hi-a, tua kilemkiksakna thupuak kote hong kemsak hi.

²⁰Tua ahi manin kote tungtawnin Pasian in hih ngetna hong bawl bangin kote Christ palaite ka hi uh hi. Kote in Christ tangin: Pasian tawh kilemkik un, ci-in kong thum uh hi.

²¹Eite ama tungtawnin Pasian thumaanna i suah theih nadingin Pasian in mawhna a nei lo amah eite adingin mawhna a[6] a suaksak hi.