Read Zokam 2 Corinth-te 8 Bible Online

2 Corinth-te 8 - Zokam bible

2 Corinth-te 8

¹Sanggamte aw, tu-in Macedonia pawlpite tunga Pasian piak hehpih na thu na theih ding uh ka deih hi.

²Amaute nakpi-a zia-et bawlsiatna lak pan, a lungnopna uh a dimletna le a zawn luat mahmahna panun nakpi-a citna nak nei-in a phulto hi.

³Ahang in, amaute in a piak theih zahzah uh le a piak theihzah val nangawn uh a piak lam uh ka theihpih hi. Amau utthu-in,

⁴misiangte ading nasepsakna amau zong hamphatna a tanh theih pah nadingun kote kiangah hong ngen uh hi.

⁵Ko lamet bangin hih loin Topa tungah amau mahmah kipia masa-in tua khit ciangin Topa deihna tawh kituakin ko tungah hong kipia uh hi.

⁶Tua ahi ciangin Titus in a masa lai-a a na patkhitsa ahi manin hih note hehpihna nasep hong zawhpih vet dingin amah ka na kun uh hi.

⁷Ahi hangin note upna, thugenna, theihna, cihtakna khempeuh le kote a[12] nong itna uhah midangte sangin na tungnun zawk uh bangin hih piakna tawh kisai hehpihna ah zong na tungnung zaw un.

⁸Note thu kong pia kei hi. Ahi hangin midangte cihtakna tawh tehin note itna a taktak ahina kong theih nop man ahi hi.

⁹Ahang in, i Topa Jesu Christ hehpihna na thei uh hi; ama zawnna tungtawna na hauh theih nadingun amah a hau hi napi note hangin a zawng hi.

¹⁰Hih thu tawh kisai-in note ading a hoih pen kong thuhilhna in: Nikum in note a pia masa bek hi loin tua banga piak ding a ut masa na hi uh hi.

¹¹Hih dinga utna tawh lawptaka sep na sawm bangun na neih bangbang uh tawh kituak pia-in hih nasep na zosiang un.

¹²Ahang in, utna a om nak leh a neih loh tawh kizui hi loin a neih tawh kizui-a a piak letsong a santak ahi hi.

¹³Midangte vanzansak nadingin note vangik suat hong sawm ka hi kei uh a, a kikim ciat nading a deih ka hizaw uh hi.

¹⁴Amaute hauhna in note tangsapna hong huk kik theih nadingin tu laitaka note hauhna in amaute sapna a hu ding hi.

¹⁵"Tampi a khawmpa in tam lua nei lo a, tawmkha a khawmpa inlah tawm lua a nei kei hi" b[13] ci-a kigelhsa bangin tua ciangin kikim dimdiamna a om ding hi.

¹⁶Keimah in note kong lunghimawh bang lunghimawhna Titus lungsim sunga a guanpa Pasian tungah lungdam ka ko hi.

¹⁷Ahang in, Titus in ka ngetna uh hong thukimpih bek hi loin ama lungsim tup tawmna bangin note kiangah lawptakin hong pai ding ahi hi.

¹⁸Tuateh lungdamna-thu nasepna ah pawlpi mi khempeuh in a pahtak uh sanggampa amah kong zuisak uh hi.

¹⁹Tua banah amah pen sumpi puaka ka pai lai-un kote hong zui dinga pawlpite in a teelpa uh ahi hi. Topa mahmah pahtawi nading le huh nuam ka hina uh lahna-in tua sum piak ka hawm uh hi.

²⁰Citna tawh a kipia hih letsongte ka zek uh ciangin gensiatna ka pelh nuam uh hi.

²¹Ahang in, Topa muh bek hi lo mihingte muh mahmah in zong amaan na sem dingin ka hih theih tawpun ka kidawm uh hi.

²²Tua banah ka sanggampa un lam tampi ah ama lawpna hong latsak tham loin note hong muanna lianpi hangin amau tawh kong sawl uh hi.

²³Titus ahileh note laka ka naseppih le ka kikoppih hi-a, ka sang gam dangte uh ahileh pawlpi palaite le Christ pahtawina ahi uh hi.

²⁴Tua ahi manin note in kong itna uh le kong kisaktheihpihna uh ahang pawlpi in a muhtel theih nadingun hih mite tungah na lak un.