Read Zokam 2 Corinth-te 9 Bible Online

2 Corinth-te 9 - Zokam bible

2 Corinth-te 9

¹Misiangte tunga hih nasepna thu no tungah lai-a gelh ding kisam ka sa kei hi.

²Ahang in, midangte huh nading na lawpna uh ka thei zo a, nikum nungsang no Achaia gama omte a pia dingin a kithawisa-a om cih thu Macedonia gama omte tungah ka kisialhpih densa ahi hi. Tua ciangin note thalawpna in amaute a tamzaw nasep thanuamsak hi.

³Ahi hangin, note kong kisaktheihpihna uh a hawmsuak loh nadingin amaute a kithawisa uh ahi hi, ka cih bangin a kithawisa na hih theih nadingun sang gamte kong sawl hi.

⁴Ahang in, Macedonia-te khatpeuh in kei hong zuih a, note a kithawisa-in hong muh kei leh note kong muan gen mahmahsa ahi manin note gen loh kote zong ka maizum ding uh hi.

⁵Tua ahi ciangin citpiak dinga na ciamsate uh pia dingin kithawikholsa-a na om theih nadingun hong ma hawh dingin sanggamte kut ding kisamin ka um hi. Tua hileh itsa pipi-a piak hi loin phaltaka kipiasa citpiak ahina hong kilang ding hi.

⁶Hih thu ciamteh un: A cil vawh peuhmah in tawmcik at dinga, phaltaka a vawh ziahziah peuhmah in tampi a at ding hi.

⁷Mi khempeuh in piak dinga a lungsima a khensatsa bangin pia uh hen; lungsit pipi ahikeh piak loh phamawh cihna-in pia kei uh hen, ahang in, Pasian in lungtaitaka piate a it hi.

⁸Na kisap khempeuh uh Pasian in nei-a, hun khempeuh ah na khempeuh na hauh theih nadingun nasep hoih tawh note tungah hehpihna khempeuh kicingsak thei hi.

⁹"Amah in a zawngte tungah ama letsongte mun khempeuh ah a hawmthang zo hi; ama thumaanna a tawntungin kipden hi." c[14] ci-in kigelh zo hi.

¹⁰Khaici vawhpa tungah khaici pia a, a an ding anlum a piapa in, na sal ah antang khangsakin note thumaanna gah na khopte uh zong a tamsak semsem ding hi.

¹¹Note hun khempeuh ah na cit theih nadingun hauhna namcinin hong kihausak dinga, tua ciangin kote tung tawnin na citna uh Pasian tungah lungdamkohna suak ding hi.

¹²Hih na nasepna uh Topa mite huhna bek hi loin Pasian tungah lungdam thu genna tampi a dimletna lahna hi lailai hi.

¹³Na kilatkhiatna uh ahi tua nasepna hangin, Christ lungdamna-thu na pulakna uh a zui thuman’na le amaute le mi khempeuh tawh na tanh khop uh na citna uh hangin mite in Pasian a phat ding uh hi.

¹⁴Pasian in a hehpihna a dimletin note hong piakna hangin amaute in note hong lunggulhin thu hong ngetsak ding uh hi.

¹⁵A kigen khin zo lo ama letsong hangin Pasian tungah lungdamna om ta hen.