Read Zokam Galatia-te 1 Bible Online

Galatia-te 1 - Zokam bible

Galatia-te 1

¹Mihing pan hi lo, mite sawl zong hi lo, ahi hangin Jesu Christ le misi pana amah a thosak Pa Pasian sawltakpi Paul le

²kei tawh a omkhawm sang gamte khempeuh in, Galatia a om pawlpite tungah:

³I Pa Pasian le Topa Jesu Christ tung pana hehpihna le lemna note tungah om ta hen.

⁴I Pasian le Pa deihna bangin tu a gilo khanghun pana eite hong hu dingin i mawh nate adingin amah le amah hong kipia Pa

⁵Pasian tungah a tawntung in minthanna om den ta hen. Amen.

⁶Christ hehpihna hanga note hong sampa tawh hizahta a manlangin ki khena, lungdamna-thu adang na sanpah uh lamdang ka sa hi;

⁷tua na san uh lah lungdamna-thu a hi peuhmah kei hi. Mi pawlkhatte in Jesu Christ lungdamna-thu lehkaihin note hong lungbuaisak nuam uh ahi hi.

⁸Ahi hangin kote ka hi uh zongin vantung pana vansawltak khat ahi zongin note kianga kong gen uh ahi lo, lungdamna-thu dang hong hilh a om leh tawntung mawhpaih hi ta hen!

⁹Kote in kong gensa bangun tu-in kong gen kikinah: Mi khatpeuh in na sansa uh lungdamna-thu lo adang hong hilh leh a tawntungin kimawhpaih ta hen!

¹⁰Tu-in mihingte maipha ahikeh Pasian maipha a zong ka hi hiam? Ahikeh mihingte lungdamsak a sawm ka hi hiam? Mihingte lungdamsak a sawm lailai ka hileh Christ nasem ka hi kei ding hi.

¹¹Sanggamte aw, ka hilh lungdamna-thu, mihing bawltawm ahi loh lam na theih ding uh ka deih hi.

¹²Mi khatpeuh tung pana ka ngah hi lo a, hong hilhsak zong ahi kei hi; Jesu Christ tung pan kilaakna-a ka ngah ahi hi.

¹³Ahang in, nidang lai-in Jew biakna ngeina sunga ka nuntak zia, Pasian pawlpi nakpi-a ka bawlsiat zia le suksiat gawp ka sawmzia na za zo uh hi.

¹⁴Ka khangual Jew mi tampi sung panin ka madawk a, ka pate ngeina gumin nakpi-in ka hahkat hi.

¹⁵Ahi hangin ka pian tunga a[1] kei hong sehtuampa le a hehpihna hanga kei hong sampa Pasian in,

¹⁶Gentile-te laka ka gen theih nadingin lungkimtaka a Tapa kei sunga hong kilaaksak lai-in mi khatpeuh ka dong kei hi.

¹⁷Kei ma-a sawltakpi ahi masate tawh kimu dingin Jerusalem ah zong ka paito kei a, ahi hangin Arabia ah paipah in tua khit ciangin Damascus ah ka ciah kik hi.

¹⁸Tua zawh kum thum khit ciangin Peter b[2] tawh kimeltheih dingin Jerusalem ah paito-in ama kiangah ni sawm-le-nga ka taam hi.

¹⁹Topa sanggampa James bek longal sawltakpi dang kuamah ka mu kei hi.

²⁰Note tunga kong gelh thu, zuau ahi loh lam Pasian mai-ah kong theitelsak hi.

²¹Tua khit ciangin Syria le Cilicia ah ka pai hi.

²²Christ sunga om Judea gam pawlpite kuamah in kei hong meltheih kei uh hi.

²³Amaute in: "Tunung lai-a eite hong bawlsia pa in, khatvei lai-a a suksiat a sawm tua upna thu tu-in a hilh ta hi," ci-a kigen bek a za uh hi.

²⁴Keima hangin amaute in Pasian a phat uh hi.