Read Zokam Galatia-te 2 Bible Online

Galatia-te 2 - Zokam bible

Galatia-te 2

¹Tua nung kum sawm-le-li ciangin Jerusalem ah ka paito kik hi; tua tungin Barnabas tawh ka hi hi. Titus zong ka tonpih hi.

²Kilaakna thu manga pai ka hi-a, Gentile-te laka ka gen lungdamna-thu mah amaute mai-ah ka lui hi. Ahi hangin ka kitaitehna uh ahi zongin ka tainasa ah ahi zongin, a mawkna a suah ding ka lau manin makai hileh a kilawmte kiangah ka hilh sim hi.

³Tua hi napi ka tonpih Titus nangawn Greek mi ahi hangin vunat dingin a kisawl teitei kei hi.

⁴Christ Jesu sunga i suahtakna hong ensimin sila hong suaksak dingin eite lakah sanggam zuau pawlkhat hong lutsim ahi manin hih thu hong piang ahi hi.

⁵Note sungah lungdamna-thu, thutak a om theih nadingin tawmvei sung zong amaute thu ka mang kei uh hi.

⁶Bangzahta in mi thupi hi le uh kilawm ta leh kei adingin amaute kilamdanna a om tuan kei hi. Pasian in a pualam kilatna in thu a khen kei hi—tua mite in ka thupuak bangmah a behlap kei uh hi.

⁷Tua tawh kilehbulh in, Jew-te a[3] tungah lungdamna-thu hilh dingin Peter a kipiak bang tektek in, kei zong Gentile-te b[4] tungah a hilh dingin hong kipia hi, cih a mu uh hi.

⁸Ahang in, Jew-te tunga sawltakpi Peter nasepna-a a sempa Pasian mah in Gentile-te tunga sawltakpi keima nasepna ah zong na a sem hi. Khuampite dinga a minthang

⁹James, Peter c[5] le John-te in kei tungah hehpihna hong kipia cih a theih uh ciangin kei le Barnabas kilawmtakna khut taklam hong khak uh hi. Amaute in kote Gentile-te tungah pai-a, amaute Jew-te tungah a pai ding uh a thukim uh hi.

¹⁰Amaute khempeuh in mizawngte phawk gige ding hong deih uh, kei zong ka lawp penpen mah ahi hi.

¹¹Antioch ah Peter hong pai ciangin amah khial khin ta ahi manin a mai-tangah amah ka sel hi.

¹²James kiang pan kuate hiam a pai ma-in, amah in Gentile-te tawh an a ne khawmkhawm hi. Ahi hangin amaute hong tun uh ciangin vunatte pawl-a pangte a kihtak manun Gentile-te panin kikang koihin amah le amah a kituam koih hi.

¹³Jew dangte in zong ama kineihsiamna zui uh a, tua ama kineihsiamna in Barnabas nangawn a pialmangsak hi.

¹⁴Lungdamna-thu amaan bangin amaute in sem lo uh cih ka muh ciangin amaute khempeuh mai-ah Peter kiangah, "Nang Jew mi hi napi, Jew mi bang loin Gentile mi bangin na nungta hi. Tua hi napi Jew ngeina zui dinga Gentile-te na kalh teitei bangci bang hiam?

¹⁵"Mawh nei Gentile-te bang hi lo pianpih a Jew mi ahi eite in

¹⁶thukham zuihzawhna hang hi lo, Jesu Christ upna hangin mi in diktansakna ngah hi cih i thei hi. Tua ahi ciangin eite in zong thukham zuihna hang hi lo, Christ upna hangin dik tansak-a i om theih nadingin Christ Jesu sungah i upna i nga hi; bang hang hiam cih leh thukham zuihna hangin kuamah dik a kitangsak kei ding hi.

¹⁷"Eite in Christ sungah dik kitansak ding i zon laitakin eite mahmah mawh neite i hina hong kilang ahi ciangin Christ in mawhna khangsak cihna ahi hiam? Hi peuhmah lo hi:

¹⁸Ka suksiat gawpsa ka lam kik leh thukham palsat mi ka hilam ka kitelsak hi.

¹⁹Ahang in, Pasian adinga ka nuntak theih nadingin thukham tungtawnin thukham ka sihsan hi.

²⁰Jesu tawh ka kikilhlum zo a, kei ka nungta nawn kei hi; ahi hangin ka sungah Christ a nungta hi. Ka pumpi sunga ka nuntakna pen, kei hong it-in, kei ading amahmah a kipia pa Pasian Tapa upna-in a nungta ka hi hi.

²¹Thukham tungtawnin thumaanna kingah thei hileh Christ a mawkna-a si hi ding ahi manin, Pasian hehpihna ka pampaih kei hi!" d[6] ka ci hi.