Read Zokam Galatia-te 3 Bible Online

Galatia-te 3 - Zokam bible

Galatia-te 3

¹No Galatia mihaite! No kua in hong bumhai ahi hiam? Jesu Christ a kilhlup bangin a kiteltakin note mitmuh tektek ah hong kilak hi.

²Note tung pan na khat bek ka thei nuam hi. Thukham zuihna hangin Kha na ngah uh hiam, ahikeh na zakte uh na upna uh hangin na ngah uh hiam?

³Tua zahta a hai lawmlawm na hi uh hiam? Kha tawh na pat khit nungun mihing nasepna tawh na ngim na tup uh tangtun sawm na hi uh hiam?

⁴A mawkna-in tua zahta thuak na hi uh hiam, a mawkna taktak himawk ding hiam?

⁵Pasian in thukham na zuihna uh hangin note, ama Kha hong pia in note lakah nalamdangte hong bawl ahi hiam, ahikeh na zaksa uh na up hang uh hizaw hiam?

⁶Abraham ngaihsun un: "Amah in Pasian uma, ama adingin tua mah thumaanna in kisimsak hi," e[7]

⁷Tua ciangin a umte Abraham tate suak cih theitel un.

⁸Pasian in upna hangin Gentile-te dik tangsak nuam cih Laisiangtho in mukhol a, Abraham kiangah, "Nang tungtawnin minam khempeuh thupha kipia ding hi," f[8] ci-in lungdamna-thu na magen hi.

⁹Tua ahi ciangin a umte khempeuh, upna nei mipa Abraham tawh thupha kipiakhawm hi.

¹⁰Thukham zuihna-a kingate khempeuh hamsiatna nuai-a om lai uh ahi hi. Ahang in: "Thukham Laibu sunga kigelhte khempeuh a zuikim suak zolote peuh mah hamsiat ahi uh hi," g[9] ci-in kigelh zo hi.

¹¹A teltakin thukham hangin Pasian mai-ah kuamah diktansak ahi kei hi. Bang hang hiam cih leh, "Mi thumaante upna hangin a nungta ding hi," h[10]

¹²Upna tungah thukham kibulphuh lo hi; tua tawh kilehbulh in, "Tuate a hih mi, tuate hang mahin a nungta ding hi." i[11]

¹³Eite tang dingin Christ hamsia hong suakin thukham hamsiatna panin hong tan zo hi. Ahang in, "Sing tunga kikhai peuhpeuh hamsiat ahi hi," j[12] ci-in kigelh hi.

¹⁴Eite in upna hangin a kiciamsa Kha i ngah theih nadingin Abraham tunga kipia tua thupha, Christ Jesu tungtawnin Gentile-te tungah hong tun theih nadingin amah in eite hong tan zo hi.

¹⁵Sanggamte aw, nisim nuntakna panin gentehna khat kong gen ding hi. A kikipsaksa mihing thukhun pen, kuamah in paikhia thei loin a behlap thei kei hi. Hih thu ah zong tua mah bang ahi hi.

¹⁶Abraham le a suan a khak tungah thuciamnate kipia hi. Laisiangtho in mi tampi a gennopna-in "na suan na khakte tungah zong" ci loin Christ ahi mi khat genna in, "na suan na khak tungah" a[13] ci zaw hi.

¹⁷Ka gennop hih ahi hi: A beisa huna Pasian in a kipsaksa thukhun pen tua khit kum 430 a kipia thukham in tua thuciam a phiat tuan kei hi.

¹⁸Ahang in, thukham tungah gouluahza kinga hileh thuciam tunga kinga ahi kei ding hi. Ahi hangin Pasian in a hehpihna hangin thuciam tungtawnin gouluahna Abraham a pia hi.

¹⁹Tua hi mawk leh, thukham bang ngimna ahi hiam? Thukham pen thuciam in a na gen tua Ci-le-sa hong tun mateng adingin khialhnate hanga kipia thuah ahi hi. Tua thukham pen vansawltakte tungtawn in palai khat zanga kikipsak ahi hi.

²⁰Ahi zongin mi pawlkhat bek tangin palai a ding kei hi; ahi hangin Pasian khat ahi hi.

²¹Tua ahi manin thukham in Pasian thuciamte a langpan hiam? Langpan peuhmah lo hi! Ahang in, nuntakna a pia thei thukham kipia hileh thukham hangin thumaanna hong tung khin takpi ding hi.

²²Ahi hangin a kikamciam pen Jesu Christ upna tungtawna kipiasa, a um mite tungah a kipiak thei nadingin Laisiangtho in leitung buppi mawhna thong kiapa ahi hi, ci-in genkhia hi.

²³Hih upna hong tun ma-in thukham in eite khempeuh thongah hong khia a, upna hong kilat mateng hong khumcip hi.

²⁴Tua ahi ciangin upna hangin dik tansak i hi thei nadingin Christ kiangah eite hong pi ding b[14] in tua thukham hong ki-uksak hi.

²⁵Tu-in tua upna tungta ahi manin thukham in hong uk kha nawn kei hi.

²⁶Christ Jesu upna tungtawnin note khempeuh Pasian tapate na hi uh hi;

²⁷ahang in, Christ sunga kibaptise note khempeuh Christ a silh na hi ta uh hi. Jew mi,

²⁸Greek mi a om kei hi; sila, sila lo a om kei hi; numei pasal a om kei hi. Ahang in, note khempeuh Christ Jesu sungah khat na hi uh hi.

²⁹Note Christ aa na hi uh leh Abraham suan na hi uh a, thuciam bangin gouluahte na hi uh hi.