Read Zokam Galatia-te 4 Bible Online

Galatia-te 4 - Zokam bible

Galatia-te 4

¹Ka gen thu in, gouluahpa in a neu lai-in a luah ding khempeuh a neipa ahi hangin sila tawh a kilamdanna a om kei hi.

²Apa hun seh hun a tun mateng a donte le a kemte ukna nuai-ah a om hi.

³Tua mah bangin eite i neu lai-in leitung ngeina bulpite nuaiah sila i suak hi.

⁴Ahi hangin a hun hong tun kim ciangin Pasian in a Tapa hong sawla, thukham nuai-ah numei sung panin hong suak hi.

⁵Thukham nuai-a omte tapa hina, thuneihna a kimin i ngah theih nadingin hong tan hi.

⁶Note tapate na hi manun "Abba, c[15] Pa" a ci khia tua Kha, ama Tapa Kha eite lungsungah Pasian in hong sawl hi.

⁷Tua ahi ciangin note sila hi nawn loin tapa na hi uh hi; tapa na hi nungsangun Pasian in note zong gouluahpa in hong koih zo hi.

⁸Tunung lai, Pasian na theih ma un pianngei-a pasian a hi lote sila-in na om uh hi.

⁹Ahi hangin tu-in note in Pasian thei tham loin, Pasian hong theih na hi nungsangun a thanem le bangmah a man lo thubulpite ah na kihei kik uh bangci bang ahi hiam? Tuate nuai-ah sila suak kikkik nuam na hi uh hiam?

¹⁰Note in a kisehtuam nite, khate, khuahunte le kumte na tang uh hi!

¹¹Note adingin bang tan hiam khat a mawkna-a hahkat ka hi khak ding kong laupih hi.

¹²Sanggamte aw, kong kun hi: note tawh a kibanga kong om bangin note zong kei bangin hong hi un. Kei tungah nong khial kei uh hi.

¹³Na theihsa bangun, note tungah lungdamna-thu kong gen masakna ka ci natna hang ahi hi.

¹⁴Ka dam loh no adingin zia-etna a suah hangin simmawhna peuh kihna peuhin nong nei tuan kei uh hi. Tua sangsikin Pasian vansawltak mahmah, Christ Jesu mahmah bangin nong muak uh hi.

¹⁵Note lungnopna khempeuh bang suak ta ahi hiam? Hih thei liai hi le uh cin na mittang nangawn uh khelkhia-in tuate kei nong piak nop lam uh ka thei hi.

¹⁶Tu-in note thutak kong hilh mana na gal uh suak ka hi hiam?

¹⁷Tua mite in note hong zogawp nuam uh hi; ahi hangin a hoih nading lam ahi kei hi. Amaute in kote pan note hong khenkhia in amau adingin nakpi-a na hahkat ding uh a deih uh hi.

¹⁸Ngimna a hoih nak leh hahkat ding hoih hi; note tawh kong om sung bek hi loin a tawntungin na hahkat den un.

¹⁹Note sungah Christ lim a kilat matenga nausuahnat thuak banga kong thuak kik kong it tate aw,

²⁰note hangin amkham ka hi manin tu-in note tawh omkhawm hileng, ka aw suah khel nuam na zen ing e!

²¹Thukham nuai-a om nuam note in, thukham in a gen bang hiam, cih za lo na hi uh hiam, hong gen dih un?

²²Ahang in, Abraham in tapa nih nei a, khat sila numei tawh a neih hi-in, a khat pen a suakta numei tawh a neih ahi hi, ci-in kigelh hi.

²³Sila numei tawh a neih a tapa pen a ngeina banga suak hi-a, ahi hangin a suakta numei tawh a neih a tapa pen kamciamna khat tangtunna ahi hi.

²⁴Tua numeite thukhun nih tanga ding ahi manin, hihte tehkakna-a lak theih ding ahi hi. Thukhun khat Sinai Vum pan hi a, sila a suak ding tate a nei hi. Tua pen Hagar ahi hi.

²⁵Tu-in Hagar pen Arabia a om Sinai Vum tangin ding a, tu huna Jerusalem khuapi tawh a kibang ahi hi; bang hang hiam cihleh tuanu a tate tawh sila-in a om uh hi.

²⁶Ahi hangin tunglama om Jerusalem pen sila hi lo a, amah eite nu ahi hi.

²⁷Ahang in, "Ta nei lo tasel numei aw, nuam in; nang, nausuahnat a thuak kha lo nu aw, nuamin ngaihtakin kikokhia in; bang hang hiam cihleh pasal nei numei sangin a kipampaih numei khat in ta tam a nei zaw hi," a[16] ci-in kigelh hi.

²⁸Tu-in sanggamte aw, note Isaac bangin kamciamna tate na hi uh hi.

²⁹Tua hunlai-in suah ngei-a suak tapa in Kha vangliatna pana suak tapa a bawlsia hi. Tu-in zong tua mah bang ahi hi.

³⁰Ahi hangin Laisiangtho in bang gen ahi hiam? "Sila numei tapa in a suakta numei tapa tawh gouluah khawm ngei lo ding ahi manin sila numei le a tapa hawlmang un." b[17] ci hi.

³¹Tua ahi manin sanggamte aw, eite sila numei tate hi loin sila lo numei tate i hi hi.