Read Zokam Galatia-te 5 Bible Online

Galatia-te 5 - Zokam bible

Galatia-te 5

¹Christ in a suakta dingin eite hong khahkhia hi. Tua ahi ciangin kiptakin ding unla, sila hakkol tawh no le no vangik kisuan kik nawn kei un.

²Ka kammalte ciamteh un! Keimah Paul in kong hilh hi; vun na atsak uh leh no adingin Christ in kimanna a nei peuhmah kei ding hi.

³Vunatsak mi peuhmah in thukham a vekin a zuih kim kul hi, kong ci lai hi.

⁴Thukham zuihna hangin diktansakna ngah a sawm note, Christ panin khenkhiatsa na hi uh a, hehpihna panin na pukmang khin uh hi.

⁵Ahi hangin kote in ka lamet uh thumaanna pen upna hangin Kha tungtawnin lawptakin ka ngak uh hi.

⁶Ahang in, Christ Jesu sungah vunat, ahi zongin, vunat loh ahi zongin kimanna a nei kei hi. Itna tungtawna kipulak tua upna bek in kimanna a nei hi.

⁷Note kitaitehna hoihtakin na tai uh hi. Thutak na zuih loh nadingun kua in hong dal ahi hiam?

⁸Tua bang kizolna ahileh note hong sampa kiang pan hi lo hi.

⁹"Silngo tawmkha in annel mekman lompi khat sung khempeuh a tawksak thei hi."

¹⁰Note, lungsim tuamdang a nei lo dingin Topa sungah kong muang hi. Note hong lungbuaisak peuhpeuh in kuakua ahi zongin gawtna thutanna a thuak ding hi.

¹¹Sanggamte aw, vunatna thu mah a hilh lailai hi leng bang hangin bawlsiatna thuak lai ding ka hi hiam? Tua bang hileh singlamteh hanga ngaihdahna a beisak ka hi ding hi.

¹²Note hong buaisakte amau le amau kiget vet le uh hi lo ding hiam?

¹³No ka sanggamte aw, a suakta dinga hong kisam na hi uh hi. Ahi zongin na suahtakna uh mawhdim pianngei c[18] deihna-a bualna in zang kei unla, tua sangin ki-itna tawh khat le khat na kisepsak thuk un.

¹⁴"Nang le nang na ki-it bangin na vengte it in," d[19] a cih thupiak khatah thukham khempeuh a kigawm khin hi.

¹⁵Note khat le khat kikei-in na kinek thuk uh leh kikem un, khat le khat na kihihsia gawp ding uh hi.

¹⁶Tua ahi ciangin Kha-in na nungta un, tua hileh mawhdim pianngei deihna na tangtun kei ding uh hi, kong ci hi.

¹⁷Ahang in, mawhdim pianngei lunggulhna pen Kha deihna tawh kilehbulh a, Kha lunggulhna pen mawhdim pianngei lunggulhna tawh kilehbulh hi. Tuate gel khat le khat kido ahi ciangin na hih nop uh na hih thei kei uh hi.

¹⁸Ahi hangin Kha in nang hong pi leh thukham nuai-ah na om kei hi.

¹⁹Mawhdim pianngei gamtatna telnop mahmah hi: numei-pasal paktatna, siantho-lohna le hukna-lanna;

²⁰milim biakna le bumna; muhdahna, kilemlohna, hazatna, hehluatna, angsung khualna, kilungkim lohna, kipawlkhennate le

²¹enna, zukhamna, uangtatna le tua bang nam khempeuh ahi hi. Tua banga nungtate in Pasian gam a luah kei ding hi, ci-a kong vauhilhsa bangin kong hilhkhol hi.

²²Ahi hangin Kha gah in: itna, lungnopna, kilemna, thuakzawhna, citna, hoihna, muanhuaina,

²³migitna le pumpi ukzawhnate ahi hi. Hihte a langpang ding thukham a om kei hi.

²⁴Christ Jesu aa ahite in tua mawhdim pianngei deihna le a lunggulhna teng tawh a kilhlum zo uh hi.

²⁵Kha hanga nungta i hi nungsangin Kha tawh kalsuan khawm ni.

²⁶Eite khat le khat kimisak, kihehsakin ki-eng kei ni.