Read Zokam Galatia-te 6 Bible Online

Galatia-te 6 - Zokam bible

Galatia-te 6

¹Sanggamte aw, mawhna a bawl mi khat a kimat leh a khami note in migitakin na phong ding uh hi. Ahi hangin no le no na kikem un; tua hi kei leh note in zong zia-etna na thuak kha ding uh hi.

²Khat le khat na vangik uh kidawn tek un. Hih bangin gamta le uh cin Christ thukham na tangtun ding uh hi.

³Mi khatpeuh bangmah hi lo napi a thupi-a a kingaihsut leh amah le amah kikhem ahi hi.

⁴Mi khempeuh in amau gamtatna encian ciat uh hen. Tua ciangin, midangte khatpeuh tawh kitehkak se loin amah le amah a kihisak thei pan ding hi.

⁵Ahang in, mi khempeuh in amau van tek a pua ciat ding uh hi.

⁶Thu-a kipantah peuhmah in, a pantah pa tawh a hoih khempeuh a tangkhawm pelmawh hi.

⁷Khem zawhin na om kei un: Pasian pen ciamnuih bawl theih hi lo hi. Mi in ama vawh bangin a at ding hi.

⁸Ama mawhdim pianngei lungkim nading a vawh mi in, tua pianngei e[20] panin siatna a at ding hi; Kha lungkim nading a vawh mi in, tua Kha panin nuntak tawntungna a at ding hi.

⁹Eite in i tawpsan kei nakleh a hun a tun ciangin a gah at ding i hi manin na hoih sep cimtak kei ni.

¹⁰Tua ahi manin hun hoih i neih sungin mi khempeuh tungah na hoih sem ni, a diakdiak in thu-um innkuante tungah sem ni.

¹¹Keima khut mahmah in laimal golpipi-a no tunga kong gelhte en dih un!

¹²A tungthama maipha ngah nuam mi pawlkhat in, vun hong atsak nuam teitei uh hi. Hih banga a hihna uh a thu, Christ singlamteh thu hanga bawlsiatna tawh a kipelh nop man bek uh ahi hi.

¹³Vunatte nangawn in thukham a zui kei uh hi. Tua hi ta leh note hong kisialhpih nuam uh ahi manin, vun hong atsak teitei uh ahi hi.

¹⁴Kei adingin leitung kikilhcip a, kei zong leitung adingin hong kilhcipna ahi tua a[21] Topa Jesu singlamteh longal ka kisialhpih kei ding hi.

¹⁵Vunat le vunat loh in phattuamna a nei kei hi. A thaka piansakna bekin phattuamna a nei hi.

¹⁶Hih zuih ding ngeina a zuite khempeuh le Pasian Isreal-te tung dongah lemna le lainatnate om ta hen.

¹⁷A nunung penin, ka pumpi tungah Jesu ciamtehnate pua ka hi manin, kuamah in kei hong buaisak kei ta hen.

¹⁸Sanggamte aw, Topa Jesu Christ hehpihna, note kha tawh om ta hen. Amen.