Read Zokam Ephesa-te 2 Bible Online

Ephesa-te 2 - Zokam bible

Ephesa-te 2

¹Note na hi uh leh na mawhnate uh le na khialhnate uh sungah na si khin uh a,

²hih leitung thu, tu laitaka thumang lote sunga na a sem kha tua huihgam ukpa na zuih lai-un, tuate sungah na nungta uh hi.

³Hun khat lai-in eite khempeuh zong amaute lakah i nungta a, i mawhdim pianngei a[7] ukluatna tangtun in pumpi lunggulhnate le ngaihsutnate zui-in i om hi. Midangte bangin pianngei in, thangpaihna nuai-a omte i hi hi.

⁴Ahi hangin lainatna a hau Pasian in a lian mahmah eite hong itna hangin

⁵khialhna sungah si-a i om laitak nangawnin Christ tawh eite hong nungtasak khawm - hehpihna hangin hotkhiat na hi uh hi.

⁶Pasian in Christ tawh eite hong thosak khawma, vanlam gamah Christ Jesu sungah amah tawh hong tukhawmsak hi.

⁷Christ Jesu sunga a migitna hanga eite tunga hong kigenkhia tehpih bei ama hehpihna kicinna, hong tung ding khanghunte ah eite tunga hong kilatsak nading ahi hi.

⁸Ahang in, hehpihna hangin upna tungtawnin hotkhiat na hi uh hi. No le no a na ngah uh hi loin Pasian letsong ahi hi -

⁹kuamah a kisialh theih loh nadingin sepna hang ahi kei hi.

¹⁰Ahang in, eite sep dinga Pasian geelkholh, nasep hoih sem dinga Christ Jesu sunga kipiangsak Pasian khutsiam i hi hi.

¹¹Tua ahi manin nidang lai-in pianngei in Gentile-te na hi uh a, amau le amau "vunat" (mihing khut tawh pumpi tunga ki-at) a kicite in note "vunat loh" hong cih uh phawk unla,

¹²tua hunlai-in note Christ tawh kikhenin Israel mi hina pan kipuaseh in, kam ciamna thukhunte-a tan nei lo gamdang mi hi-in, lametna a om lo le Pasian lo-a leitunga om na hilam uh phawk gige un.

¹³Ahi hangin khatvei lai-a gamlapi-a om note, tu-in Christ sisan tungtawnin Christ Jesu sungah hong kinaisak ta hi.

¹⁴Ahang in, nihte khat hong suaksak a, kikal dalna ahi kilemlohna kulhte a phelkhia pa a mahmah eite lemna hi-in,

¹⁵amah in ama ci-le-sa ah tua thukham le thukham’ thupiakte le ngeinate a beisak hi. Mi nihte panin mi thak khat a mahmah sunga piansak ding a ngimna hi-a, tua hangin kilemna bawlin

¹⁶hih pumpi khat sungah amaute gel singlamteh tungtawnin Pasian ah kilemkiksaka tua tawh amaute kilang neihna a lamang hi.

¹⁷Amah hong pai-in no a gamlapi-a omsate tungah kilemna thu, a nai-a omsate tungah zong kilemna thu mah hong gen zo hi.

¹⁸Ahang in, ama tungtawnin eite in Kha khat tawh Pasian mai-ah luttheihna i nei tuak hi.

¹⁹Tua thu hangin note mikhual le gamdang mi hi nawn loin, Pasian mite tawh tualsung mi na hikhawm uh a Pasian innkuan sung mite na hi uh hi,

²⁰innkiu suangpi Christ Jesu mahmah tawh sawltakpite le kamsangte bulkip tunga hong kilam na hi uh hi.

²¹Ama sungah tua inn buppi kizomkhawm a, Topa sungah a siangtho biakinnpi a suak dingin a khang hi.

²²Tua hi-a note zong Pasian ama Kha-in a tenna a suak dingin a kilamkhawm toto na hi uh hi.