Read Zokam Ephesa-te 4 Bible Online

Ephesa-te 4 - Zokam bible

Ephesa-te 4

¹Tua ahi ciangin Topa adingin thongkia keimah in na ngahsa uh hong sapna tawh kilawm-a na nuntak ding uh kong kun hi.

²Kiniamkhiat le migitakin om un; lungduai-in itna tawh khat le khat na kithuak keeikai un.

³Kilemna in hong khihkhawmna tungtawnin, tua Kha a na kipumkhatna uh na letkip nadingun na hih theih tawpun hih un.

⁴Pumpi khat le Kha khat - note hong kisap lai-a lametna khata hong kisap bangin -

⁵Topa khat, upna khat, baptise-na khat,

⁶na khempeuh tunga om, na khempeuh tungtawna, na khempeuh sunga ompa, mite khempeuh Pasian le Pa khat a om hi.

⁷Ahi hangin Christ sehsaknasa bangin eite tungah hehpihna hong kipia ciat hi.

⁸Hih thu hangin: "A sangah amah a kahtoh ciangin, amatte pi-in tonpih to a, mite tungah letsongte a pia hi." a na a[9] ci hi.

⁹(Leilam gam, a niamna b[10] ah amah kumsuk lo hileh, "amah kahto" a cih, bang a cihnopna hi ding hiam?

¹⁰Khuavannuai bup na khempeuh a kicingsak dingin a kumsukpa tektek vante khempeuh sanga sangzawin a kahto pa ahi hi.)

¹¹Amah, mi pawlkhat sawltakpi, pawlkhat kamsang, pawlkhat lungdamna thugen, pawlkhatte thuhilh sia le laihilh sia sem dingin a pia pa hi-a,

¹²tuate in Christ pumpi a khansuah theih nadingun Pasian mite na sem dinga a bawlkholh nading ahi hi.

¹³Tua in eite khempeuh, tua upna le Pasian Tapa theihna ah khat suaka, Christ kicinna zahzah a i picin mateng ading ahi hi.

¹⁴Tua ciangin mite in zuau siamna le khelpilna tawh a geel uh amau khemna ah, tuihual in a lapsuk a laptoh, thuhilhna huih citeng in amut kawikawi naungekte i hi nawn kei ding hi.

¹⁵Tua sangsik in, itna tawh thutak genin, Lutang ahi pa Christ sungah, na khempeuh ah ama sungah i khangto ding hi.

¹⁶Amah panin pumpi na khempeuh thagui tekah kihuh kizom khawmin, amau sep ding tek a sep ciangin tua pumpi, itna sungah khangin amah le amah a kikhansuah hi.

¹⁷Tua ahi ciangin note, Gentile-te ngaihsutna gina lo-a, a nuntak bangun na nuntak nawn loh nadingun hih thu Topa sungah kong gena, kong kun tangtang hi.

¹⁸Amaute lungtang kikhauh sakna hanga bangmah a theih loh manun, Pasiana nuntakna panin amaute kikhenkhia-a, a theihtelna uh kimialsak hi!

¹⁹Amaute in zumna mel thei nawn loin a siang lo namkima bual dingin a uangzaw kilunggulhna nei tawntung uh a, amau hukna le lanna ah a kipiakhia khin zo uh hi.

²⁰Bangbang hi ta leh note in tua bang lamin Christ na thei kei uh hi.

²¹Jesu sunga om thutak tawh kizui-in ama sungah hong kihilh zo ahi ciangin note in amah thu na zaksa uh hi takpi hi.

²²Tuma lai-a na nuntakna uh tawh kisai-in khemhat lunggulhna in a siatsaksa na milui uh suahkhia ding,

²³na lungsim puakzia uh kibawl thak ding,

²⁴amaan thumaanna le sianthona taktak sungah Pasian tawh kibang dinga kipiangsak mithak na silh ding uh note hong kihilh hi.

²⁵Tua ahi manin eite khempeuh pumpi khat sunga a nate i hi manin note a kuamapeuh in zuauphuahna suahkhia-in a vengte tungah maantakin thu a gen pelmawh ding hi.

²⁶"Na heh sungin na mawh kei in," c[11] na heh dam loin ni na tumsak kei in,

²⁷dawimangpa siksan na awn kei in.

²⁸A guta densa pa in gu nawn peuhmah loin a kitangsamte na khatpeuh a hop theih nadingin ama khut tawh, kimanna a nei na khatpeuh sem pelmawh hen.

²⁹Na kam panun kam hoih lo pusuak sak kei un, ahi zongin a zate in phat tuampih in amau tangsapna tawh kizui-a, amaute bawlpha in, a huh thei ding kammal bek pusuaksak zaw un.

³⁰Tatkhiat ni adinga note hong kiciamtehna Pasian Khasiangtho na dahsak kei un.

³¹Khaat-na, ngonghehna le hehna, kitotzakna le gensiatnate khempeuh etsatna nam khempeuh tawh na paikhia un.

³²Note migi in khat le khat na kikhuatuah unla Pasian in Christ sunga note mawhna hong maisak bang tektek in, na mawhna uh na kimaisak ciat un.