Read Zokam Ephesa-te 5 Bible Online

Ephesa-te 5 - Zokam bible

Ephesa-te 5

¹Tua ahi manin itluat tate bangin Pasian a ettehte hi unla,

²Christ in eite hong it a, eite adingin Pasian tungah a namtui-a piakna ding le biakpiakna dingin amah le amah a kipiakkhiat bangin itna nuntakna tawh na nungta un.

³Ahi hangin note lakah numei pasal paktatna lim ahi a, siantho lohna nam khat peuhpeuh le huaihamna ahi zongin a om peuhmah kei ding hi. Bang hang hiam cih leh Pasian misiangthote adingin hihte kilawm lo hi.

⁴Note kam panin zahmawhpau le haipauna, ciamnuih thanghuaite, tua banga kilawm lote omsak loin lungdam na ko zaw un.

⁵Ahang in, a thangtat, a siangtho lo ahikeh a huaiham, tua banga hihte milim bia hi-a, Christ le Pasian gam d[12] ah luah ding bangmah a nei kei hi, cih na theitel uh hi.

⁶Thu mawkmawk tawh kuamah na kikhem zosak kei un. Bang hang hiam cihleh tua bang thute hangin thumang lote tungah Pasian thangpaihna a tung hi.

⁷Tua ahi manin amaute tawh kithuah kei un.

⁸Ahang in, hun khat lai-in note khuamial na hi uh a, ahi hangin tu-in Topa sungah khuavak na hi uh hi. Khuavak tate bangin na nungta un;

⁹Ahang in, khuavak gah in, hoihna khempeuh, thumaanna le thutak ahi hi.

¹⁰Topa lungkimna bang hiam, cih na zong un.

¹¹Gah a gah lo khuamial gamtatna tawh na kisawhkha kei unla amau gamtatnate na pholak zaw un.

¹²Ahang in, thumang lote in a simthama a septe uh a kigenkhiat bek zong maizumhuai hi.

¹³Ahi hangin khuavak in a pholak na peuhmah a kimu thei hi.

¹⁴Ahang in, na khempeuh a kimu theisak khuavak ahi hi. Hih thu hangin: "Ihmu mi aw, khanglo in, misi panin tho in, tua hileh nang tungah Christ a tang ding hi,"a na ci hi.

¹⁵Tua hi-a na nuntak zia uh, apil lote bang hi loin apilte bangin limtakin kidawm unla,

¹⁶nite hoih lo ahi manin hun hoih na neih peuhpeuh uh a hoih penin na zang un.

¹⁷Tua ahi ciangin hai kei unla, Topa deihna bang ahi hiam, cih theitel zaw un.

¹⁸Zu kham kei un, uangtat luatna mun hong tun thei hi. Tua sangsikin, Kha tawh na kidim zaw un.

¹⁹Phatna-late, biakna late le khalam late in khat le khat na kihopih un. Na lung sung uhah phat kawmin Topa tungah la sa un,

²⁰Topa Jesu Christ minin na khempeuh hangin Pa Pasian tungah lungdam na ko tawntung un.

²¹Christ zahtakna tawh khat le khat na kiniamkhiat tuah un.

²²Zite aw, Topa tunga ki-ap bangin na pasalte uh tungah ki-ap un.

²³Ahang in, Christ in ama pumpi ahi pawlpi lutang le a Honpa ahi bangin zi lutang in a pasal ahi hi.

²⁴Christ tungah pawlpi a ki-ap bangin zite zong na khempeuh ah a pasalte uh tungah a ki-ap ding uh hi.

²⁵Christ in a pawlpi it a, ama adingin amah mah a kipumpiak khiat bang tektek in, pasalte aw, na zite uh it un.

²⁶Amah in pawlpi siangtho dingin thu tungtawnin tui in sawp a, singthosak a[13] hi,

²⁷tua pen a nin baang lo, a vun tonna om lo, a melhemna khatpeuh om lo tham loin siangtho le kawkbaang lo-a, a tangkhia pawlpi-in amah le amah a kipiakkhiat theih nading ahi hi.

²⁸Tua tawh kibangin, pasalte in amau pumpi bangin a zite uh a it uh kul hi. A zi it pa amah le amah ki-it ahi hi.

²⁹Tuate khempeuh khit ah, ama pumpi mudah kuamah om ngei lo a, Christ in a pawlpi cingin a vak bang tektekin ama pumpi cingin a vak zaw hi.

³⁰Ahang in, eite ama pumpi nate i hi hi.

³¹"Hih thu hangin pasal in a nu le a pa nusia-in a zi tawh kigawm dinga, tua nihte sakhat a suak ding uh hi." b[14]

³²Hih in thuthukpi khat hi-a, ahi hangin kei gen ahileh Christ le pawlpi thu ahi hi.

³³Bangbang ahi zongin, note a kua mapeuh amah leh amah a ki-it bangin na zite uh na it pelmawh un. Zi in zong a pasal a zahtak pelmawh ding hi.