Read Zokam Ephesa-te 6 Bible Online

Ephesa-te 6 - Zokam bible

Ephesa-te 6

¹Tate aw, Topa sungah na nu na pate uh thu na mang un, ahang in, hih in thumaan ahi hi.

²"Na nu na pa pahtawi in." c[15] Hih in thuciam tawh kizui thupiak masa pen ahi hi.

³Tua bang na hileh na khan nuam dinga, leitungah sawtpi nuntak nuam na sa ding hi.

⁴Pate aw, na tate uh mawk hehsak kei un, tua sangsikin, pattahna le Topa lamlahna ah khangtosak un.

⁵Silate aw, Christ thu na man ding bang tektek un, na lungsim sung uhah thutak cihtakna tawh zahtakna le kihtakna tawh na leitung pute thu na mang un.

⁶Amaute hong muh sunga hong pahtak nading bek hi loin Christ sila bangin na lungtang sung uhah Pasian deih bangin amaute thu na mang un.

⁷Mihing nasem bang hi loin Pasian nasem bangin na lungtang khempeuh uh tawh na sem un.

⁸Bang hang hiam cih leh Pasian in sila ahi a, sila lo ahi zongin na hoih a sem peuhpeuh pahtakman a piak ding na thei uh hi.

⁹Tua ciangin pute aw, tuamah tawh kibangin na silate uh na hih un. Van tungah note le amaute Pu ahi khawmpa om a, amah in gup le paih a neih loh lam thei na hi manun amaute na tawng kei un.

¹⁰A nunung penin, Topa sung le ama thahat vangliatna sungah thakhauh un.

¹¹Dawimangpa hong sawmnate na nan zawh nadingun Pasian galvan a kimin silh un.

¹²Ahang in, eite do ahileh si le sa hi loin vanlam gama gam-ukte, thuneihnate, hih leitung khuamial vangliatnate le kha gilo galkapte ahi hi.

¹³Tua ahi manin ni hoih lo hong tun cianga na pan theih nading uh le hih ding khempeuh na hih khit uh cianga na din zawh lai nadingun Pasian galvan a kimin silh un.

¹⁴Tua ciangin na kawnguah thutak kawnggak gaksa, na awmuah thumaanna awmdal bulhsa le

¹⁵na khe-uhah kilemna lung damna-thu pana hong pai kigin kholhna bulhsa-in kiptakin ding un.

¹⁶Hihte khempeuh banah gilopa mei kuang thaltangte na sukmit theih nadingun upna lum tawi un.

¹⁷Hotkhiatna sik lukhu le Pasian thu ahi Kha namsau la un.

¹⁸Tua ciangin hun khempeuh ah thungetna nam khempeuh le ngetna tawh Kha-in thu na ngen un. Hih thu ngaihsun kawmin pilvang unla misiangte khempeuh ading thu na ngetsak den un.

¹⁹Thu ka hilh peuhpeuh cianga thu hong kipiak theih nading le lungdamna thuthuk lau lo-a ka theihsak theih nadingin zong thu na ngetsak un.

²⁰Ahang in, tua thu hangin sikkhainiang bulh kawma palai ka hi hi. Ka hih ding bangin lau peumah loin ka pulakkhiat theih nading thu na ngetsak un.

²¹Topa sunga nasem muanhuai ka it sanggampa Tychicus in kei bangci om a, na bangci sep cih na theih nadingun na khempeuh hong gen ding hi.

²²Kote bangci cih na theih nading uh le amah in note hong hanthawn theih nading mahmah deihna-in amah note kiangah kong sawl hi.

²³Pa Pasian le Topa Jesu Christ panin upna tawh kigawmkhawm itna le lemna, sanggamte tungah om ta hen.

²⁴A si theilo itna tawh eite Topa Jesu Christ a itte khempeuh tungah hehpihna om ta hen.