Read Zokam Philippi-te 1 Bible Online

Philippi-te 1 - Zokam bible

Philippi-te 1

¹Christ Jesu nasem Paul le Timothy in, Philippi a om Christ Jesu sunga misiangte khempeuh le pawlpi kemte a[1] le pawlpi upa teng tungah:

²Eite Pa Pasian le Topa Jesu Christ tung pana hehpihna le lemna no tungah om ta hen.

³Note kong phawk simin ka Pasian tungah lungdam ka ko hi.

⁴Note khempeuh ading thu ka nget simin lungnopna tawh ka ngen tawntung hi,

⁵bang hang hiam cih leh ni masa pen ni-a kipan tu dong lungdamna-thu sungah na kihel den uh hi.

⁶Note sunga nasep hoih a panpa in Christ Jesu ni dongin a bucing dingin semsuak ding cih ka muang hi.

⁷Ka lungsunga note kong neih nungsangin hih bang zia a lungsim a kong neih ding a man ahi hi; kolbulhin ka om a, lungdamna-thu hu-in ka kipsak zongin note khempeuh in Pasian hehpihna kei tawh na tangkhawm uh hi.

⁸Note khempeuh Christ Jesu itna tawh kong lunggulh lam Pasian in a thei ding hi.

⁹Ka thungetna in: note itna theihna le a sung thu khenteltheihna ah khang semsema,

¹⁰a hoihpen telsiang thei-in Christ ni dong siangtho-in, kawkbanna om loin,

¹¹Pasian minthan nading le a kiphat nadingin Jesu Christ tungtawna hong pai thumaan gah tawh na dim nading uh ahi hi.

¹²Tu-in sanggamte aw, kei tunga hong tungsa thu in lungdamna-thu khangsak takpi cih na theih ding uh ka deih hi.

¹³Tua hangin Christ hanga kol bulh a om ka hilam kumpi inn cingte b[2] khempeuh le mi khempeuh in theikhawk ta uh hi.

¹⁴Kol hong kibulhna hangin Topa sunga sanggamte a tamzaw in Pasian thute hangtak le lau het loin gen ding hanthawnna a ngah zaw uh hi.

¹⁵Mi kimkhatte in enna le kilungsim demna tawh Christ thu hilh uh a, ahi hangin adangte in amau ngimna hoih nei in, a hilh uh hi, cih thumaan ahi hi.

¹⁶Hih a nunungte mah in lungdamna-thu a hu dinga om lai ka hilam thei-in itna tawh a hilh uh hi.

¹⁷A masa pawl in thutak paii loin, kol bulha ka om sungin buaina tawh kei hong linglawngsak thei ding uh kisa in huaiham sawmin Christ thu a hilh uh hi. c[3]

¹⁸Ahi hangin bang phamawh ahi hiam? A thupi penin, ngimna hoih ahi-a ngimna hoih lo ahi zongin bangbang lamah Christ thu a kihilh nak leh pha zo hi. Hih thu hangin ka nuam hi. Hihi, ka nuam lailai ding hi.

¹⁹Ahang in, note thungetna tung tawn le Jesu Christ Kha in kei hong huhna bangin kei tunga piang thu pen ka suahtakna d[4] hong suak ding cih ka thei hi.

²⁰Ka pumpi ah nuntakna ahikeh sihna in ahi densa bangin tu-in Christ a kipahtawi theih nadingin a kicing hanna ka nei ding cih maizum loin lawptakin kihehnemna le lametna ka nei hi.

²¹Kei adingin nuntak, Christ hi-a, sih lah metna ahi hi.

²²Pumpi-in nungta lai leng, ka nasepna gah, gah lai ding hi. Tua hi napi bang teelzaw ding ka hi hiam? Ka thei zo kei hi!

²³Tua nih saikakin ka om a, paikhia-in Christ tawh omkhawm ding ka lunggulh hi; tua mah nakpi in hoihzaw tham hi.

²⁴Ahi hangin note adingin pumpi-a ka nuntak lai ding kisamzaw hi.

²⁵Hih thu theitel ka hi manin ka nungta lai dinga, upna sunga na khan nading uh le na lungnop nadingun note khempeuh tawh ka omkhawm lai ding hi.

²⁶Tua ciangin note tawh ka omkhawm kikna tungtawnin Christ Jesu sunga na lungnopna uh kei hangin a dimlet ding hi.

²⁷Bang khatpeuh piang ta leh, Christ lungdamna-thu tawh a kilawm in, ki-ukin na gamta un. Tua hileh hong hawhin note kong mu a, ka om loh kalin note thu ka galzak zongin lungdamna-thu upna hu in, lungsim kikhatin na dingkip uh cih ka thei ding hi;

²⁸note hong langpangte in bangmah lamah hong lausak zo lo cih zong ka thei ding hi. Hih in Pasian in amaute susia dinga note hong hon ding ahi na amaute tungah lim hi ding hi.

²⁹Ahang in, amah um ding bek hi lo, ama ading thuak dingin zong, Christ tang dingin note hong kiphal hi.

³⁰Ka thuaksa bang note in na thuak uh cih na muh nung sangun tu-in thuak ding nei lai ka hilam thei ta un.