Read Zokam Philippi-te 3 Bible Online

Philippi-te 3 - Zokam bible

Philippi-te 3

¹A nunung penin ka sanggamte aw, Topa sungah lungdam un! Note tungah a kibangmah gelh kik ding buaihuai lo a, note adingin bitna ahi hi.

²Tua uite, tua gilo-a gamta mite tua misa a atgawpte lakah na pilvang un.

³Ahang in, ei vunatte ei Kha-a Pasian biate, Christ Jesu sunga a minthangte in, ci-le-sa ah muanna i nei kei hi.

⁴Tua bangin suang nuam hi leng, kei mahmah in zong suan theih ding tampi ka nei hi. Midang khatpeuh in ci-le-sa suan ding nei a, a kingaihsut leh ken ka hauzaw sem hi;

⁵a nigiat ni-a vunat Israel mi, Benjamin beh, Hebrew-te laka a Hebrew, thukham zuihna ah Pharisee,

⁶hahkatna lamah pawlpi bawlsia; thukham tawh kisai thumaanna ah a genbaang lo ka hi hi.

⁷Ahi hangin kei adinga metna ahi peuhmah tu-in Christ hangin supna-in ka sim hi.

⁸Tua tham loin ka Topa Christ Jesu theihna a thupi luatna tawh tehin na khempeuh supna-in ka sima, ama hangin na khempeuh ka taan zo hi. Tuate khempeuh ninneng bangin ka ngaihsun hi, Christ ka ngah nading le

⁹ama sungah ka om theih nading hi-a, thukham pana hong pai keima thumaanna hi loin Pasian pana upna tawh hong pai Christ upna tungtawna kingah thumaanna pen hizaw hi.

¹⁰Christ le ama thawhkikna’ vangliatna le a thuaknate thuakpihna, a sihna ah amah tawh kibatna ka thei nuam hi.

¹¹Tua pen misi pana thawhkikna ka ngah theih nading ahi hi.

¹²Hih khempeuh a ngah khin ta, hong kicingsak khin zo, ka cihna hi loin Christ Jesu in kei hong matna mah ken zong ka mat zawh nadingin mai ka nawt tentan hi.

¹³Sanggamte aw, a mankha khin ta in ka kisim kei hi. Ahi hangin ka hih na khat in: nunglama omte ka mangngilh-a mailama om nate ka delh tentan hi.

¹⁴Christ Jesu sunga vanlam-a letsong ngah dinga Pasian in hong sapna kung lam manawh in ka nawt teitei hi.

¹⁵A picing khinsa eite khempeuh in tua bang lungsim i neih ding ahi hi. Note in a kilamdang thu tuam khat na ngaihsut uh leh tua zong Pasian in hong theitelsak ding hi.

¹⁶I ngahsa ciangciang bek tawh kikhom in eite nungta ni.

¹⁷Sanggamte aw, kei omdan zui-in midangte tawh kipawl unla, note gamtat zia dinga kong piak bang uh zui-a a nungtate ciamteh un.

¹⁸Ahang in, a beisa hunah mi tampite Christ singlamteh galin a nungta uh hi, ci-a kong gensa bangin tu-in zong khitui nangawn tawh kong gen kik lai hi.

¹⁹Amaute tupna, siatna hi-a, a pasian uh amau gilpi hi-in, a minthanna uh amau maizumna ahi hi. Amaute in leitung nate bek a ngaihsun uh hi.

²⁰Ahi hangin eite gammi i hina vantung ahi hi. Eite in tua mun panin Honpa Khat - Topa Jesu Christ lawptakin i ngak hi.

²¹Na khempeuh a ukna nuai-ah a koihsak thei tua vangliatna in a simmawh huai i pumpite, a minthang ama pumpi tawh kibang dingin a khel ding pa amah ahi hi.