Read Zokam Philippi-te 4 Bible Online

Philippi-te 4 - Zokam bible

Philippi-te 4

¹Tua ahi manin ka sanggam, kong it, kong ngaih luat, ka lungnopna le ka kumpi lukhute aw, Topa sungah na dinkip zia ding uh tua bang ahi hi, kong it lawmte aw!

²Euodia le Sintyche-te, Topa sung-ah khat le khat a kilem nadingun ka thum hi.

³Hihi, ka hakkol puakpih muanhuai a[8] aw, lungdamna-thu ka genna-a hong panpih hih numeite, Clement le ka naseppihte, nuntakna laibu sunga a min omte khempeuh na huh un.

⁴Topa sungah lungnuam tawntung un. Kong genkik ding hi: Lungnuam un!

⁵Mi khempeuh tungah na migitna uh na kitelsak un. Topa hong nai hi.

⁶Na khatpeuhah lunghimawh in patau kei unla, na khempeuh ah lungdamkohna tawh thuahin, thungetna le ngetna Pasian tungah na tun un.

⁷Tua hileh theihtelnate khempeuh a khup Pasian lemna in, Christ Jesu sungah na lungsimte uh le na lungtangte uh hong cing ding hi.

⁸A nunung penin sanggamte aw, a maan peuhmah, a zahtakhuai peuhmah, a dik peuhmah, a siang peuhmah, a ithuai peuhmah, a pahtakhuai peuhmah, na khatpeuh a hoih pen hi-a, a phattak nak leh tua bang nate na ngaihsun un.

⁹Kei tung pana na sinsa, na ngahsa, na zaksa uh ahi zongin, kei sunga na muhsate uh ahi zongin na taksuaksak un. Tua hileh lemna Pasian, note tawh a omkhawm ding hi.

¹⁰Kei nong deihsakna uh na thak suaksak takpi manun, tu petpetin Topa sungah nakpitakin ka lungnuam hi. Nong lunghimawh takpi uh a, ahi hangin nong lah nading uh hun hoih na nei kei uh hi.

¹¹A piang bangbang ka lungkim nadingin a kisin khinsa ka hi manin, kisapna nei-a hih thu a gen ka hi kei hi.

¹²Taksap kici bang hi-a, kicing a kici bang hiam cih ka thei hi. Gilkialna hiam gilvahna, zawnna hiam hauhna - omzia namkim ah lungkimna thusim ka sin zo hi.

¹³Kei thahatna hong pia pa tungtawnin na khempeuh ka hih thei hi.

¹⁴Tua hi napi gimna ka thuak laitakin, kei nong thuakpih uh hoih mahmah hi.

¹⁵Tua tham loin, no Philippi-te in na theihsa bangun, lungdamna-thu na theih cil lai nite ua, Macedonia pana ka zinkhiat lai-in, piakna le ngahna ah note longal hong huh pawlpi khat beek a om kei hi;

¹⁶ahang in, Thessalonica a ka om sung nangawn in, kisapna ka neih ciangin huhna nong khakkhak uh hi.

¹⁷Letsong ka zonna hi loin, note hamphat nading ka deihna hizaw hi.

¹⁸Ken ka ngah ding zah ka ngah banah a tamzaw nangawn ka ngah zo hi; nong huhna uh kicing khengvala, Epaphroditus nong khak uh letsong zong ka ngah hi. Tuate, Pasian a lungdamsak, biakpiakna santham biakna namtui ahi hi.

¹⁹Christ Jesu sunga hauhna minthang tawh ka Pasian in note kisapna khempeuh hong guan ding hi.

²⁰Eite Pasian le Pa tungah a tawntung in minthanna om den ta hen. Amen.

²¹Christ Jesu sunga om mi siangte khempeuh na hopihsak un. Kei tawh a omkhawm i sanggamte in hong hopih uh hi.

²²Misiangte khempeuh, a diakdiak in Caesar innkuante in note hong hopih uh hi.

²³Topa Jesu Christ hehpihna in note kha hong ompih ta hen. Amen. a[9]